ရှင်ဥပဂုတ် ကိုးကွယ်မှု

ထေရဝါဒဗုဒ္ဓဘာသာ ကိုးကွယ်မှုများထဲတွင် မဟာယာနဂိုဏ်းမှ အယူအဆများကို ရောနှောလက်ခံနေသည်ကိုလည်း တွေ့ရ၏။
ထိုအယူများအနက် ရှင်ဥပဂုတ် ကိုးကွယ်မှုသည် ရှေ့တန်း၌ ရှိနေလေသည်။
ရှင်ဥပဂုတ္တမထေရ်၏ အတ္ထုပ္ပတ်သည် မဟာယာနဂိုဏ်းသုံး ကျမ်းစာဖြစ်သော ဒိဗျာဝဒါနကျမ်းမှ ဖန်တီးပေးလိုက်သော ဇတ်လမ်းဖြစ်သည်။
ရှင်ဥပဂုတ်မထေရ်သည် ဣန္ဒဂုတ္တ၊ အဿဂုတ္တ၊ တိဿနာဂ၊ ဥပဂုတ္တတိဿနာဂ၊ အာဂတ်စတယမုနိဟူသောဘွဲ့မည် အမျိုးမျိုးဖြင့် ထင်ပေါ်ကျော်ကြားသူဖြစ်သည်။
ရှင်ဥပဂုတ်မထေရ်နှင့် ပတ်သက်၍ထေရဝါဒ ပိဋကတ်တော် အဋ္ဌကထာတို့၌ ကျယ်ပြန့်စွာမပါရှိပေ။
ထိုမထေရ် အကြောင်းကို သာသနာနှစ် ၈ဝဝ ခန့်က ရှင်မဟာနာမရေးသော မဟာဝင်ဝတ္ထု၌ ဖော်ပြခဲ့သည် ။
ရှင်မဟာနာမသည် မဟာယာနကျမ်းစာ ဒိဗျာဝဒါနမှ ထုတ်ယူ၍ တင်ပြခဲ့ခြင်း ဖြစ်ပါမည် ။
မဟာဝင် ကျမ်းလာစကားတို့ကို ယူ၍ မြန်မာကျမ်းပြု ဆရာတို့ကလည်း ဖော်ပြခဲ့ကြပြန်သည်။
မဟာရာဇဝင်ကြီး ၊ လောကပညတ္တိကျမ်း ၊ ဇိနတ္ထပကာသနီကျမ်း တို့တွင် ထိုမထေရ်၏ အတ္ထုပ္ပတ်ကို
ကူးယူထည်သွင်းခဲ့ကြသည်။
ထိုအခါမှ မြန်မာတို့၏ စိတ်တွင် ရှင်ဥပဂုတ္တ ဟူသော ဇတ်လမ်းသစ်ကို လက်ခံရရှိခဲ့ကြသည်။
အစွမ်းကောင်းသော မထေရ်တပါးအဖြစ် မြန်မာတို့၏ နှုတ်ဖျားတွင် တွင်ကျယ်လာခဲ့လေသည်။
ရှင်ဥပဂုတ်မထေရ်သည် တောင်သမုဒ္ဒရာ၌ ကြေးပြာဿဒ်ဖြင့် နေသည်။
ယနေ့တိုင် အသက်ရှင်လျှက် ရှိနေသေးသည် ဟုလည်း ကြံကြီးစည်ရာ ယုံကြည်နေကြသည်။
ထို့ကြောင့်မြန်မာတို့သည် ရှင်ဥပဂုတ်ပုံကို ထုလုပ်၍ ဖောင်နှင့်မျှောကာ ပူဇော်ပွဲများ ပြုလုပ်ကြသည်။
ရှင်ဥပဂုတ်သည် လေမုန်တိုင်းကျခြင်း၊ မိုးရွာခြင်း ၊ ရေလွှမ်းခြင်း ၊ မိုးကြိုးပစ်ခြင်း စသေသန္တရာယ်တို့ကို လွကာကွယ်ပေးနိုင်မည် ဟုလည်း ယုံကြည်ကြသည်။
မြန်မာနိုင်ငံတွင် ရှင်ပြုအလှူပွဲစသည် ပြုလုပ်လျှင်
လေမိုးအန္တရာယ်ကင်းစေရန် ရှင်ဥပဂုတ်ရုပ်ထုကို ကန်တော့ပွဲဖြင့် တင်သ၍ ပူဇော်ထားကြရသည်။
မြန်မာပြည်တွင် နောက်ခေတ်မှ တည်ထားသော အချို့သော ဘုရားထီး အတွင်း၌လည်း ရှင်ဥပဂုတ်ကျောင်းဆောင်လေးများကို ထည့်သွင်းလေ့ရှိကြသည်။ မိုးကြိုးအန္တရာယ်စသည် ကင်းစေရန် ဖြစ်သည်။
နောက်ပိုင်းတွင် ရှင်ဥပဂုတ်မထေရ်သည် ဂိုဏ်းဆရာလုပ်သူတို့၏ လက်ထဲ ရောက်သွားရာ စိတ္တဇဝေဒနာအတွက် အသုံးချခံတစ်ပါး ဖြစ်သွားရပြန်သည်။
ရှင်ဥပဂုတ်သာ မဟုတ် ရှင်မဟာကဿပကဲ့သို့သော မထေရ်များလည်း ပါဝင်နေကြသည်။
ထိုမထေရ်များကို အုပ်စုဖွဲ့ပေးကာ " သေ ၄~ပါး၊ ရှင် ၄~ပါး" ဟူ၍ ခေါ်ဆိုထားကြသည်။
ထိုမထေရ် ၈ ပါးတို့ မှာ အသေထွက် ပုဂ္ဂိုလ်နှင့် အရှင်ထွက်ပုဂ္ဂိုလ်များ ဟူ၍လည်း လက်ခံကြပြန်သည်။
ရှင်လေးပါးစာရင်း၌ အောက်ပါမထေရ်တို့ ပါဝင်သည်။
(၁) ရှင်ဥပဂုတ်သည် တောင်သမုဒ္ဒရာ၌ ကြေးပြဿဒ် ဖြင့်နေသည်။
(၂) ရှင်ခေမရထေရ်သည် အနောက်သမုဒ္ဒရာ၌ ကြေးပြဿဒ် ဖြင့်နေသည်။
(၃) ရှင်ဘဒ္ဒမထေရ်သည် မြောက်သမုဒ္ဒရာ၌ ရွှေပြာဿဒ်ဖြင့် နေသည်။
(၄) ရှင်အက္ကောသာရမထေရ်သည် အရှေ့သမုဒ္ဒရာ၌ ရွှေပြာဿဒ် ဖြင့်နေသည်။
မထေရ် ၄ ပါးကို နေရာ ၄ မျိုးခွဲတမ်းချထားရာ မြန်မာပြည်သားတို့အတွက် ရှင်ဥပဂုတ်သာလျှင် ပူဇော်ခွင့်
ရနိုင်ကြ၏။
တောင်အရပ်၌သာ သမုဒ္ဒရာရှိသောကြောင့် ရှင်ဥပဂုတ်သာလျှင် မြန်မာပြည်သားတို့အတွက် တာစားသော ကိုယ်တော် ဖြစ်နေ၏။
သေလေးပါးစာရင်း၌ အောက်ပါမထေရ်တို့ ပါဝင်သည်။
(၁) ရှင်မဟာကဿပ သည် ဝေဘာရတောင် ကျောက်ဖြာထက်၌ရှိသည်။
(၂) ရှင်မဟာသံသာရ သည် ဥတ္တမတောင်၌ရှိသည်။
(၃) ရှင်ဥပေက္ခ သည် မကုလတောင်၌ရှိသည်။
(၄) ရှင်ဓမ္မသာရ သည် မကုလတောင်၌ရှိသည်။
မြန်မာနိုင်ငံမှ ပုဂ္ဂိုလ်တို့သည် ရှင်မဟာကဿပ အသေထွက်ရှိရာ အလောင်းတော် ကဿပကို အလေးထား၍ သွားရောက်လေ့ရှိကြသည်။
ရှင်မဟာကဿပ ပြဿနာကလည်း ရှုပ်ထွေးသည်။
ပုဂံခေတ် အရည်းကြီးဂိုဏ်းခေါင်းဆောင်
ရှင်မဟာကဿပသည် ထိုနေရာသို့ သွား၍ ပျံတော်မူသည်ဟု ဇတ်လမ်းလုပ်ထားကြသည်။
ဘုရားရှင်၏ သာဝကကြီးဖြစ်သော ပထမသံဂါယနာတင် ဦးဆောင် အရှင်မဟာကဿပကြီးသည်
ထိုနေရာသို့ လာရောက်၍ ပရိနိဗ္ဗာန် ပြုသည်ဟုလည်း ပြောကြသေးသည်။
အမှန်မူ အလောင်းတော် ကဿပဋ္ဌာနသည် အရည်းကြီးခေါင်းဆောင် ရှင်ကဿပ နှင့်လည်း မသက်ဆိုင်ပါ။
သံဂါယနာတင် အရှင်မဟာကဿပ၏ ပရိနိဗ္ဗာန် ပြုရာလည်း မဟုတ်။
ထိုရှင်မဟာကဿပကြီး ပရိနိဗ္ဗာန်ပြုရာ ဝေဘာရတောင်နှင့် အလားတူသော ပထဝီ အနေအထားကို ရှာ၍
အတုပြုလုပ်ကိုးကွယ်ခဲ့သော အလောင်းတော် ကဿပ အတုသာလျှင် ဖြစ်ပါသည်။
ဗုဒ္ဓစာပေ၌ လာသော ဖြစ်စဉ်တို့ကို ကြည့်၍ ပထဝီအနေအထားကို ရှာဖွေလျှက် ခြေတော်ရာ များကိုလည်း
ဤသို့ပင် ထုလုပ်ကိုးကွယ်ခဲ့ကြသည် မဟုတ်လော။
ချုပ်၍ဆိုရလျှင် ရှင်ဥပဂုတ်မထေရ်သည် ထေရဝါဒပိဋကတ်တော်လာ ပုဂ္ဂိုလ်မဟုတ်။ မဟာယာနဂိုဏ်းလာ
စာအုပ်ထဲက ကူးနုတ်ထားသော ထေရုပ္ပတ္တိသာ ဖြစ်သတည်း။
မှတ်ချက်။ ။ ရေစကြို အရှင်ဧသိက ရေးသားသော ထေရဝါဒ ဗုဒ္ဓဘာသာ ( ပြိုင်ပွဲဝင် ပထမဆုရ ) စာအုပ်မှ ကူးယူဖော်ပြပါသည်။