၂၀၁၁ မှာ စတိဗ်ဂျော့ဆုံးတော့ အက်ပဲ ရဲ့စီအီးအိုနေရာကို တမ်ကွတ် (Tim Cook) တက်လာတယ်။ အပေါ် ဆွယ်တာခေါင်းစွပ်နဲ့ အောက်ဂျင်းဘောင်းဘီဝတ်ပြီးစင်မြင့်ပေါ်ကိုတက်လာလေ့ရှိတဲ့၊ လူ့ဘုံခန်းဝါကို နှုတ်ဆက်ခဲ့ပြီဖြစ်တဲ့၊ ဒီနေ့လူသန်းရာနဲ့ထောင်နဲ့ချီပြီးသုံးနေတဲ့ အိုင်ဖုန်းတွေရဲ့ဖခင်ကို ဂုဏ်ပြုမှည့်ခေါ် ထားတဲ့၊ ကယ်လီဖိုးနီးယား ဆီလီကွန်ဂျိုင့်ဝှမ်းရဲ့မြို့တော် ကူပါတီနို (Cupertino) က စတိဗ်ဂျော့ခန်းမရဲ့ စင်မြင့်ပေါ်ကို ဒီအပတ်မှာ တမ်ကွတ် တက်လာတယ်။ အိုင်ဖုန်း အလဲဗင်း ကိုမိတ်ဆက်ဖို့ပါ။ အိုင်ဖုန်းတွေ အမျိုးမျိုးပြောင်းနေတာပဲဗျာ။ ဘာဆန်းလို့လဲလို့မေးရင် ဆန်းတယ်ရယ်တော့မဟုတ်ပါဘူး။ ဒါပေမယ့် အိုင်ဖုန်း၁၁ ရဲ့ချစ်ပ်ပြားဖြစ်တဲ့ A13 bionic processor ကိုထုတ်တာ ထိုင်ဝမ်ကုမဏီပါ။ TSMC လို့အတိုခေါ်တဲ့ ထိုင်ဝမ်ဆီမီးကွန်ဒတ်တာ ထုတ်လုပ်ရေးကုမဏီ (Tiawan Semiconductor Manufacturing Company) ကထုတ်လိုက်တာ။ အင်တဲ (Intel) လိုင်းပေါ့၊ ရွှေပြည်ကြီးမှာ ၈၈ အရေးအခင်းမဖြစ်ခင်တနှစ်အလို ၁၉၈၇မှာ ခုကမ္ဘာမှာအကြီးဆုံး ကန်ထရိုက်လုပ်ပြီး ချစ်ပ်ပြားတွေထုတ်မယ့် ထိုင်ဝမ်ကုမဏီကို စတည်ထောင်တယ်။ အိုင်ဖုန်းကစလို့ ဒစ်ဂျစ်တယ်မန်းနီးဆိုတဲ့ နာမည်ကျော်ဘစ်ကွိုင်မိုင်းကွင်း (ရွှေတူးသလို မိုင်းတွင်းတွေ လုပ်ထားတာ) တွေအထိ ချစ်ပ်ပြားတွေထုတ်နေရတဲ့ ထိုင်ဝမ်ကုမဏီဟာလျှော့တွက်လို့ မရတဲ့အထဲမှာ ပါတယ်။ ဆီမီးကွန်ဒတ်တာလုပ်ငန်းရဲ့ နာနိုနည်းပညာတချို့ကို စတင်မိတ်ဆက်ပေးတဲ့ကုမဏီဖြစ်လို့ပါပဲ။ ဆီမီးကွန်ဒတ်တာလုပ်ငန်းဆိုတာ ကနေ့သတင်းနည်းပညာခေတ်ရဲ့ အခြေခံပင်မနည်းပညာပါပဲ။ လူတွေသည်းခြေကြိုက်ဖြစ်တဲ့ မိုဘိုင်းဖုန်းတွေ၊ မော်တော်ကားတွေ၊ ကွန်ပြူတာတွေကစလို့ အာကသယဉ်တွေ အထိ မရှိမဖြစ်အသုံးပြုနေရလို့ဖြစ်တယ်။
ကွန်ပြူတာလုပ်ငန်းတွေရဲ့အစမှာ မိုးရဲ့ဥပဒေသ (Moore’s law) ဆိုတာပေါ်လာတယ်။ အလွယ်ပြောရရင် ၁၈လလောက်နေရင်တခါ ကွန်ပြူတာရဲ့မြန်နှုန်းက၂ဆတက်လာမယ်ဆိုတာပါ။ အဲသလိုမြန်လာရတာက ကွန်ပြူတာထဲမှာထိုင်ထားတဲ့ချစ်ပ်ပြားတွေပေါ်မှာပါတဲ့ ထရန်စစ်စတာ (transistor) တွေကိုသေးအောင်လုပ်ပြီး ၂ဆလောက်ပိုထဲ့နိုင်လို့ပါ။ ခုထရန်စစ်စတာအရွယ်တွေကထပ်သေးဖို့ခက်သွားသလို ချစ်ပ်ပေါ်မှာ ဒီထက် လည်းကပ်ညပ်ပြီးထဲ့လို့ မလွယ်တော့ဘူး။ ချုပ်ပြောရရင် အင်တဲရဲ့ ပူးတွဲတည်ထောင်သူ ဂေါ်ဒွန်မိုး ရဲ့ ၁၉၆၅ခုနှစ်ကပေါ်လာတဲ့ဥပဒေသဟာ ၂၀၂၀လောက်မှာမှန်ဖို့မလွယ်တော့ဘူး။ တနည်းပြောရင် ကွန်ပြူတာတွေဒီထက်ပိုမြန်ဖို့ ချစ်ပ်ပြားတွေရဲ့လုပ်နိုင်စွမ်းဟာ အကန့်အသတ်ရှိလာပြီဖြစ်တယ်။ ချုပ်ပြောရရင် ဒါဟာ ကွန်ပြူတာတွေမြန်ဖို့ အခြားနည်းပညာတွေ (ဆော့ဖ်ဝဲ၊ အေအိုင်နဲ့ cloud computing၊ IoT – Internet of Things စသည်ဖြင့်) အခြားအပလီကေးရှင်းတွေကို မှီခိုလာရဖို့ဖြစ်လာတယ်။ ဒါဟာ ချစ်ပ်ထုတ်သူတွေအနေနဲ့ကြည့်ရင် သူတို့လုပ်ငန်းပေါ်စိန်ခေါ်ချက်တွေဖြစ်လာတယ်။
ထိုင်ဝမ်ကုမဏီဟာ ၁၉၈၀ပြည့်တွေမှာစခဲ့တယ်ဆိုပေမယ့် ၁၉၇၄မှာ သဘောတရားအရစသန္ဓေတည်ခဲ့တယ်။ ဘာဖြစ်လို့ ၁၉၇၄ မှာစခဲ့ရသလဲဆိုတော့ ကမ္ဘာ့နိုင်ငံရေးနဲ့စီးပွားရေးမှာ ၁၉၇၃လို့ပြောရင်ထူးခြားမှုက ရေနံဈေးကွက်အပျက်ပါ။ လုပ်အားကိုအားပြုလုပ်တဲ့လုပ်ငန်းတွေ (Labor intensive industry) နေရာမှာ သိပ္ပံနဲ့နည်းပညာအားပြုတဲ့လုပ်ငန်းတွေလုပ်ဖို့ ထိုင်ဝမ်အစိုးရကဆုံးဖြတ်ခဲ့တယ်။ စက်မှုနည်းပညာသုတေသန အင်စတီကျူ့တခုကိုတည်ထောင်တယ်။ ယူအက်စ်နဲ့စာချုပ်ပြီးလုပ်ငန်းခွင်လေ့လာသူတွေလွှတ်တယ်။ ပညာသင်တယ်။ ၁၉၈၀မှာထိုင်ဝမ်ရဲ့ ပထမဆုံးဆီမီးကွန်ဒတ်တာကုမဏီဖြစ်တဲ့ UMC (United Microelectronic Company) ကိုတည်ထောင်တယ်။ လိုရင်းကိုသွားရရင် ခုကုန်သွယ်စစ်ဖြစ်တော့ တရုတ်က သူဝယ်နေကျချစ်ပ်ပြားတွေအလွယ်ဝယ်လို့မရတော့ဘူး။ ဥပမာ တရုတ်မှာ ဟွာဝေးပြီးရင် ဒုတိယအကြီးဆုံး ဖြစ်တဲ့ အိုပို (Oppo) ဟာအမေရိကန်ကုမဏီ ကဲလ်ကွမ်း - Qualcomm ကနေ ချစ်ပ်ပြားတွေကို အလွယ်ဝယ် လို့ မရတော့ဘူး၊ ဒီတော့ သူ့ဘာသူလုံလောက်အောင်ထုတ်မယ်လို့ဆုံးဖြတ်လိုက်တယ်။ အဲဒီဆုံးဖြတ်ချက်က ကဲကွမ်းအပြင် သူဝယ်နေကျ ထိုင်ဝမ်ကုမဏီတွေဆီမှာပါ အရင်လိုမ၀ယ်တော့ဘူးဆိုတဲ့သဘောပဲ။ ဟောင်ကောင်ဆန္ဒပြမှုနဲ့ ထိုင်ဝမ်ရပ်တည်မှုတွေအရ ပြည်မကြီးဟာ ဒီပစ္စည်းတွေကို ထိုင်ဝမ်ဆီကပါ နောင်မှာ ၀ယ်ချင်မှဝယ်တော့မယ်။ ဒါက မိုးဥပဒေသက်ရောက်မှုအပြင် ကုန်သွယ်စစ်ရိုက်ခတ်ချက်က ထိုင်ဝမ်ချစ်ပ် ထုတ်တဲ့ ကုမဏီတွေဆီကိုရောက်လာတဲ့သဘောပဲ။ ပြောရရင် ဒီဈေးကွက်က ဂျပန်၊ တောင်ကိုရီးယားနဲ့ ထိုင်ဝမ် တက်မလာခင်အထိ အမေရိကန်တနိုင်ငံထဲထိမ်းချုပ်ထားတဲ့ဈေးကွက်ပါ။ ဆိုတော့ တရုတ်သည် ပင်လျှင် ချစ်ပ်ပြားထုတ်တဲ့လုပ်ငန်းမှာ အမေရိကန်ကိုမပြောနဲ့ ထိုင်ဝမ်နောက်မှာနည်းပညာအရ ၅နှစ်ကနေ ၁၀နှစ်လောက်နောက်ကျကျန်နေခဲ့တဲ့သဘောဖြစ်တယ်။ တရုတ်ဟာ အမာထည် (Hardware လက်နဲ့ ကိုင်တွယ်ထိတွေ့လို့ရတဲ့ပစ္စည်း) ထုတ်လုပ်မှုတိုင်းအားလုံးနီးပါးလောက် အမေရိကန်ကို မယှဉ်နိုင်သေးဘူး ဆိုတဲ့သဘောပါ။ အနှစ်ချုပ်တော့ ချစ်ပ်ထုတ်လုပ်မှုကို နှောင့်နှေးခဲ့တဲ့အကျိုးဆက်ကို တရုတ်တွေအခု ခံစား နေရတယ်။
ဟောင်ကောင်ပြဿနာဖြစ်တော့ တရုတ်ပြည်မကြီးကစဉ်းစားတဲ့အချက်တချက်မှာ ဟောင်ကောင်ရဲ့ အာရှဘဏ္ဍာရေးစင်တာ (Asian Financial Hub) နေရာကို ရှင်ဇန်း (Shenzhen) နဲ့အစားထိုးဖို့ဖြစ်တယ်။ ရှင်ဇန်းဟာ ဂွမ်ဒေါင်းပြည်နယ်ထဲကစီးတီးတခုဖြစ်ပြီး တရုတ်မှာအလျှင်အမြန်ဆုံးတိုးတက် ဖွံ့ဖြိုးလာတဲ့ နည်းပညာဗဟိုပြုမြို့တမြို့လည်းဖြစ်တယ်။ ပင်လယ်ထွက်ပေါက်လည်းရှိပြီး တရုတ်နဂါးပတ်လမ်း (OBOR) ချိတ်ဆက်လမ်းကြောင်းထဲမှာ ဟောင်ကောင်အစားထဲ့သွင်းအသုံးချဖို့မကြာခနစဉ်းစားခံရတဲ့မြို့ဖြစ်တယ်။ (ဟောင်ကောင်ကိုဆိပ်ကမ်းမြို့ထားတဲ့အခါ စီးပွားရေး၊ လုပ်ထုံးလုပ်နည်း ဥပဒေအစရှိတာတွေမှာ တခြားနိုင်ငံ တွေနဲ့ကုန်သွယ်မှုလမ်းကြောင်းကိုမြန်ဆန်စေနိုင်ပေမယ့် အဓိကပြဿနာက ကုန်ကျစရိတ်ကြီးမြင့်မှု ဖြစ်တယ်)။ ရှင်းဇန်းဟာနည်းပညာမြို့တော်လည်းဖြစ်တယ်။ နာမည်ကျော်ဟွာဝေးရဲ့ ရုံးချုပ်ရှိတဲ့မြို့ပေါ့။ အမေရိကန်နောက်မှာ လုံခြုံရေးအကြောင်းပြချက်နဲ့ သြစတေးလျကပါ ဟွာဝေးကို 5G နဲ့ပါတ်သက်တဲ့ ပစ္စည်းတွေမထောက်ပံ့ဖို့ဆုံးဖြတ်တယ်။ ဟွာဝေးဈေးကွက် ၃၀%လောက်ရှိတဲ့ ဥရောပကလည်း ဟွာဝေး မိုဘိုင်းကို သုံးမယ်ပိတ်မယ်မဆုံးဖြတ်ရသေးဘူး။
ဒီလိုအခြေအနေမှာ ဟွာဝေးရဲ့အမှုဆောင်အရာရှိချုပ်ဖြစ်တဲ့ ရင်ဇန်ဖီ (Ren Zhengfei) က ဟွာဝေးရဲ့ 5G နည်းပညာကို ဘယ်အနောက်နိုင်ငံကုမဏီကိုမဆိုဝေမျှမယ်၊ ရောင်းချပေးမယ်ဆိုပြီး စက်တင်ဘာ ၁၀ရက်နေ့က ထုတ်ပြောလိုက်တယ်။ ၀ယ်ယူသူဟာ နည်းပညာရဲ့မူရင်းကုဒ် (Source Code) ကိုပြောင်းလဲခွင့် ရှိတယ်ဆိုတာပါတဆက်တည်းပြောတယ်။ ဆိုလိုတာက ၀ယ်တဲ့ကုမဏီဟာ ဟွာဝေးနည်းပညာကို သူ့သဘောနဲ့သူ ဆက်လက်ချဲ့ထွင်ခွင့်ရသွားတယ်။ ဟွာဝေးရဲ့မူရင်းနည်းပညာကိုပြင်ဆင်တာမို့ ဟွာဝေးကိုယ်တိုင်သည်ပင် ၀ယ်တဲ့ကုမဏီရဲ့နောက်ပိုင်းနည်းပညာနဲ့ ဆက်စပ်ထုတ်လုပ်မှုတွေကိုအလုံးစုံ နားလည်ဖို့မဖြစ်နိုင်တော့တဲ့သဘောပါ။ ဒီတော့အမေရိကန်တွေစွပ်စွဲခဲ့သလို ဟွာဝေးဖုန်းတွေကိုသုံးရင် ဖုန်းတွေကနေ တရုတ်ထောက်လှမ်းရေးဆီသတင်းအချက်အလက်တွေပေးပို့နေမယ်ဆိုတာကိုလည်း ချေဖျက် ပေးလိုက်တာဖြစ်တယ်။ တဖက်မှာကြည့်ရင် လတ်တလောအချိန်မှာ အမေရိကန်အစိုးရရဲ့ပိတ်ဆို့မှုကြောင့် ဟွာဝေးဟာ ဂိုဂယ်ရဲ့နက်ဝပ်နဲ့ဆားဗစ်တွေကို အသုံးပြုခွင့်မရှိဘူး။ အထွေထွေအခြေအနေတွေကိုကြည့်ပြီး ဟွာဝေးဟာ သူ့ရပ်တည်နိုင်စွမ်းကိုပြန်လည်တဲ့မတ်ဖို့ ခုလိုကမ်းလှမ်းလိုက်တာဟာ အမြော်အမြင်ရှိရာရောက် တယ်ဆိုပေမယ့် ဘယ်သူကမှ ဒီကမ်းလှမ်းချက်ကိုမတုန့်ပြန်သေးဘူး။ အခြားတဘက်မှာ ဟောင်ကောင် စတော့အိတ်ချိန်းက လန်ဒန်စတော့အိတ်ချိန်းကိုဝယ်ဖို့ကမ်းလှမ်းမှု ငြင်းဆိုခံရတာ နဲ့ ဟောင်ကောင်စီးပွားရေး စင်တာကရင်းနှီးမြုပ်နှံသူတွေက စင်ကာပူကိုလှမ်းမျှော်ကြည့်မှုဟာပိုလို့ထင်ရှားလာတယ်။
ပြီးခဲ့တဲ့အပတ်ကပြောသလို တရုတ်အမေရိကန်ကိုအသာစီးရနေတာ 5G နည်းပညာနဲ့ အင်တာနက် မိုဘိုင်းဖုန်း သုံးစွဲမှုတွေမှာပါ။ အင်တာနက်နဲ့ဖုန်းသုံးစွဲမှုဟာ လူဦးရေးအရဖြစ်လို့မို့ တရုတ်ကိုအမေရိကန်ကအသာစီးရဖို့ မဖြစ်နိုင်ဘူး။ ခု 5G နည်းပညာကိုတရုတ်ကပြန်ပြီးမျှမယ်ဆိုတာအပြင် ထရမ့်က တရုတ်ကိုကောက်မယ့်အခွန် ဘီလီယံ ၂၅၀ဖိုးကို ၂၅%ကနေ ၃၀%ကိုတိုးဖို့ ၂ပတ်ဆိုင်းငံ့ထားတယ်။ တရုတ်တွေကဒါကို ကြိုဆိုတဲ့အနေနဲ့ အမေရိကန်ကုန်တချို့ကိုဝယ်ဖို့ထုတ်ပြန်လိုက်တယ်။ အဓိကစိုက်ပျိုးေ၇းကုန်တွေ၊ ပဲပိစပ် (၀က်စာ) နဲ့ ၀က်တွေပါပဲ။ ခုစာရေးနေချိန် တရုတ်ဗီဇာကျသွားတဲ့ဝက်တွေဟာ အမေရိကန်ဆိပ်ကမ်းတွေမှာ ၀တ်ကောင်း စားလှတွေနဲ့ ဖြစ်ကြရော့မယ်။ အောက်တိုဘာ ၁ရက်နေ့ဟာ တရုတ်ပြည်သူ့သမ္မတနိုင်ငံ တည်ထောင်မှု နှစ်၇၀ပြည့်ပွဲရှိလို့ ဒီရက်ကိုအသိအမှတ်ပြုတဲ့အနေနဲ့ ထပ်တိုးမယ့် အခွန်အခတွေကို အောက်တိုဘာ ၁၅ရက် အထိပြောင်းပေးထားတယ်လို့ စိတ်ကောင်းနှလုံးကောင်းရှိသူ အမေရိကန်သမ္မတကြီးထရမ့်ကပြောတယ်။ အောက်တိုဘာအစောပိုင်းမှာ ထရမ်ရဲ့ ကုန်သွယ်ရေးကိုယ်စားလှယ်၊ ဘဏ္ဍာရေးဝန်ကြီးနဲ့ တရုတ်ကုန်သွယ်စစ် စေ့စပ်ရေး ခေါင်းဆောင် ဒုဝန်ကြီးချုပ်တို့တွေ့ကြပါလိမ့်မယ်။ ဆွေးနွေးပွဲပြေလည်သွားရင် အောက်တိုဘာ အခွန်အခတွေကြေအေးမယ့်အပြင် စက်တင်ဘာ၁ရက်နေ့ကတင်ထားတဲ့ အခွန်အခတွေ ကိုလည်း ပြန်ပြီးချေဖျက်ပေးပါလိမ့်မယ်။ အဲသလိုသာဖြစ်လာခဲ့ရင် ပထမဦးဆုံးအကြိမ်အမေရိကန်ဟာ သူတင်ခဲ့တဲ့ အခွန်အတုတ်ကို ပြန်ဖြေလျော့ပေးတဲ့သဘောပေါ့။
အပြောင်းအလဲကိုစီမံခန့်ခွဲတဲ့သဘောတရားမှာဂရပ်တခုရှိတယ်။ ပြောင်းလဲမှုတခုအစဟာ မျှော်လင့်ချက်တွေ ရှိနေတတ်တယ်။ ဂရပ်မျဉ်းဟာ ရေညီမျဉ်းစထွက်တဲ့နေရာကနေအပေါ်ကိုမျဉ်းကွေးတခုအဖြစ်တက်လာတယ်။ တချိန်မှာ မျှော်လင့်ချက်တွေဟာ ပြောင်းလဲမှုရဲ့မမြင်သာတဲ့အခက်အခဲတွေနဲ့ထိတွေ့ပြီး ပြန်ကျလာတယ်။ အဲသည်အကျခရီးနဲနဲအရှိန်ရလာရင် သီအိုရီကအဲသည်အချိန်ကို လက်တွေ့မြေပြင်အနေအထားတွေကို သိမြင်ချိန် (Realization Phase) လို့သုံးတယ်။ အဆင်းခရီးဟာ ရေညီမျဉ်းကိုကျော်ဆင်းပြီးမှပြန်တက်လာ တတ်တဲ့သဘာဝရှိတယ်။ သိပ်အကျကြီးဖြစ်မသွားချင်ရင် အလှည့်အပြောင်းတွေလုပ်ကြရတယ်။ ကုန်သွယ်စစ် ဟာ ခုချိန်မှာ မြေပြင်အနေအထားတွေကိုစတင်နားလည်ချိန်လို့ ကျနော်ယူဆတယ်။ ဆိုလိုတာက ၂နိုင်ငံစလုံး ဟာ စစ်သက်ရောက်မှုရဲ့ တကယ့်ပကတိ ဖြစ်နိုင်ခြေကို မျှော်လင့်ချက်တွေကိုကျော်ပြီး နားလည်စပြုလာတဲ့ သဘောဖြစ်တယ်။ ဟွာဝေးရဲ့ 5G နည်းပညာဟာ တကိုယ်တည်းခရီးမဆက်နိုင်သလို ကုန်သွယ်စစ် နဲ့ ဟောင်ကောင်အကျပ်အတည်ကြောင့်မို့တရုတ်ပြည်ပကြီး နဲ့ ဟောင်ကောင်အရင်းတွေဟာ နေရာသစ်ကို ရှာဖွေနေကြပြီ။ အရင်းစနစ်ရှင်သန်ဖို့ဆိုတာ အရင်းကိုရှင်အောင်လုပ်ထားရတာပဲမဟုတ်လား။
အခြေအနေတခုလုံးကို ယောက်ယက်ခတ်စေတဲ့ နည်းပညာမှာပြေလည်သွားခဲ့ရင် ရေပြင်ပေါ်တက်လာတဲ့ ရေပွက်နဲ့ဂယက်တွေဟာ ထိုင်သင့်သလောက်ငြိမ်သက်သွားမှာဖြစ်တယ်။ ကုန်သွယ်စစ်ပထမဆုံးအကြိမ် အဖြစ် အမေရိကန်နဲ့တရုတ်ဟာ အောက်တိုဘာဆွေးနွေးပွဲရလဒ်ကို စတင်လိုက်နာကြပါလိမ့်မယ်။ မဟုတ်ရင် ၂၀၂၀ ဟာ စီးပွားရေးနှေးကွေးမှု (Recession) ထဲ တကမ္ဘာလုံးအတိုင်းအတာနဲ့ သေချာပေါက်ကျဆင်းသွား မှာပါ။ ၂၀၁၉ ပထမ၆လ ကမ္ဘာ့ဂျီဒီပီဟာ ၀.၈% ကျသွားတယ်လို့ထုတ်ပြန်ထားတယ်။ နောက်၆လလည်း ထို့အတူဖြစ်လာနိုင်ပေမယ့် အောက်တိုဘာအဆင်ပြေရင်အဆိုးကြီးမဖြစ်နိုင်ဘူးမျှော်လင့်ရတယ်။ တောမီးတွေငြိမ်းရင်တောပန်းလေးတွေရဲ့ ရနံ့ကို လေပြေကသယ်ဆောင်လာမယ်။ မီးခိုးငွေ့တချို့နဲ့အတူပေါ့။
ကျော်ဇောခိုင်
၁၅ စက်တင်ဘာ ၂၀၁၉
No comments:
Post a Comment