ကျနော်ရေးထားတဲ့ Power of One essay ထဲမှာပါတဲ့တစ်ကြောင်းက "ကျနော်ငယ်ငယ်က မိုးမွှန်အောင်ဆဲခဲ့ဖူးတယ်" တဲ့။ အဲ့ဒါကိုပြောပြရင်တော်တော်များများကမယုံကြဘူး။ ဒါပေမယ့် တကယ်ပါ။
ဘယ်လောက်ထိလဲဆိုရင် မြန်မာပြည်ကို Rap music မရောက်ခင်ဟိုးအစောကြီးမှာကတည်းက Rap Battle တွေလိုပဲ အဆဲ Battle တွေ ကျနော်တို့ရပ်ကွက်မှာရှိခဲ့တယ်။ ဘယ်သူပိုဆဲနိုင်လဲဆိုတာပြိုင်ကြတာ။ တော်တော်ကို ကြံကြံဖန်ဖန် အယုတ်တကာ့အယုတ်ဆုံး အကြမ်းတကာ့အကြမ်းဆုံးတွေကိုတွေးတောကြံဆပြီး ပက်ပက်စက်စက် ဆဲကြရတယ်။ တော်တော်လဲ creative ဖြစ်ကြတယ်။ အဖေတွေ အမေတွေ မောင်တွေနှမတွေ ရှိသမျှအမျိုးတွေ တိရိစ္ဆာန်တွေ အကုန်ပါတယ်။ All inclusive ပေါ့လေ။ တဖက်ကဘာမှပြန်မဆဲနိုင်လောက်အောင် ပါးစပ်အဟောင်းသားဖြစ်သွားတာတို့ ရယ်ချလိုက်တာတို့ဖြစ်သွားရင် နိုင်ပြီ။ အခု FB မှာဆဲကြတယ်ဆိုတာတွေက မူလတန်းအဆင့်လောက်ပါ။ အဲ့လောက်ထိ ဆိုးခဲ့ကြပါတယ်။
ပြန်တွေးပြီးအဖြေရှာကြည့်တယ်။ ငါဘာလို့ဒီလောက်တောင် အရှက်မဲ့ခဲ့ရသလဲပေါ့။
အဓိကအဖြေကတော့ အပေါင်းအသင်းပါပဲ။ ကျနော်တို့က မောင်နှမနှစ်ယောက်ဆိုပေမယ့် အသက်ကွာတော့ တစ်ယောက်နဲ့တစ်ယောက်အဖော်မဖြစ်ခဲ့ကြဘူး။ ဆိုတော့ ကျနော်အပေါင်းအသင်းမက်ခဲ့တယ်။ အပေါင်းအသင်းမက်တော့ Peer Pressure လို့ခေါ်တဲ့ အဖွဲ့ထဲဝင်ဆံ့ဖို့အတွက် ပေါင်းဘက်တွေကိုယ့်ကိုကြိုက်နှစ်သက်ဖို့အတွက် ကိုယ့်ကိုယ်ကိုပေးတဲ့ pressure ရှိခဲ့တယ်။ ကျနော်တို့အဖွဲ့မှာ ဆဲတဲ့ယဉ်ကျေးမှုလေးရှိတော့ ပါသွားတယ်ပေါ့ဗျာ။ အဲ့ဒီ့အကျင့်ဘယ်လိုပျောက်သွားလဲဆိုတဲ့အကြောင်းကတော်တော်လေးစိတ်ဝင်စားဖို့ကောင်းတယ်။ အခုထိလဲတွေးတိုင်း ကိုယ်တိုင်အံ့သြနေတုန်း။ ကိုယ့်ကိုယ်ကိုလည်းကျေးဇူးတင်မိတယ်။
ကျနော်တို့က မန္တလေးမှာစားသောက်ဆိုင်ဖွင့်ခဲ့တယ်။ အပတ်တိုင်းကျနော်တို့ဆီကို ဘုန်းကြီးတစ်ပါးရဲ့ ကပ္ပိယကဆွမ်းချိုင့်နဲ့လာပြီး ဆွမ်းခံတယ်။ သာမှန်အားဖြင့်သူနဲ့မဆုံဖြစ်ဘူး။ ဘာလို့လဲဆိုတော့သူလာတဲ့အချိန်ကစောတယ်။ ၆-၆:၃၀ လောက်။ ကျနော်က ၇:၀၀ ကျော်မှနိုးနေကျ။ ဒါပေမယ့် ဖြစ်ချင်တော့တစ်ရက်မှာ ကျနော်အစောကြီးနိုးပြီး ပျင်းနေတော့ ဆွမ်းချိုင့်စောင့်နေတဲ့ ကပ္ပိယနဲ့ ဇယ်တောက်ဖြစ်သွားတယ်။
ကပ္ပိယကဇယ်တောက်တာအသင့်အတင့်ကျွမ်းတယ်။ ကျနော်က အဲ့ဒီ့မနက်ကလုံးဝလက်မကောင်းတော့ အကုန်လွဲ။ ဒေါသတွေ တစ်လိပ်လိပ်ထွက်လာပြီး စဆဲတယ်။ လွဲတိုင်းဆဲ။ တစ်ပွဲလုံးဆဲ။ ၁၀နှစ် ၁၁နှစ်သားလောက်ပဲရှိဦးမယ်။
ကပ္ပိယကတော့ဘာမှမပြောပါဘူး။ ပွဲပြီးတော့ဆွမ်းချိုင့်ရတာနဲ့ထထွက်သွားတယ်။ သူလည်းနားမခံနိုင်တာနဲ့အတော်လောက်ဖြစ်သွားတယ်ထင်ပါရဲ့။ (ပွဲပြီးသွားတာကိုပဲ သူတော်တော်ဝမ်းသာနေမှာ) ကျနော် ဇယ်တောက်ခုံမှာထိုင်ပြီးကျန်ခဲ့တယ်။ ချက်ခြင်းမထပဲတွေးနေမိတယ်။ ရှက်တဲ့စိတ်ကြီးကဖုန်းလွှမ်းထားတယ်။ ဇယ်တောက်တာရှူံးလို့မဟုတ်ဘူး။ ကိုယ်ဆဲသမျှအကုန်လုံးပြန်ကြားမိပြီး ကိုယ့်ကိုယ်ကိုရှက်တာ။ အဲ့ဒီ့ ဇယ်တောက်ခုံကထလိုက်တဲ့အချိန်ကနေစပြီး ကျနော်အခုထိမဆဲတတ်တော့ဘူး။ ဆဲလို့လဲမရတော့ဘူး။
Self-realization ရဲ့တန်ခိုးကဘာနဲ့မှမတူဘူး။ လျှပ်တပြက်အတွင်းမှာဖြစ်သွားနိုင်သလို ကမ္ဘာတစ်သိန်းလောက်လဲကြာသွားနိုင်တယ်။
Zenn Kyi (ဇဏ်ခီ)
No comments:
Post a Comment