(၁)
ဆေးခန်းကဝန်ထမ်းကောင်မလေးရဲ့အမေ တလောကဆုံးသွားရှာတယ်။ ဧရာဝတီတိုင်းဘက်က ရွာလေးတစ်ရွာမှာနေတာ။ အသက် ၅၀ မာမာချာချာကြီး၊ နေ့တိုင်းလယ်ထဲကိုင်းထဲဆင်းအလုပ်လုပ်နေကျ။ ကိုယ်လက်တွေကိုက်လို့ဆိုပြီး စပ်ဆေးတွေဝယ်သောက်တာ ဆေးကသောက်လိုက်တာနဲ့ချက်ချင်းသက်သာတယ်တဲ့။ မနက်တစ်ထုပ်၊ ညတစ်ထုပ် နေ့တိုင်းသောက်တယ်။ ခြောက်လလောက်ကြာတော့ တရှောင်ရှောင်ဖြစ်လာလို့မြို့တက်ဆေးရုံပြတော့ သွေးတိုး၊ ဆီးချို၊ ကျောက်ကပ် အစုံဖြစ်နေပြီ။ မမီတော့ဘူး။ ဆုံးသွားရှာတယ်။
"အဲ့ဒီစပ်ဆေးတွေအန္တရာယ်ကို နင်မသိဘူးလားဟယ်"လို့ သူ့ကိုငေါက်မိတယ်။
"သမီးကိုလည်း ဘာမှမပြောဘူး။ ဆေးရုံတက်မှသိရတာ"တဲ့။ ဪ ပညာမတတ်၊ အသိဉာဏ်ချို့တဲ့ခြင်းရဲ့နောက်ဆက်တွဲပြဿနာတွေ။
(၂)
ဆေးခန်းလာပြတဲ့လူနာတစ်ယောက်။ အသက် ၅၀ကျော်၊ အထက်တန်းပြဆရာမ။
"မျက်နှာကြီးကဖောသွပ်သွပ်ဖြစ်နေတာတစ်လလောက်ရှိပြီ"တဲ့။ တန်းမေးလိုက်တယ်။
"စပ်ဆေးတွေသောက်နေလား"ဆိုတော့ အူလည်ချာလည်ပြန်ကြည့်တယ်။ "အင်း"တဲ့။
"အဲ့ဒီဆေးတွေ ခုပါလား၊ ပြ" ဆိုတော့ထုတ်ပြတယ်။ ထင်တဲ့အတိုင်းပဲလေ။
"သောက်တာဘယ်လောက်ကြာပြီလဲ"ဆိုတော့ "နှစ်လရှိပြီ"တဲ့။
"ဆရာမရယ် စပ်ဆေးတွေက ဒီလောက်အန္တရာယ်များတာမသိဘူးလားဗျာ"ဆိုတော့
"ဆေးကကောင်းပါတယ်။ အကိုက်အခဲတွေသက်သာတယ်။ ခုလာပြတာက မျက်နှာဖောသွပ်သွပ်ဖြစ်နေလို့လာပြတာ"ဆိုပဲ။
ဪ ရန်ကုန်မြို့လည်ခေါင်က ခေတ်ပညာတတ်တစ်ယောက်ကတောင် ဒီလိုပြန်ဖြေတာ။
(၃)
နောက်လူနာတစ်ယောက်ကတော့ နယ်ကအလုပ်လာလုပ်တဲ့အမျိုးသားတစ်ယောက်။ ပညာတော့သိပ်မတတ်ဘူး။ အလူမီနီယမ်လုပ်တယ်။ စကားပြောလည်လည်ဝယ်ဝယ်ရှိတယ်။
"ကျနော်ကိုယ်လက်တွေကိုက်တယ်ပြောလို့ နယ်ကညီမကလှမ်းပို့ပေးတာဆရာ၊ ကြည့်ရတာအင်္ဂလိပ်ဆေးတွေပဲ၊ မသင်္ကာလို့ဆရာ့ကိုလာပြတာ" တဲ့။
ဆေးထုပ်လေးမှာ မြန်မာလိုအကိုက်အခဲပျောက် ဘာညာသာရကာဆိုပြီးနံမည်တပ်ထားတယ်။ ဆေးတစ်ထုပ်မှာ ဆေးလုံးလေးခြောက်လုံးပါတယ်။ သေချာကြည့်တော့ ထင်တဲ့အတိုင်းပဲ။ အကိုက်အခဲပျောက်ဆေးကိုသုံးမျိုး၊ စတီးရွိုက်ကနှစ်မျိုး၊ အပေါစားအားဆေးလေးကတစ်တောင့်။
"ခင်ဗျားသောက်လိုက်သေးလား"ဆိုတော့
"မသောက်ရဲလို့ဆရာ့လာပြတာ"တဲ့။
ကဲ အသက်ဉာဏ်စောင့်၊ ဥစ္စာကံစောင့်တဲ့။ ဉာဏ်ဆိုတာ အတန်းပညာတွေအများကြီးတတ်တဲ့ဉာဏ်ပညာကိုပြောတာမဟုတ်ဘူး။ ခုလိုမျိုး ဖြစ်နိုင်၏၊ မဖြစ်နိုင်၏ကို နည်းနည်းလေးတွေးတောဆင်ခြင်တတ်တဲ့ဉာဏ်ကိုပြောတာ။
(၄)
အမှန်အတိုင်းပြောရရင် လွန်ခဲ့တဲ့ဆယ်နှစ်၊ ကျနော်တို့ဆေးခန်းနဲ့ဆေးဆိုင်လေးစဖွင့်ဖွင့်ချင်းတုန်းက စပ်ဆေးရောင်းခဲ့ဖူးတယ်။ ဒါပေမယ့် ကလေးမလေးတွေကိုသေသေချာချာမှာထားတယ်။ စတီးရွိုက်ဆေး၊ ပိုးသတ်ဆေး၊ သွေးကျဆေး၊ ဆီးချိုကျဆေးတွေ လုံးဝမသုံးရဘူး။ ဖြစ်တဲ့ရောဂါနဲ့ တွဲရမယ့်ဆေးစာရင်းကို သေသေချာချာရေးမှတ်ပြီးကပ်ထားခိုင်းတယ်။
ဆေးတွဲကလည်း များများစားစားလည်းမရှိပါဘူး။ ကိုက်ခဲဖျားနာ၊ ချောင်းဆိုးနှာစေး၊ ဗိုက်အောင့်ဗိုက်နာ၊ ဝမ်းပျက်ဝမ်းလျှော စတဲ့လေးငါးမျိုးလောက်ပါပဲ။ အဲ့ဒါထက်ကျော်ပြီးလုံးဝမစပ်ပေးရဘူး။ တခြားရောဂါလက္ခဏာဆို ဆရာဝန်နဲ့ဝင်ပြခိုင်းတယ်။ လုံးဝလုံးဝကို သံမဏိစည်းမျဉ်းထုတ်ထားတယ်။
ဒါပေမယ့်မရဘူး။ အပြင်ကနေ နမူနာလာပြတဲ့ဆေးတွဲလေးတွေကို အတုယူပြီးစပ်ရောင်းကြတယ်။ တကယ်က သူတို့ပိုက်ဆံရတာလည်းမဟုတ်ဘူး။ ပြောရရင် လက်ယားတာပေါ့။ ဆေးကလည်းအဆင်သင့်ရှိနေတယ်။ စပ်ပေးလိုက်ရင်လည်း ကျေးဇူးအတင်ခံရမယ်ဆိုတော့ စပ်ရောင်းကြတာပေါ့။
အဲ့ဒီကိစ္စကျနော်သိတော့ အကြီးအကျယ်ဆူပူသောင်းကျန်းပါတော့တယ်။ အဲ့ဒီနောက်ပိုင်း ဆိုင်မှာလုံးဝစပ်ဆေးမရောင်းခိုင်းတော့ဘူး။ တကယ်ရောင်းဖြစ်ခဲ့တာလည်း လေးငါးလလောက်ပဲကြာခဲ့ပါတယ်။
ခုဆို ဆေးခန်းကကောင်မလေးတွေက ကျနော်တို့ကနေလူနာတွေကိုညွှန်ပေးရေးပေးလိုက်တဲ့ဆေးတွေ အလွတ်ကိုရနေပြီ။ ဘယ်ဆေးက ဘာအာနိသင်ရှိတယ်။ အန္တရာယ်ဘယ်လောက်ရှိတယ်ဆိုတာလည်း ကောင်းကောင်းသိနေကြပြီ။ ဒါပေမယ့် စပ်ဆေးဆိုရင်တော့ နိုးပါ။ ကျနော့် ဆေးခန်း၊ ဆေးဆိုင်မှာ စပ်ဆေးလုံးဝမရောင်းပါ။ ရောဂါသက်သာချင်ရင် ဆရာဝန်နဲ့ဝင်ပြပါ။ တခါတလေ ကိုယ်ရှိနေတဲ့အချိန် ဆေးလာဝယ်တဲ့သူက ဘာဖြစ်လို့ညာဖြစ်လို့ဆေးလေးရောင်းပေးပါဆိုတာနဲ့ကြုံရင်တော့ ဘယ်ဆေးဘယ်ဆေးပေးလိုက်ဆိုပြီး ရောင်းပေးလိုက်တာတော့ရှိပါတယ်။ တခါတရံပါ။ ဆေးဈေးပဲယူခိုင်းပါတယ်။ ဆေးတွဲပြီးတစ်ခွက်ဘယ်လောက်ဆိုတာမျိုး မယူပါဘူး။
(၅)
အဲ့ဒီစပ်ဆေးပြဿနာက တော်တော်ကြီးပါတယ်။
ကြားလိုက်ကြမှာပေါ့။ သက်တမ်းကုန်နေတဲ့ဆေးတွေကို ဈေးပေါပေါနဲ့လိုက်ဝယ်၊ ဆေးကဒ်တွေကိုဖောက်၊ ဆေးလုံးတွေကိုတွဲပြီး စပ်ဆေးထုပ်တွေထုပ်ရောင်းကြတဲ့အကြောင်း။ တော်တော်ကိုဆိုးပါတယ်။ မသုံးသင့်တဲ့ဆေးအမျိုးအစားကိုမှ သက်တမ်းကလွန်နေသေး၊ ဘုမသိဘမသိနဲ့ အမျိုးအစားတူဆေးတွေကိုသုံးလေးလုံးရောထည့်ပေး၊ စတီးရွိုက်ကိုတော့ အမုန်းကိုသုံးတာ၊ ဒက်ဆာ၊ ပရက်ဒနီစလုံး သုံးလေးလုံးထည့်တာ။ လနဲ့ချီစွဲသောက်ဖို့မပြောနဲ့ တစ်ခွက်သောက်ပြ၊ ဆယ်သိန်းပေးမယ်ဆိုရင်တောင်မသောက်ပါဘူး။ တကယ်ပါ။
ပြီးတော့ ကျနော့်ဆေးခန်းမှာသက်တန်းလွန်နေတဲ့ဆေးတွေကို ဒီအတိုင်းမပစ်ပါဘူး။ သုံးလေးလစာစုထားပြီး ပါကင်အထပ်ထပ်နဲ့ လုံလုံခြုံခြုံထုပ်ပါတယ်။ ဆေးရုံဆေးခန်းသီးသန့်အမှိုက်သိမ်းကားလာတော့မှ သုံးပြီးသားဆေးထိုးအပ်ဟောင်းတွေနဲ့ရောပြီးပစ်ပါတယ်။ သူတို့ကတော့ အဲ့ဒါတွေကိုရေဝေးသုဿန်မီးသဂြိုလ်စက်ထဲသွားထည့်ရတယ်လို့တော့ ပြောတာပါပဲ။
(၆)
စတီးရွိုက်အကြောင်းလည်း ရေးကြတာများနေပါပြီ။
စတီးရွိုက်ဆိုတာ သုံးတတ်ရင်နတ်ဆေးလိုပါပဲ။ အလာဂျီဖြစ်တာ၊ ရင်ကြပ်ရောဂါ၊ သွေးလေးဘက်နာလိုရောဂါ စတဲ့နေရာတွေမှာမဖြစ်မနေသုံးကြရပါတယ်။ တကယ်စွမ်းပါတယ်။ သူ့မှာက ရောင်ရမ်းမှုမှန်သမျှကိုအမြန်ဆုံးသက်သာစေတဲ့အာနိသင်ရှိပါတယ်။ သောက်မိလို့အာနိသင်လေးသိတော့ ထပ်သောက်ချင်လာပါတယ်။
အာနိသင်သာသိတာ၊ ဘေးထွက်ဆိုးကျိုးကိုတော့ မသိကြပါဘူး။ သူက ခန္ဓာကိုယ်ရဲ့ခုခံအားကိုလျှော့ချလိုက်ပါတယ်။ ရောဂါပေါင်းစုံဝင်လာပါတယ်။ ပြောရရင်တော့ အရှည်ကြီးပါ။ ရှင်းလေရှုပ်လေဖြစ်မှာပါ။ အတိုချုပ်ပြောရရင် သိကြားမင်းဝရဇိန်လက်နက်နဲ့ ကြမ်းပိုးသတ်သလိုဖြစ်နေပါတယ်။ ကြမ်းပိုးတစ်ကောင်တော့ သေသွားပါရဲ့။ တစ်အိမ်လုံးပြာကျသွားတဲ့အဖြစ်မျိုးပါ။
(၇)
ရေးချင်တာကတော့ အများကြီးပါ။ စာရှည်ရင်မဖတ်ကြလို့ ဒီလောက်နဲ့ပဲဖြတ်ပါမယ်။ ဒီပို့စ်လေးကြောင့် အနည်းဆုံးလူတစ်ယောက်လောက် စပ်ဆေးအန္တရာယ်ကလွတ်မြောက်တယ်ဆိုရင်ပဲ ကျေနပ်လှပါပြီ။
စပ်ဆေး
Okka KyiWinn
No comments:
Post a Comment