၅ ဧက အောက်သာ ကျောက်မျက်တူးခွင့် လျှောက်ထားနိုင်တော့မယ်

အလွန်အကျွံ ထုတ်ယူမှုကို တားဆီးနိုင်ဖို့ ဥပဒေပြင်ဆင်

၅ ဧကနဲ့ အထက် တူးဖော်ထုပ်လုပ်တဲ့ အကြီးစား ကျောက်မျက်တူးဖော်မှုတွေကို ပိတ်ပင်တဲ့ မြန်မာ့ ကျောက်မျက်ရတနာ ဥပဒေကြမ်းကို ပြည်ထောင်စုလွှတ်တော်က ဒီဇင်ဘာ ၁၈ ရက်နေ့မှာ အတည်ပြုလိုက်ပါတယ်။

လုပ်ကွက်တစ်ခုကို ဧက ၅ဝ အကျယ်အထိ အရင်က လုပ်ခွင့် လျှောက်ထား နိုင်ခဲ့တာကနေ အခု ဥပဒေသစ်အရ လုပ်နိုင်တဲ့ အကျယ်အဝန်းကို ကန့်သတ်လိုက်တာ အပြင်၊ လုပ်ခွင့် ကာလ လိုင်စင်သက်တမ်းကိုပါ လျှော့ချ ထားပါတယ်။

လိုင်စင်သက်တမ်းကို ၆ နှစ် ချပေးပြီး ၆ နှစ်ပြည့်တဲ့ အချိန် နောက် ၆ နှစ်သက်တမ်း ထပ်မံ လျှောက်ထား နိုင်ခဲ့တာကနေ အခုတော့ ၃ နှစ် သာ လိုင်စင် ချပေးတော့မှာ ဖြစ်သလို နောက်ထပ် နှစ်ကြိမ်သာ သက်တမ်း တိုးခွင့် ရှိမှာ ဖြစ်လို့ လုပ်ကွက် တစ်ခုကို အများဆုံး ၉ နှစ်သာ လုပ်ပိုင်ခွင့် ရရှိတော့မှာ ဖြစ်ပါတယ်။

ဒီလို လုပ်နိုင်တဲ့ မြေဧက၊ လုပ်ခွင့် လိုင်စင်သက်တမ်းတွေကို လျှော့ချကန့်သတ်တာဟာ ပြင်ပ ပုဂ္ဂလိက ကုမ္ပဏီတွေ အပေါ်မှာသာ ထိန်းချုပ် ကန့်သတ်တာ မဟုတ်ဘဲ အစိုးရပိုင် ကျောက်မျက်တူးဖော်ရေး လုပ်ငန်းတွေ အပေါ်မှာလည်း တပြေးညီ သက်ရောက်မှာ ဖြစ်တယ်လို့ နားလည်ရပါတယ်။

အစိုးရပိုင် လုပ်ငန်းတွေ အနေနဲ့ ဒီ တင်းကျပ်မှုမျိုးကနေ ကင်းလွတ်ခွင့် ပေးသင့်သလား ဆိုပြီး လွှတ်တော်ထဲမှာ ဆွေးနွေး ခဲ့ကြပေမယ့် အဆုံးမှာတော့ အားလုံးအပေါ် တပြေးညီ ကန့်သတ်ဖို့ဘက်က အလေးသာ သွားခဲ့တယ်လို့ နေပြည်တော် ဘီဘီစီ သတင်းထောက်က ဆိုပါတယ်။

လက်ကြီးသမားတွေကြောင့် ဒေသခံတွေ ကျောက်တူးခွင့် လက်လွှတ်ဆုံးရှုံး

 မြေစာပုံပြိုလို့ ရေမဆေးသမားတွေ အစုလိုက် သေရတာလည်း မကြာခနဖြစ်နေခဲ့

အခုလို ကျောက်စိမ်း အပါအဝင် ကျောက်မျက်ရတနာ တူးဖော်ရေးနဲ့ ပတ်သက်ပြီး အခုလို ထိန်းချုပ်ရတာဟာ လက်ကြီးသမား ကုမ္ပဏီကြီးတွေရဲ့ နေရာယူ လွှမ်းမိုးမှုကြောင့် ဒေသခံတွေ နစ်နာနေရတာကို ကာကွယ်နိုင်ဖို့ ဖြစ်တယ် ဆိုပြီး ဧရာဝတီ တိုင်း အမျိုးသား လွှတ်တော်ကိုယ်စားလှယ် ဦးမောင်မောင်အုန်းက ဘီဘီစီကို ပြောပါတယ်။

ဧကအမြောက်အမြား ရယူပြီး လုပ်ကိုင် ခဲ့ကြတာကလည်း နိုင်ငံတော်ပိုင် လုပ်ကွက်တွေ အနေနဲ့ ပထမ ရယူပြီး၊ နောက်ပိုင်းမှာ နီးစပ်ရာ ကုမ္ပဏီကြီးတွေ လက်ထဲ ရောက်သွားခဲ့ကြတာမျိုး ဖြစ်တဲ့ အတွက် အခု အတည်ပြုလိုက်တဲ့ ဥပဒေဟာ နိုင်ငံတော်ပိုင် လုပ်ကွက် ဆိုတဲ့ အကြီးစား တူးဖော်မှုတွေကို ဖျက်သိမ်း လိုက်တာပဲ ဖြစ်တယ် ဆိုပြီး ကချင်ပြည်နယ်၊ အင်ဂျားယန် မြို့နယ်က ပြည်သူ့လွှတ်တော် ကိုယ်စားလှယ် ဦးလမာနော်အောင်ကလည်း ဆိုပါတယ်။

ဒီလို ထိန်းချုပ်ကန့်သတ်မှုတွေကြောင့် အရင်က အနှစ် ၂ဝ တူးလို့ ကုန်သွားနိုင်တဲ့ နေရာတွေမှာ အနှစ် ၅ဝ အထိ ဆွဲဆန့်ပြီး တူးလာနိုင်မှာကြောင့် ကျောက်စိမ်းလုပ်ငန်း သက်တမ်းကို တာရှည်လာစေမယ့် အကျိုးမျိုး ရှိလာနိုင်တယ် လို့လည်း ဦးလမာနော်အောင်က ပြောပါတယ်။

ပတ်ဝန်းကျင် ပျက်စီးစေတယ် ဆိုတဲ့ ရှူထောင့်ကနေလည်း ဝေဖန်မှုတွေ ရှိခဲ့

လက်ကြီးသမား ကုမ္ပဏီကြီးတွေက မြေဧက အမြောက်အမြားပေါ် အကြီးစား တူးဖော်တာဟာ သဘာဝ ပတ်ဝန်းကျင် အပေါ် အကြီးအကျယ် ထိခိုက် ပျက်စီးစေတယ် ဆိုတဲ့ ဒေသခံတွေရဲ့ ထောက်ပြ ဝေဖန်မှုတွေကိုလည်း အခုနှစ်ပိုင်းတွေ အတွင်း ကျယ်ကျယ်လောင်လောင် ကြားနေခဲ့ရပါတယ်။

ကျောက်စိမ်းနယ်မြေ ဖြစ်တဲ့ ဖားကန့်မှာဆိုရင် နှစ်စဉ် ရေကြီး ရေလွှမ်းတဲ့ဒဏ်ကို တနှစ်ထက် တနှစ် တိုးပြီး ခံစား နေရတယ်လို့ မြို့ခံတွေက ပြောဆို နေခဲ့ကြတာ ဖြစ်ပါတယ်။

အခုတော့ ၅ ဧကအောက် အလတ်စား နဲ့အသေးစား ကျောက်မျက် တူးဖော်ရေး လုပ်ငန်းတွေသာ တူးဖော် နိုင်တော့မှာ ဖြစ်ပါတယ်။

ကျောက်မျက်လုပ်ကွက်တွေ ချပေးတဲ့ အခါမှာလည်း သက်ဆိုင်ရာ တိုင်းဒေသကြီးနဲ့ ပြည်နယ် လွှတ်တော်က အဆိုပြုသူ ၃ ဦး ထက်မနည်း ပါဝင်တဲ့ ၉ ဦးထက် မပိုသော ကျောက်မျက် စိစစ်ရေးအဖွဲ့ကို ဖွဲ့စည်းရမှာ ဖြစ်ပြီး အဲဒီအဖွဲ့က ကျောက်မျက်လုပ်ကွက်တွေ ချထား ပေးရတော့မှာဖြစ်ပါတယ်။

ဒီကျောက်မျက်ဥပဒေကို ပြည်ထောင်စု လွှတ်တော်က အတည်ပြုလိုက်ပြီ ဖြစ်တဲ့အတွက် နိုင်ငံတော် သမ္မတကသာ လက်မှတ်ထိုးလိုက်ပြီ ဆိုရင် စတင် အသက်ဝင်လာမှာ ဖြစ်ပါတယ်။

အဲဒီလို ဥပဒေသက်ဝင်လာပြီ ဆိုရင်တော့ လက်ရှိ တူးဖော်နေတဲ့ ကျောက်တွင်းတွေ တူးခွင့်သက်တမ်း ကုန်ဆုံးသွားတဲ့ အခါ ဥပဒေသစ်ပါ ကန့်သတ်ချက်တွေကို လိုက်နာပြီး လုပ်ဆောင်ကြရတော့မှာ ဖြစ်ပါတယ်။

BBC Burmese
https://www.bbc.com/burmese