ဘုန်းဘုန်း တာ့တာ(လူထုဒေါ်အမာ)

ဒီခေါင်းစဉ်ကို ဖတ်လိုက်တော့ ဆရာတော်၊ သံဃာတော်များက ဒေါ်အမာလည်း ခင်ပွန်း အနိစ္စ ရောက်တာနဲ့ စိတ်များ ကတောက် ကတက် ဖြစ်နေရှာ ထင်ပါရဲ့လို့ ကျွန်မကို သနား နေကြမလား မသိပါ။

“ဘုန်းဘုန်း တာ့ - တာ” ဆိုတဲ့ အသံမျိုး မကြာမကြာ ကြားရ လွန်းလို့ နား ကလောတာနဲ့ ဒီခေါင်းစဉ်ကို တပ်လိုက်မိတာပါ။

ကျွန်မတို့ ဆီမှာ ကလေးငယ်တွေကို လူကြီးမိဘတွေက ဘယ်သူ ပြန်ခါနီး မှာပဲ ဖြစ်ဖြစ် “တာ့ - တာ” လို့ နှုတ်ဆက်လိုက် ဆိုပြီး လက်ပြ ခိုင်းနေကြပါတယ်။ မြို့ပေါ်တင်လား ဆိုတော့လည်း မဟုတ်သေးဘူး။ ဒီ တာ့-တာက တောကြိုအုံကြားအထိ ပျံ့နှံ့ဆင်းသက်လို့ နေပါတယ်။

ဒါကို ထောက်ခြင်းအားဖြင့် ကျွန်မတို့မှာ ပြန်ခါနီး နှုတ်ဆက် စကား တခု မရှိမဖြစ်၊ အပူတပြင်း လိုအပ်နေတဲ့ ပုံပါပဲ။ လိုသမှ မဟားဒယားမို့ ကိုယ့်မှာလည်း မရှိလေတော့ သူများဟာကို အတင်း ဆွဲယူ သုံးထားရတဲ့ သဘောမျိုး ဖြစ်နေပါပြီ။

“တာ့ - တာ” ဆိုတာ ဘယ်လူမျိုးက သုံးစွဲတဲ့ စကား၊ ဘာ အဓိပ္ပာယ် ရှိတယ် ဆိုတာကို ဇစ်ဇစ်မြစ်မြစ် သိကြတာလဲ မဟုတ်ပါဘူး။ နို့ပေမယ့် လက်ကလေး လှုပ်ပြပြီး တွေ့ကရာ လူကို “တာ့-တာ” နေကြ ပါတယ်။ တချို့ကများ ကဲသထက် ကဲပြီး “ဘိုင့်ဘိုင် - တာ့တာ - ချဲရီးယို” အထိ လုပ်နေကြလေရဲ့။
ကျွန်မတို့ ငယ်ငယ်တုန်း ကတော့ အိမ် တအိမ်က ပြန်တော့မယ် ဆိုရင် အမေက သင်တာ လူကြီးတွေကို “ဦးတင်ပါသေးရဲ့” လို့ ပြောပြီး နှုတ်ဆက်ခဲ့ရမယ်တဲ့။ နည်းနည်း ကြီးလာတော့ “ကျွန်မကို ခွင့်ပြုပါဦး” လို့ နှုတ်ဆက်ခဲ့ရတယ်။ နောက် တော်တော်ကြီးလာ ပြန်တော့ “ပြန်ပါဦးမယ်နော်” လို့ ပြောရတယ်။ ဒါ မြန်မာ့ နှုတ်ဆက်နည်း ဖြစ်မှာပါပဲ။

ခုခေတ်လို လက်ကလေး ပြပြီး “တာ့ - တာ” လို့ ဆိုမိရင် အမေက လက်များ ပုတ်ချမလား မသိဘူး။ ပြီးတော့ “ဘာလဲ ညည်းတို့ စကားက တာတယ်ဆိုတာ အကောင်း မှတ်လို့ လူထဲ သုံးနေရ တာလား” လို့ ငေါက်မှာ အမှန်ပါပဲ။

မြန်မာစကားက လူပေါ်စ အဆင့်မျိုး မဟုတ်ပါဘူး။ ကြွယ်ဝပါတယ်။ ဝေါဟာရ မဆင်းရဲပါဘူး။ လူကြည့်ပြီး အသက်နဲ့ အလိုက် ဂုဏ်သိက္ခာနဲ့ အလိုက် သုံးနှုန်း ပြောဆို ရတဲ့ စကားမျိုးပါ။ ဒီလို ယဉ်ကျေးမှုဟာ လူမျိုးတိုင်း မှာတောင် မရှိပါဘူး။ လူ့ယဉ်ကျေးမှု သမဏိ ရှည်လှတယ် ဆိုတဲ့ တရုတ်တို့လို လူမျိုး အချို့ မှာသာ ရှိတာပါ။

အဖေ လုပ်တဲ့ လူအပေါ်ကို ကိုယ် ဘယ်လောက်ကြီး မကျေလည် ပေမယ့် “မင်းကလဲကွာ” လို့ မြန်မာစကားက ပြောလို့ မရပါဘူး။ “ခင်ဗျားကြီး ကလဲဗျာ” လို့ ပြောမိရင်တောင် “အဖေကို ခင်ဗျား လုံးကြီး ရိုက်ပြောတာ ရိုင်းလိုက်တာ” လို့ ဆိုပါသေးတယ်။ “ယူကလဲ ဂွကျလိုက်တာ” လို့ ပြောချင်လို့လည်း မဖြစ်ပါဘူး။ “အဖေကလဲ အဖေရာ” ဆိုတာ မျိုးကို အလွန်ဆုံး ပြောရ တာပါ။ မြန်မာမှာ ကိုယ်က ပြောချင်တဲ့လူနဲ့ တန်ရာ ဝေါဟာရကို ရွေးပြီး သုံးစွဲရ ပါတယ်။ ဒါဟာ မြန်မာ့ ယဉ်ကျေးမှုပဲ။
ခုတော့ ရည်းစားလည်း “တာ့ - တာ”၊ သူငယ်ချင်းလည်း “တာ့ - တာ”၊ ဘုန်းကြီးရဟန်းလည်း “တာ့ - တာ” တဲ့။ ဘယ်လိုများ ဖြစ်နေကြတယ် မသိပါဘူး။

ကျွန်မတို့ မိုးကုတ် သွားလည်ကြတော့ မိတ်ဆွေတွေကို ပြန်ပါ့မယ်လို့ နှုတ်ဆက်တဲ့အခါ အိမ်တိုင်းက ပြန်နှုတ်ဆက်တဲ့ စကားက “ဖြည်းဖြည်း ပြန်ပါရှင်” တဲ့။ ဒါဟာ ပြန်ခါနီးလူကို မိုးကုတ်က နှုတ်ဆက်တဲ့ စကားပါ။ မိုးကုတ်မှာ လမ်းတွေက မြေပြင်လမ်း မဟုတ်ဘူး။ အတက် အဆင်း၊ အကွေ့ အကောက်တွေ၊ ကားနဲ့ ခရီးသွားရတာ။ ကား အမြန် မောင်းရင် အသက် အန္တရာယ်နဲ့ တွေ့ရတာ၊ တွေ့ပေါင်းလည်း မရေမတွက် နိုင်ဘူး။ ဒါကြောင့် သူတို့ ဆီမှာ ခွဲခါနီး နှုတ်ဆက်တဲ့ လူတိုင်းကို “ဖြည်းဖြည်းပဲပြန်ပါ” လို့ နှုတ်ဆက်မှာ မှာတာ ထင်ပါရဲ့။ မေတ္တာ စေတနာ ကရုဏာ အပြည့်နဲ့ နှုတ်ဆက်လိုက်တဲ့ စကားမို့ ကြားရသူရဲ့နားထဲမှာ ချမ်းမြေ့ ကြည်နူးလိုက်တာ။ “တာ့ - တာ” နဲ့ မကွာလား။ မြန်မာမှာ နှုတ်ဆက် စကားတွေ ကြွယ်ကြွယ်ဝဝ ရှိပြီးသားပါ။

လူထုဒေါ်အမာ

သောင်းပြောင်းထွေလာ မဂ္ဂဇင်း၊
အတွဲ ၁၈၊ အမှတ် ၈၊ ၁၉၈၃ ဧပြီ။