ကျွန်တော်ဟာ တပ်မတော်က တပ်ကြပ်တစ်ယောက်ပါ။ ညဦးပိုင်းက ကျွန်တော်တို့ တပ်စု ကင်းလှည့်နေရင်း ရန်သူ့တပ်နဲ့ တွေ့လို့ တိုက်ပွဲဖြစ်ပွားခဲ့တယ်။ ကျွန်တော်တို့လည်း ရန်သူနဲ့ အင်အာျးင်း မယှဉ်နိုင်လို့ ဆုတ်ခွာထွက်ပြေးကြရတယ်။ မှောင်ထဲမှာ ဆုတ်ခွာကြရင်းနဲ့ ကျွန်တော်လည်း တပ်နဲ့ ကွဲသွားတယ်။
အခု ကျွန်တော် ညမှောင်မှောင် တောကြီးထဲမှာ တစ်ယောက်တည်း လျှောက်သွားနေတယ်။ ဘယ်နေရာ ရောက်နေမှန်း မသိပါဘူး။ ခြေဦးတည့်ရာ လျှောက်သွားနေမိတယ်။ ညာလက်မောင်းရင်းမှာ ကျည်ဆန်ထိထားလို့ ဒဏ်ရာက သွေးတွေ ထွက်ပြီး အရမ်းနာနေတယ်။ လူက မောလည်းမော၊ ရေလည်းငတ်၊ ဒဏ်ရာက သွေးထွက်များလို့ အားကုန်လာတာကြောင့် ကျွန်တော် မြေပြင်ပေါ် လှဲအိပ်လိုက်ချင်တယ်။ ဒါပေမဲ့ မအိပ်ရဲဘူး။ ရန်သူတွေ အနားမှာ ရှိတယ်လို့ ကျွန်တော့် စိတ်ထဲမှာ သိနေလို့ပါ။
ကျွန်တော် တောထဲမှာ ဆက်လျှောက်နေတာ ၄ နာရီလောက် ကြာသွားပြီ။ အခု ည ၁၀ နာရီထိုးပြီ။ ကျွန်တော် စိတ်လျှော့ပြီး မြေပြင်ပေါ်ကို လှဲအိပ်လိုက်ဖို့ စိတ်ကူးချိန်မှာပဲ အဝေးတစ်နေရာမှာ မီးရောင်မှိန်ပျပျလေးတစ်ခုကို လှမ်းမြင်လိုက်တယ်။ ကျွန်တော် အဲဒီမီးရောင်ဖက်ကို အမြန်လျှောက်သွားလိုက်တယ်။
မီးရောင်ပေါ်နေတာ တောင်ကုန်းလေးတစ်ခုပေါ်မှာ ရှိတဲ့ တဲအိမ်လေးတစ်ခုကပါ။ ကျွန်တော် ဒဏ်ရာကြောင့် အရမ်းနာကျင်နေသလို မောပန်းလွန်းလို့ တဲအိမ်ပိုင်ရှင်ဟာ ရန်သူ့ဖက်ကလားဆိုတာကို မစဉ်းစားနိုင်တော့ပါဘူး။ ကျွန်တော် တဲအိမ်တံခါးကို ခေါက်လိုက်တယ်။ ပထမ ဘာသံမှ မကြားရဘူး။ ၅ မိနစ်နေမှ တဲတံခါး ပွင့်လာပြီး အသက် ၅၀ ကျော်အရွယ် မိန်းမကြီးက မှန်အိမ်တစ်လုံးကိုင်ပြီး ထွက်လာတယ်။ သူက မှန်အိမ်ကို မြှောက်ပြီး ကျွန်တော့်ကို မီးရောင်နဲ့ ကြည့်တယ်။ ကျွန်တော်ဟာ တပ်မတော်ယူနီဖေါင်းကို ဝတ်ထားလို့ တပ်မတော်သားမှန်း သူ သိသွားတယ်။
သူ ကျွန်တော့်ကို တဲထဲကို တွဲခေါ်သွားပြီး မီးဖိုခန်းထဲက ပက်လက်ကုလားထိုင်တစ်လုံးမှာ ထိုင်ခိုင်းလိုက်တယ်။ ပြီးတော့ ရေတစ်ခွက် လာပေးတယ်။ ကျွန်တော် ရေသောက်လိုက်ရလို့ ရေငတ်ပြေသွားတယ်။ ကျွန်တော်ဟာ တပ်မတော်ထောက်ခံသူ တစ်ယောက်ရဲ့ အိမ်မှာ ရောက်နေပြီဆိုပြီး စိတ်ကို လျှော့ချလိုက်တယ်။ ကျွန်တော် ထိုင်နေရင်းနဲ့ အိပ်ပျော်သွားတယ်။
ကျွန်တော် တဲရှေ့ခန်းက စကားပြောသံတွေကြောင့် လန့်နိူးလာတယ်။ စကားကို တိုးတိုးပြောနေကြပေမယ့် ကျွန်တော် ကောင်းကောင်း ကြားနေရတယ်။
- "အမေ ဘာလို့ သူ့ကို တဲထဲမှာ လက်ခံထားရတာလဲ။ ကျွန်တော်တို့ ဒုက္ခရောက်ကြတော့မယ်နော်"
- "ဟဲ့ သူ့မှာ ဒဏ်ရာကြီးနဲ့၊ သွေးတွေလည်း အများကြီး ထွက်နေတယ်။ ငါ မကူညီရင် သူ သေသွားမှာပေါ့"
- "သေရင် သေဗျာ။ သူက ရန်သူပဲဟာ"
- "နင် အဲဒီလို မပြောနဲ့လေ။ သူလည်း နင့်လို လူသားတစ်ယောက်ပဲ။ ရန်သူဖြစ်ပေမယ့် သူလည်း တိုင်းရင်းသားညီအစ်ကို တစ်ယောက်ပဲလေ"
- "အမေက ခက်တာပဲဗျာ"
- "ခက်တာတွေ ဘာတွေ နောက်မှပြော။ ငါတို့ သူ့ကို ဆေးကုပေးရမယ်။ နင် လိုက်လာခဲ့"
ကျွန်တော် သိလိုက်ပါပြီ။ အခုစကားပြောနေသူဟာ ရန်သူ့တပ်ကဆိုတာပါ။ ကျွန်တော် အခုမှ သတိရလိုက်တယ်။ ကျွန်တော့် သေနတ်ပါမလာဘူး။ ပြေးရင်း လွှားရင်းနဲ့ ဘယ်ကျနေမှန်း မသိတော့ဘူး။ ကျွန်တော့်မှာ သေနတ်ရှိနေလည်း သေနတ်ကို ကိုင်နိုင်တဲ့ အားအင်မရှိတော့ပါဘူး။ ကျွန်တော် ရန်သူ ပြုသမျှ နုရမယ့် ဘဝရောက်နေပါပြီ။
မကြာခင်မှာ သူတို့သားအမိ နှစ်ယောက် ကျွန်တော် ရှိတဲ့ မီးဖိုခန်းထဲကို ဝင်လာကြတယ်။ အမေဖြစ်သူရဲ့ လက်မှာ ကိုင်ထားတဲ့ မီးအိမ်က အလင်းရောင်ကြောင့် သူဟာ ရန်သူ့တပ်က တပ်ကြပ်တစ်ယောက်မှန်း သိလိုက်တယ်။ သူတို့ သားအမိဟာ ကျွန်တော့်ကို ပက်လက်ကုလားထိုင်ကနေ တွဲထူပြီး အိပ်ယာပေါ်မှာ လဲသိပ်လိုက်တယ်။ သူတို့ ကျွန်တော့် အင်္ကျီကို ချွတ်လိုက်ကြတယ်။ အမေက ကျွန်တော့် ဒဏ်ရာကို ကြည့်ပြီး လက်မောင်းက ကျည်ဆံကို ခွဲထုတ်ရမယ်လို့ ပြောတယ်။ ကျွန်တော အတော်ကြောက်သွားတယ်။ သူ့သားက ကျွန်တော့် ကြောက်နေတဲ့ မျက်နှာကို ကြည့်ပြီး ခုလို တိုးတိုးလေး ပြောလာတယ်။ 'မိတ်ဆွေ၊ မပူပါနဲ့။ အမေက အရင် ဆေးရုံမှာ လုပ်ခဲ့တဲ့ သူနာပြုဆရာမကြီးပါ။ သူ ဒါမျိုး ခွဲစိပ်တာတွေ အများကြီး လုပ်ခဲ့ဖူးပါတယ်'
မကြာခင် အမေဟာ ရေနွေးပူပူ ထည့်ထားတဲ့ သံဇလုံတစ်ခုရယ်၊ ဂွမ်းလိပ်ရယ်၊ ဓားမြောင်တစ်ချောင်း ယူလာပြီး ကျွန်တော့် ဒဏ်ရာက ကျည်ဆံကို ခွဲစိပ်ထုတ်ယူပါတယ်။ ထုံဆေး မေ့ဆေး မပါလို့ ဒဏ်ရာထဲကို ခွဲစိပ်နေတာ မခံနိုင်လို့ ကျွန်တော် သတိမေ့မျောသွားပါတယ်။
ကျွန်တော် အိပ်ယာက နိူးလာတယ်။ မနက်ရောက်လို့ နေတောင် ထွက်နေပြီ။ အမေဟာ ဆံပြုတ်ခွက်တစ်ခွက်ကို ကိုင်ပြီး ကျွန်တော့်ကုတင်နားကို ရောက်လာတယ်။ သူက 'သားလေး ဒဏ်ရာသက်သာရဲ့လား။ ဒီဆေးလေးတွေ သောက်ထားလိုက်' ကြင်နာတဲ့ လေသံနဲ့ ပြောပါတယ်။ ကျွန်တော်က 'ဟုတ်ကဲ့ အမေ၊ သက်သာပါတယ်။ ဒါနဲ့ ညက တွေ့လိုက်တဲ့ အမေ့သားကော' လို့ ပြန်မေးလိုက်တယ်။ သူက 'အေး ဒီမနက် အစောကြီး သူ့တပ်ကို ပြန်သွားပြီ။ သူက သားအကြောင်း သူ့တပ်ကို သတင်းပို့မှာ မဟုတ်ပါဘူး။ ငါ့သား ဒဏ်ရာကောင်းသွားတဲ့အထိ ဒီမှာပဲ အနားယူနေနော်' လို့ ပြောတယ်။
ကျွန်တော် အမေ့စကားကို ကြားတော့ ဝမ်းသာဝမ်းနည်းနဲ့ ငိုချလိုက်တယ်။ ကျွန်တော် ဝမ်းသာတာက လူသားချင်းစာနာစိတ်ရှိတဲ့ ဒီသားအမိနဲ့ တွေ့လိုက်ရလို့ပါ။ ဝမ်းနည်းမိတာက ကျွန်တော်တို့ တိုင်းရင်းသား ညီအစ်ကိုတွေ တစ်ယောက်နဲ့ တစ်ယောက် သတ်ဖြတ်နေကြတဲ့ အဖြစ်ကိုပါ။
ဒီအခါမှာ ကျွန်တော့်ခေါင်းထဲမှာ အတွေး တစ်ခု ပေါ်လာတယ်။ အဲဒါက
- "ကျွန်တော်တို့ တိုင်းရင်းသားညီအစ်ကိုအချင်းချင်း ရန်သူတွေလို တစ်ယောက်နဲ့တစ်ယောက် တိုက်ခိုက်သတ်ဖြတ်နေကြတာ မှားတယ်။ တကယ်တော့ ကျွန်တော်တို့ သတ်ပစ်သင့်တာက တိုင်းရင်းသား ညီအစ်ကို အချင်းချင်းကို မုန်းတီးစေတဲ့ အကြောင်းတွေပါ"
အင်တာနက်မှာ ရှာတွေ့တာလေးကို မှီငြမ်းရေးထားတာပါ။
ဗန်းမော်သိန်းဖေ
No comments:
Post a Comment