ဗမာပြည်မှာ Copy လုပ်တဲ့ (ခိုးချတဲ့) အလုပ်ကိုရှက်စရာလို့မသတ်မှတ်ကြသေးဘူး။ ရှက်စရာလို့လည်းဘဲ မမြင်နိုင်ကြသေးဘူး။ လူနည်းစုတစ်စုကတော့သိတယ် ရှက်တယ်...ပြောသူလည်းပြောသလို စိတ်ပျက်ပြီးမပြောတော့တဲ့သူတွေလည်းမပြောတော့ဘူး..
လူများစုအနေနဲ့ဘာ့ကြောင့်ရှက်ရကောင်းမှန်းမသိတာလဲဆိုတဲ့အချက်ကို ကျနော်အကျိုးအကြောင်း သုံးသပ်မိတယ်။ ခိုးချတာအပြစ်ကြီးတယ်ဆိုတာကို မသိလို့ မရှက်တဲ့သူက လူများစုဖြစ်ပြီး သိသိကြီးနဲ့မျက်နာပြောင်တိုက် အရှက်သိက္ခာမဲ့စွာ လောဘဇောနဲ့ လုပ်တဲ့သူကလူနည်းစုဆိုတာကိုတော့ ကျနော် တစ်ထစ်ချယုံကြည်ပါတယ်။
ဒါဆို အဘယ့်ကြောင့်နည်း။
ပြီးတော့ ဘာ့ကြောင့် တခြားနိုင်ငံတွေမှာ ဒီခိုးချတဲ့ကိစ္စကို ရေးကြီးခွင်ကျယ်လုပ်ပြီး အပြစ်ကြီးတယ်လို့ သတ်မှတ်တဲ့အပြင် Plagiarism ဆိုတဲ့စကားလုံးအောက်မှာဥပဒေတွေ
နဲ့ဘောင်ခတ်ပြီး ငြိစွန်းရင် ထိုက်သင့်တဲ့ပြစ်ဒါဏ်တွေချမှတ်ကြပါ သနည်း။
ပထမဆုံးပြောရမယ့်အချက်ကတော့ "norms" သာမှန်လို့သတ်မှတ်ထားတာတွေချင်းမတူလို့ပါ။ ဒီမတူညီချက်ရဲ့အဓိကတရားခံက ယဉ်ကျေးမှုလုံးလုံးမဟုတ်ပါဘူး။ ပညာရေး ပါ။
ကျနော် ကိုယ်တိုင်လက်တွေ့ကြုံတွေ့ခဲ့လို့ရေးရဲတာပါ။ ကျနော်အလယ်တန်းကျောင်းအထိ ဗမာပြည်မှာတတ်ခဲ့ပြီး အထက်တန်းကျောင်း နဲ့ college ကိုတော့ US မှာတတ်ခဲ့ပါတယ်။
High school တုန်းကဆိုရင်...ဥပမာ သမိုင်းဘာသာဆိုပါတော့..နေ့စဉ်အိမ်စာအပြင် တခါတလေမှာ research (စာတန်းပြုစု) လုပ်ပြီး တစ်ပါတ် (သို့) နှစ်ပါတ် အတွင်းသတ်မှတ်ထားတဲ့ရက်အမှီတင်ရတယ့် essay တွေလည်းရှိပါတယ်။ ဆိုပါဆို့.. သမ္မတကြီး အေဘရာဟန်လင်ကင်း ရဲ့ biography essay ကို စာမျက်နာ နှစ်မျက်နာ စာ စာလုံးအရေအတွက် ၁၅၀ ထက်မနည်း ၁၈၀ ထက်မများဘဲ နောက်အပါတ် တနင်္လာ နေ့မှာတင်ရမယ် လို့ဆိုတာနဲ့ အဲဒီ့နေ့ကျောင်းဆင်းတာနဲ့ နီးရာစာကြည့်တိုက်ကိုပြေးပြီး လင်ကင်း ရဲ့အထ္တုပတ္တိ စာအုပ်နှစ်အုပ် သုံးအုပ်လောက်ငှါး internet ပေါ်မှာလည်းရှာ dictionary တွေလှန် လုံးစေ့ပတ်စေ့ နားလည်အောင်ဖတ်.. ပြီးမှ ကိုယ်သိလာတဲ့အကြောင်းအချက်တွေကို ကိုယ့်ဖာသာရေးကြရပါတယ်။ တကယ်လို့ ကျောင်းသားတစ်ယောက်က ဟိုစာအုပ်ကတစ်ပိုဒ် ဒီစာအုပ်ကတစ်ပိုဒ် internet ကတစ်ပိုဒ်ပေါင်းပြီး သူရေးထားသလိုလိုနဲ့တင်လိုက်ရင် ဆရာ ဆရာမတွေသိတာများပါတယ်။ အဲ့လိုဖြစ်ပြီဆိုရင် essay က F (zero) ရပါတယ်။ လူချင်းခေါ်တွေ့ပြီးနောင်မလုပ်ဖို့ နဲ့ ဒီလိုလုပ်ချင်းဟာကြီးလေးတဲ့အပြစ်ဖြစ်ကြောင်း ရှင်းပြပြီး record မှာမှတ်ထားပါတယ်။ နောက်ထပ်တစ်ကြိမ်ဖြစ်ရင် ကျောင်းအုပ်ဆီသတင်းရောက်မယ် ကျောင်းအုပ်ကနေတစ်ဆင့် အိမ်ကိုအကြောင်းကြားမယ်။ တတိယအကြိမ်လုပ်ရင်တော့ ကျောင်းကနေအထုတ်ခံရပါတယ်။ တခြားကျောင်းတွေကိုလည်းအပ်ရခက်သွားပါတယ်။ ရှက်စရာအတော့်ကိုကောင်းပါတယ်။ ဒါကြောင့်ကျောင်းသားတော်တော်များများမလုပ်ရဲကြပါဘူး။ ကိုယ်တတ်သလောက် မှတ်သလောက်ကိုရေးပြီးတင်ကြပါတယ်။ ဒါမှလည်းဆရာတွေက ဘယ်ကျောင်းသား ဘယ်အဆင့် မှာရှိနေတယ်ဆိုတာကို အသေအချာသိနိုင်မှာပေ့ါ။ ဒီစနစ်ဟာ Plagiarism ကို shame လို့ ကျောင်းသားတွေရဲ့ခေါင်းထဲကိုစွဲသွားစေသလို project တွေအချိန်မှီတင်နိုင်ဘို့တစ်ခါတည်း လေ့ကျင့်ပေးရာရောက်ပါတယ်။ တစ်ခါတစ်လေ ဘာသာရပ် နှစ်ခု သုံးခုလောက်က project တွေပြုံ ပြီး assignment တွေပေးတတ်ပါတယ်။ အဲ့လိုအချိန်ကြရင် time management က အရမ်းအရေးကြီးသွားပြီး အချိန်ကိုလေးစားရကောင်းမှန်းပါ တစ်ခါတည်းသိသွားပါတယ်။ Project အချိန်မှီမအပ်နိုင်ရင် ဘယ်လောက်ကောင်းအောင်ရေးထားရေးထား အမှတ်တွေ တစ်ရက်ကနေတစ်ရက် လျှော့လျှော့သွားပါတယ်။ တစ်ပါတ်လောက်နောက်ကျသွားရင်တော့ F ပဲရပါလိမ့်မယ်။
တစ်ချက်ခုတ် သုံးချက်လောက်ပြတ်တဲ့စနစ်ပေါ့။
ကျနော်တို့ဒီကစနစ်ကတော့ အားလုံးသိတဲ့အတိုင်းဘဲ ဆရာကပြောတဲ့ essay ကို ၏ သည် မရွေးလိုက်ရေးပြနိုင်မှအမှတ်ပြည့်ရပါတယ်။ နည်းနည်းလွဲရင် လွဲသလို အမှတ်အလျှော့ခံရတယ်။ ရာနှုန်းပြည့် copy လုပ်နိုင်မှတော်တယ်လို့သတ်မှတ်တယ်။ ကိုယ်တိုင်စာတမ်းပြုစုတာလည်းမဟုတ်တော့ ဒီ essay တစ်ပုဒ်ဖြစ်လာဘို့ ဘယ်လောက်ထိ ခက်သလဲ အချိန်ဘယ်လောက်ထိပေးရသလဲ ပင်ပန်းသလဲ ဆိုတဲ့ နားလည်မှု (knowledge+experience+appreciation) လုံးဝ မရှိတော့တဲ့အပြင် ခေါင်းထဲကို စာတကယ်မရောက်ပါဘူး။ ဆိုတော့ ကိုယ်ပိုင် အတွေးအခေါ် တီထွင်ကြံဆမှုတွေ
ကွန့်မြူးမှုတွေ မရှိနိုင်တော့တဲ့ ပင်စည်ကနေဖြတ်ခုတ်တဲ့စနစ် လို့မြင်ပါတယ်။
အမေစု လည်းဒီသင်ရိုးညွှန်းတန်းကိုအမြန်ဆုံးပြင်နိုင်ဘို့အသည်းအသန်
ကြိုးစားနေပါတယ်။ ပညာရေးဝန်ကြီးဌာနမှာက ရှေးရိုးစွဲ ပုဂ္ဂိုလ်ကြီးတွေကရှိနေတော့ ပြောသလောက် ပြောင်းဘို့မလွယ်ဘူးလို့ကြားတယ်။
ဆိုတော့ လိုရင်းကိုပြန်ဆွဲခေါ်ပြီးပြောရမယ်ဆိုရင်တော့ ဘာ့ကြောင့် ဗမာပြည်ကလူတွေတော်တော်များများဟာ ဒီ plagiarism လို့ခေါ်တဲ့ သူများ ip (intellectual property) ကို ကူးယူ ခိုးချတာဟာ ရှက်စရာလို့ အသွေးထဲ အသားထဲမှာ ရှိမနေတာလဲဆိုတာဟာ ကျနော်အပေါ်မှာရေးထားတဲ့ ပညာရေးစနစ်ရဲ့ မှားယွင်း ညံ့ဖျင်းမှုကြောင့်လို့ဘဲ ထင်ပါတယ်။
- Zenn Kyi (ဇဏ်ခီ)
နိုဝင်ဘာ ၃ ရက်၊ ၂၀၁၆ ခုနှစ်
No comments:
Post a Comment