ABSDF မြောက်ပိုင်းသတ်ဖြတ်မှု့များနှင့်မိခင်တစ်ဦး၏ကိုယ်တွေ့မှတ်တမ်း ( အပိုင်း ၃ )

( ၁၀.၃.၁၉၉၂ )
သွားမယ်ဆိုတာကိုလည်း ဗဟိုထောက်လှမ်းရေးကိုဖုန်းဆက်အကြောင်းကြားပြီးတော့…..ကျောင်းကိုဆက်သွားရသေးတယ်…..ဆရာကြီးကိုဝင်တွေ့ပြီး သားကိစ္စသွားမယ့်အကြောင်းနဲ့ ခွင့်စာတင်ခဲ့တဲ့အကြောင်းပြောပြတယ်…..ပြောပြီးရုံးမှာဆရာမကြီးတစ်ယောက်နဲ့ ထိုင်နေတုံး ဗိုလ်ကြီးတစ်ယောက်ရောက်လာပြီးခဏလိုက်ခဲ့ပါ…ဗိုလ်မှူးနဲ့စကားပြောရအောင်…ကျောင်းကိစ္စပြီးပြီလားဆိုတော့…ပြီးပါပြီဆိုပြီးလိုက်သွားတော့…ရုံးအပြင်မှာကားရပ်ထားတယ်…ကားထဲမှာဝင်ပြီးစကားပြောကြတယ်…..
ဗိုလ်မှူးက…လိုက်သွားမယ်ဆိုတော့ဘာတွေအကူအညီလိုသလဲ…လိုအပ် တာပြောပါလို့ပြောတယ်…..
ကိုယ်ကဘာမှမလိုပါဘူးလို့ပြောလိုက်တယ်…..ဒါဆိုရင်စကားပြောတာကအစဆင်ဆင်ခြင်ခြင်ပြောဘို့…
ကိုယ့်သားသမီးရရှိရေးအတွက် အတိုက်အခံပြောရတဲ့အချိန်မှာ တစ်ဖက်ကိုပုတ်ခတ်ပြီးမပြောဘို့ပြောတယ်…
အဲဒီတော့ကိုယ်က..ဗိုလ်မှူး…ကျမဟာ…ကျမလုပ်တဲ့ဆရာမအလုပ်ကို…၀ါသနာပါလွန်းလို့လုပ်လာတာပါ…၂၈ နှစ်တောင်ရှိပါပြီ….ကျမအလုပ်ကိုထိခိုက်မဲ့စကား….နိုင်ငံတော်ကိုထိခိုက်မည့်စကား…သစ္စာဖေါက်တဲ့အလုပ်ကိုမလုပ်ပါဘူးလို့ပြောတယ်…..
အဲဒီတော့ဗိုလ်မှူးက…နောက်ပိုင်းကျောင်းကိစ္စတွေကို သူတို့ကူညီလုပ်ပေးပါ့မယ်…ဆရာကြီးကောပြောပြထားလားမေးတော့…အပြည့်အစုံတော့မပြောပြထားပါဘူး…အရိပ်အမြွတ်လောက်တော့ သိပါတယ်လို့ပြောလိုက်တယ်…..ကောင်းပါတယ်….အများကြီးသိတော့လည်းကျွန်တော်တို့ဘက်ကဘာမှမဖြစ်ပါဘူးတဲ့..
ဟိုဘက်ကသိရင်ကလေးတွေအတွက် အခက်အခဲဖြစ်မှာစိုးလို့ပြောပြီး…အားလုံးအစဉ်ပြေမှာပါလို့ပြောတယ်…..ကျမကရုံးမှာ နေခဲ့ပြီး ဒေါ်ရီရီခင်ကိုတော့ဓာတ်ပုံ ရွေးစရာရှိတယ်ဆိုလို့ မြို့ထဲကိုလိုက်ပို့လိုက်ကြတယ်…..
အိမ်ရောက်တော့ မနက်ခရီးထွက်ဘို့လိုအပ်တာတွေဝယ်ရတယ်…..ဒေါ်ရီရီခင်ကိုလည်း အိမ်လာအိပ်ဘို့မှာထားတာ…၈နာရီထိမလာသေးလို့…ဆိုက်ကားအသွားအပြန်ငှားပြီးလိုက်သွားတယ်…ဘေးအိမ်ကစောစောကဘဲသုဝဏ္ဏကိုသွားတယ်ပြောလို့ပြန်ခဲ့ရတယ်…..အိမ်ရောက်တော့သူရောက်နှင့်နေတယ်….မနက်သွားဘို့စိတ်စောနေတော့ တစ်ညလုံးအိပ်မပျော်တော့ဘူး…..

( ၁၁.၃.၁၉၉၂ )
မနက်၂နာရီလောက်ထဲကနိုးနေကြတယ်….မနက်၎နာရီထိုးတော့သမီးတစ်ယောက်နဲ့အတူ ဘူတာကိုဆင်းကြတယ်…..ရထားပေါ်တက်တော့ အန်ကယ်ကြီးတို့လင်မယား၂ယောက်၊မမြင့်ကြည်တို့သားအမိ၂ယောက်၊သာယာဝတီက တစ်ယောက်….နောက်မှဦးအေးနိုင်မှန်းသိတယ်…..ရထားထွက်တော့လိုက်ပို့တဲ့သူတွေပြန်သွားကြ
တယ်…..မနက်၆နာရီရထားထွက်တော့ ၀မ်းသာဝမ်းနဲပေါ့…..၀မ်းသာတာကများပါတယ်….ဒုက္ခရောက်နေတဲ့သားသမီးတွေကို သွားခေါ်ရမှာဆိုတော့ ၀မ်းသာနေကြတာပေါ့…..ပဲခူးကျော်တာနဲ့ဝဲယာတောင်တန်းကြီးတွေတွေ့ရတယ်…..ပျဉ်းမနားကျော်တော့ကိုယ်မရောက်ဘူးသေးတဲ့ဒေသမို့…အသစ်အဆန်းတွေဖြစ်နေတယ်….မလှိုင်၊၀မ်းတွင်းရောက်တော့မှောင်ပြီး ဘာမှမမြင်ရတော့ဘူး…..
မန္တလေးရောက်တော့အန်ကယ်ကြီးတို့အဒေါ်အိမ်ကို သွားကြတယ်….ရေမီးအစုံနဲ့ဆိုတော့ တည်းရတာအစဉ်ပြေပါတယ်…..

( ၁၂.၃.၁၉၉၂ )
မနက်စောစောထပြီး တို့ဟူးပျော့နဲ့ရှမ်းခေါက်ဆွဲသွားစားကြတယ်..အန်ကယ်ကြီးကအားလုံးအတွက်ဝယ်ကျွေးတယ်…..အဲဒီကမှ ၈၂လမ်းကကိုမောင်မောင်အိမ်ကိုသွားကြတယ်…..ကိုမောင်မောင်တို့သားအမိကိုမတွေ့ဘူး…..ထောက်လှမ်းရေးကခေါ်သွားလို့ဆိုပြီး စောင့်နေကြရတယ်…..ပဲခူးကအန်တီစန်းတို့လင်မယားလည်းရောက်နေကြတယ်…..မိတ်ဆက်ကြတယ်….မကြာဘူးကိုမောင်မောင်တို့ရောက်လာကြတယ်…..
နောက်ထောက်လှမ်းရေးကဆရာကြီးတစ်ယောက်လာပြီး…..လိပ်စာနဲ့ကလေးတွေဓာတ်ပုံတစ်ပုံစီယူသွားတယ်…..ခရီးထွက်ဘို့တစ်ယောက် ၁၀၀၀ ကျပ်စီပေါင်းကြတယ်…..ကိုမောင်မောင်က ခေါင်းဆောင်သွားမှာဆိုတော့ ပူးတဲ့ငွေသူ့ကိုအပ်ထားကြတယ်…..လားရှိုးလက်မှတ်ကို ကိုမောင်မောင်ဘဲသွား ၀ယ်တယ်…..
ကိုမောင်မောင်ဆီကအပြန် ဈေးချိုထဲမှာထမင်းစားပြီး ဘုရားကြီးကိုသွားကြတယ်….တည်းတဲ့အိမ်မှာမနက်ကတည်းကထမင်းချက်ထားပေမဲ့ ညနေကျမှစားဖြစ်ကြတော့တယ်…
တည်းတဲ့အိမ်ကိုလည်း ဘုရားဖူးလာတယ်လို့ဘဲပြောကြတယ်…..

( ၁၃.၃.၁၉၉၂ )
စောစောထ…ရေမိုးချိုးပြီးမနေ့ကဆိုင်မှာဘဲ ရှမ်းခေါက်ဆွဲစားကြတယ်…..စားပြီးဈေးချိုဘက်သွား…ကိုမောင်မောင်ဆီရောက်တော့ လက်မှတ်အစဉ်ပြေတာသိရတယ်…ဒီအချိန်မှာထောက်လှမ်းရေးကဆရာကြီးနဲ့အဖွားကြီးတစ်ယောက်ပါလာတာတွေ့ရတယ်….မိဘတွေလိုက်သွားမယ်ဆိုလို့ သူလဲလိုက်ချင်တဲ့အကြောင်း
ဇွတ်ပြောနေလို့ ခေါ်ခဲ့ရတယ်ဆိုတာပြောတယ်…..ကိုမောင်မောင်နဲ့ အားလုံးကလည်း သက်ဆိုင်ရာမိဘတွေသာခေါ်ခိုင်းတာမို့ လူပိုမခေါ်ခဲ့ဘို့မှာထားတဲ့အကြောင်း ရှင်းပြပြီး စာပေးလိုက်မယ်ဆိုရင်တော့ ပေးပေးပါ့မယ်လို့ပြောလိုက်ကြတယ်…..

( ၁၄.၃.၁၉၉၂ )
အန်ကယ်ကြီးတို့ဇနီးမောင်နှံက သူတို့ အဖိုးအဖွားလက်ထက်က လှူဒါန်းခဲ့တဲ့ မိုးကုတ်ဝိပဿနာကျောင်းတိုက်ကို လိုက်ပို့တယ်…
အန်ကယ်ကြီးတို့ကလှိုင်းတက်မင်းသမီးအဆက်တွေလို့သိရတယ်….အဖိုးအဖွားမိဘတွေကအစ မင်းမှုထမ်းတွေဆိုတာသိရတယ်…ရှမ်းစော်ဘွားအဆက်တွေဆိုတာလဲသိရတယ်…မာနမကြီးဘဲ
သဘောကောင်းလို့ဝမ်းသာရတယ်…သူတော်ကောင်းတွေနဲ့တွေ့ရတာဘဲလို့အောက်မေ့ရတယ်…..
အန်ကယ်ကြီးတို့ကကျန်ခဲ့ပြီး အိမ်တော်ရာဘုရားကိုဆက်သွားကြတယ်…ဈေးချိုမှာပစ္စည်းတစ်ချို့ဝယ်တယ်…
ကျောင်းသားထောက်လှမ်းရေးကမှာတယ်ဆိုတဲ့ ဒေါ်မြရင်ဝက်အူချောင်းတစ်ပိဿလည်း ၀ယ်ခဲ့ကြရတာမှတ်မိတယ်…ပြီးတော့အိမ်ပြန်ရေမိုးချိုးပြီးအ၀တ် ၃ စုံဘဲထည့်ထားပြီး မလိုတာတွေကို မန္တလေးမှာဘဲထားခဲ့ကြတယ် ….အိမ်ရှင်တွေကို ဘုရားဖူးဆက်ထွက်မယ်ဆိုပြီး ပြောခဲ့ရတယ်…..

( ၁၅.၃.၁၉၉၂ )
နံက်၎နာရီအဝေးပြေးဂိတ်ကိုသွားကြတယ်…..အဲဒီမှာကိုမောင်မောင်နဲ့ပဲခူးကအန်တီစန်းတို့နဲ့တွေ့တယ်.
အဲဒီမှာကျောင်းသားအဖွဲ့ကမှာလိုက်တဲ့ လမုန့် ထိုးမုန့်တို့ကို ကိုမောင်မောင်က ၀ယ်လာတယ်…
ဝက်အူချောင်းကိုတော့ ဦးအေးနိုင်က၀ယ်လာတယ်…ကားရောက်တာနဲ့ကားပေါ်တက်ကြတယ်….
နံက် ၅း၃၀ မှာကားစထွက်တယ်…အန်ကယ်ကြီးကကျောက်မဲအထိလိုက်လာတယ်…ဒေါ်မြင့်မြင့်ကြည် အမေကအစမှာ ဟိုအထိလိုက်ဘို့ဘဲ…လူပိုမလိုက်ရဘူးဆိုလို့ မန္တလေးမှာကျန်ခဲ့တယ်…

၁၆.၃.၉၂ မှာအန်ကယ်ကြီးနဲ့အတူပြန်ဘို့စီစဉ်ထားတယ်…ကျန်ခဲ့တဲ့အန်တီစန်းအမျိုးသားနဲ့ဒေါ်မြင့်မြင့်ကြည် အမေဒေါ်တင်တင်တို့ကလက်ပြနှုတ်ဆက်ပြီးကျန်ခဲ့တယ်…..
မန္တလေးကစထွက်တော့ သားတွေနဲ့တွေ့ဘို့နီးပြီဆိုပြီးဝမ်းသာကြတာပေါ့…ကျောက်မဲမြို့နယ်ထဲရောက်တော့ ၁၁း၀၀ နာရီလောက်ရှိပြီ….အန်ကယ်ကြီးကကျောက်မဲမှာဆင်းနေခဲ့တယ်…သူလည်းအန်တီကြီးအတွက်စိတ်မချလို့ အတန်တန်မှာတယ်…ကိုယ်တို့ကလည်းမိဘလိုသဘောထားပြီး ကောင်းအတူ ဆိုးအတူ ကူညီပြီးသွားပါ့မယ်လို့ မှာခဲ့ကြတယ်…လားရှိုးကို၎း၃၀လောက်ရောက်တယ်….ဂိတ်နဲ့နီးတဲ့တည်းခိုခန်းမှာဘဲတည်းကြတယ်…ပိုင်ရှင်ကဆရာမတစ်ယောက်ပဲ…သဘောလည်းကောင်းတယ်…ကိုယ်တို့ကတော့ပစ္စည်းစုံအောင်စစ်ပြီး
နားကြတယ်…ကိုမောင်မောင်ကမနားရဘူး….လားရှိုးထောက်လှမ်းရေး ၉ ကိုသတင်းပို့ရသေးတယ်…
တာဝန်မှူးနဲ့ဘဲတွေ့ပြီးမှာခဲ့တဲ့အကြောင်းပြောတယ်…မနက်ခရီးဆက်ထွက်ဘို့ လက်မှတ်ကြိုဝယ်ရတယ်.

စာရေးသူ Ko Linn Wai Aung ( ကိုရဲလင်း)

• ABSDFမြောက်ပိုင်းသတ်ဖြတ်မှုများနှင့်မိခင်တစ်ဦး၏ကိုယ်တွေ့မှတ်တမ်း ( အပိုင်း ၁ )
• ABSDFမြောက်ပိုင်းသတ်ဖြတ်မှုများနှင့်မိခင်တစ်ဦး၏ကိုယ်တွေ့မှတ်တမ်း ( အပိုင်း ၂ )