Thu, 02/04/2016 - 10:22
ကိုစောခွားဖိုးနှင့်အတူ မိခင်ဖြစ်သူ နေထိုင်ရန်အတွက် ဆောက်လုပ်နေဆဲ ရွှံ့မြေအိမ်အား ဖေဖော်ဝါရီ ၃ ရက်နေ့က တွေ့ရစဉ်
ပဲခူးတိုင်းဒေသကြီး၊ တောင်ငူမြို့ ၂၀ ရပ်ကွက် မြို့ကြီးရပ်၊ သဲပုံဆိပ် စစ်တောင်းမြစ်ကမ်းနားနေတွင် နေထိုင်သည့် ကရင်တိုင်းရင်းသား တစ်ဦးမှ သဘာဝပတ်ဝန်းကျင် ထိန်းသိမ်းရေး မျှော်လင့်ချက်ဖြင့် မြေကြီးကိုသာ အဓိကအသုံးပြု ဆောက်လုပ်သောအိမ်ဖြင့် နေထိုင်လျှက်ရှိပြီး မိခင်ဖြစ်သူ နေထိုင်ရန် လူနေအိမ် တစ်လုံးအား ထပ်မံဆောက်လုပ် လျက်ရှိကြောင်း သိရသည်။
"ကျွန်တော်တို့ လင်မယား လက်ရှိနေတဲ့ အိမ်ကလည်း ခြံထဲက မြေကြီးတူးပြီးမှ အဲဒီကရတဲ့ ရွှံ့မြေတွေနဲ့ ဆောက်တာပဲ၊ အဓိကကတော့ ငွေလည်းမကုန်တော့ဘူးပေါ့နော်၊ သစ်လည်း မခုတ်ရတော့ဘူး၊ ၀ါးလည်းမခုတ်ရတော့ဘူး၊ သစ်တောသစ်ပင်တွေလည်း မပြုန်းတီးတော့ဘူးပေါ့၊ ကျွန်တော်အခုလို ဆောက်တာလည်း ကျွန်တော့်အိမ်ထဲက မြေကြီးကို တူးပြီးတော့မှ အဲဒီမြေကြီးနဲ့ပဲ ပြန်ဆောက်တာ ဖြစ်တဲ့အတွက် သဘာဝပတ်ဝန်းကျင် ထိန်းသိမ်းရာလည်း ရောက်ပါတယ်၊ ပတ်ဝန်းကျင်လည်း မထိခိုက်ဘူး၊ မြေကြီးကို အသုံးပြုပြီးတော့မှ စပါးခွံရယ်၊ ကောက်ရိုးရယ် အဲဒါကိုပဲ အဓိကရောပြီး လုပ်တာပါ၊ အသုံးပြုတဲ့ ဟာတွေကလည်း လေထုညစ်ညမ်းစေတဲ့ ကာဗွန်ဒိုင်အောက်ဆိုဒ် ထုတ်လွှတ်တာလည်း မရှိပါဘူး၊ ကျန်မာရေး အရလည်း ထိခိုက်မှု မရှိပါဘူး" ဟု ရွှံ့မြေကြီးဖြင့်အိမ် ဆောက်နေသူ ကိုစောခွားဖိုးက ပြောကြားသည်။
အဆိုပါ မြေကြီးဖြင့် ဖန်တီးဆောက်လုပ်သောအိမ်အား ကိုစောခွားဖိုး ၄၁ နှစ် (ဘ) ဦးစောဘီးဘီလူးမှ ဆောက်လုပ်ခြင်းဖြစ်ပြီး ဇနီးဖြစ်သူ မနော်လဲစေနုနှင့်အတူ လက်ရှိနေထိုင်လျှက်ရှိသော အိမ်မှာလည်း မြေကြီးဖြင့် ဆောက်လုပ်ထားကြောင်း သိရသည်။ ယခုဆောက်လုပ်နေသည့်အိမ်မှာ မိခင်ဖြစ်သူအား ပေးနေရန် ရည်ရွယ်ဆောက်လုပ်ခြင်း ဖြစ်ကြောင်း၊ မြေကြီးဖြင့် ဆောက်ထားသောအိမ်မှာ မိုးရေဒဏ်မှလွဲ၍ အခြားသဘာဝဘေး အန္တရာယ်များအား ပုံမှန်အိမ်များကဲ့သို့ ကာကွယ်မှု ပေးနိုင်ကြောင်း၊ နွေရာသီကာလတွင် အပူဒဏ် ကျရောက်ခြင်းမှ သက်သာစေကြောင်း ကိုစောခွားဖိုးမှ ပြောကြားသည်။
"ရောင်စုံပုလင်းတွေကို အလှဆင်တယ်၊ ပြတင်းတံခါးတွေကို အဟောင်းတွေဝယ်ပြီး ပြန်ဆင်တယ်၊ မြေကြီးကို အုတ်ခဲပုံစံ ပုံဖော်ရတာပေါ့၊ ၈ လက်မ ၁၆ လက်မပုံစံအရွယ် မြေခဲလုပ်ပြီးမှ နေလှန်းရတာ၊ အဲဒါခြောက်အောင် သုံးရက်လောက် နေလှန်းရတယ်၊ သူကလုံးဝခြောက်မှ ခိုင်တာလေ၊ အဲလိုမခြောက်ပဲ အထဲက စိုနေသေးရင် စိတ်မချရဘူး၊ နောက်ထပ်ကျွန်တော့် ဒီအိမ်ဆောက်တာ တစ်လလောက်တော့ ရှိပါပြီ၊ အချင်းက ပေ ၂၀၊ အမြင့်က ၉ ပေရှိပါတယ်၊ အိမ်ဆောက်ပြီးရင်လည်း ခိုင်ခန့်မှုရှိအောင် ရွှံ့မြေတွေနဲ့ လိုက်ပြီးတော့ အုပ်ရတာပေါ့၊ ကျွန်တော်တို့ ရွှံ့မြေနဲ့ဆောက်ထားတဲ့အိမ်က နွေရာသီဆိုရင် ပန်ကာတောင် မလိုပါဘူး၊ သူ့သဘာဝအတိုင်း အေးနေတာပဲ၊ အပူဒဏ်ကိုလည်း ကာကွယ်ပေးနိုင်တယ်" ဟု ကိုစောခွားဖိုးက ဆက်လက်ရှင်းပြသည်။
အဆိုပါ သဘာဝရွှံ့မြေဖြင့် ဆောက်လုပ်သောအိမ်မှာ မြင်တွေ့ရခဲသော်လည်း မြန်မာနိုင်ငံအနှံ့ မှော်ဘီ၊ မန္တလေး၊ စစ်ကိုင်းတိုင်း၊ ကချင်၊ မကွေးတိုင်းဒေသ အချို့တို့တွင် ဆောက်လုပ်နေထိုင်မှုများ ရှိကြောင်း၊ ရွှံ့မြေဖြင့် ဆောက်လုပ်သော အိမ်များမှာ ရေဖြင့်ထိတွေ့မှုမှ ရှောင်ကျဉ်ရန်သာ လိုအပ်ပြီး ပုံမှန်အိမ်များကဲ့သို့ အသုံးပြု နေထိုင်နိုင်ကြောင်း သိရသည်။
Writer:
ဇော်ဝင်းချစ် (တောင်ငူ)
http://news-eleven.com/local/မိခင်ဖြစ်သူနေထိုင်ရန်-ကရင်တိုင်းရင်းသား-တစ်ဦးမှ-ရွှံ့မြေကြီးကိုသာ-အဓိကအသုံးပြုသော-နေအိမ်
No comments:
Post a Comment