အသက်အရွယ်ကြီးတဲ့တစ်နေ့မှာ နကုလပိတာဟာ အနာရောဂါရလို့ ဘ၀အဆုံးတံခါးဝကို ရောက်ခါနီးလေးမှာ ကျန်ခဲ့မယ့် ချစ်နှမနောင်ရေးအတွက် ရတတ်မအေး တစ်စိမ့်စိမ့်တွေးလျှက် ပူပန်နေရှာတယ်။
နကုလမာတာက ဒါကို ရိပ်မိတော့ နကုလပိတာကို စိတ်ချဖို့ ပြောပါတယ်။
”မောင်တော်သူဌေးကြီး နှမအတွက် မငဲ့ကွက်ပါနဲ့။ ငဲ့ကွက်ပြီး သေတာဟာ ဆင်းရဲလှပါတယ်။ ငဲ့ကွက်ပြီးသေတာကို ဘုရားရှင်ကဲ့ရဲ့တော်မူပါတယ်။
ငါသေတဲ့အခါ နှမဟာ သမီးငယ်တွေကို ကျွေးမွေးနိုင်ပါ့မလား၊ အိမ်ထောင့်တာဝန်ကို ထိန်းသိမ်းနိုင်ပါ့မလားလို့ တွေးမပူပါနဲ့။ နှမဟာ ဗိုင်းငင်အတက်၊ သိုးမွေးအတက် တက်ကျွမ်းပါတယ်။ သားသမီးတွေကိုလည်း စောင့်ရှောက်နိုင်ပါတယ်။ နောက်အိမ် ထောင်ပြုမှာလားလို့လည်း တွေးမပူပါနဲ့။ မြတ်သောဗြဟ္မစရိယအကျင့်ကို အသက်ထက်ဆုံးစောင့်ထိန်းပြီးပါပြီ။ ဘုရားရှင်နှင့်သံဃာ တော်တွေကို ဖူးမြော်ပါ့မလားလို့လည်း တွေးမပူပါနဲ့ အရင်ကထက် ပိုပြီးတောင် ဖူးမြော်မယ့်သူပါ။ သီလစောင့်ပါ့မလားလို့လည်း တွေးမပူပါနဲ့ ဘုရားတပည့်သီလစောင့်တဲ့လူဥပါသိကာမတို့တွင် တစ်ယောက်အပါဝင်ပါ။ စိတ်အေးချမ်းမူကို ရပါ့မလားလို့လည်း တွေးမပူပါနဲ့ ဘုရားတပည့် စိတ်အေးမူကိုရရှိတဲ့ လူဥပါသိကာမတို့တွင် တစ်ယောက်အပါဝင်ပါ။ နှမဟာ သာသနာမှာ ထောက်တည် ရာရသူ၊ ၀ိစိကိစ္စာကို လွန်မြောက်သူ၊ သံသယကင်းရှင်းသူ၊ ဘုရားမှတစ်ပါး ကိုးကွယ်ရာမရှိဟု ယုံသူ၊ ဘုရားသာသနာ၌နေသူ ဖြစ်ပါ့မလားလို့လည်း တွေးမပူပါနဲ့။ နှမတော်ဟာ သာသနာမှာ သက်သာရာကို ရသူပါ။ ၀ိစိကိစ္စာကို လွန်မြောက် သံသယ တွေ ပျောက်ပြီး ဘုရားသာလျှင်ကိုးကွယ်ရာဖြစ်ပါတယ်။ ဘုရားအဆုံးအမကို ကျင့်သုံးနေတဲ့ သာသာနာ၌ နေသူဖြစ်ပါတယ်။ မယုံရင် အခု ဘေဠကတောမှာ သီတင်းသုံးတော်မူနေတဲ့ မြတ်စွာဘုရားရှင်အား သွားမေးနိုင်ပါတယ်။
ဒါကြောင့် မောင်တော် ငဲ့ကွက်ခြင်းဖြင့် မသေပါနဲ့၊ ဆင်းရဲလှပါတယ်။ ငဲ့ကွက်ခြင်းဖြင့်သေခြင်းကို ဘုရားလည်း ကဲ့ရဲ့ပါတယ်။
ဒီတော့မှ နကုလပိတာလည်း အနာရောဂါသက်သာရာရပြီး ပူပင်သောက ငြိမ်းအေးသွားပါတော့တယ်။ ထို့နောက် တောင်ဝှေးကို ထောက်ပြီး ဘုရားထံမှောက် ခစားကာ အကြောင်းစုံကို လျှောက်တင်တဲ့အခါ ဘုရားရှင်က “ဒီမှာ သူကြွယ်၊ သင့်ဇနီးပြောတာတွေ အားလုံးမှန်ပါတယ်။ သင့်ဇနီးဟာ သင့်ကို စောင့်ရှောက်ပါပေတယ်။ အကျိုးစီးပွားကို အလိုရှိတယ်။ သွန်သင်ဆုံးမတတ်တယ်။ သူကြွယ်၊ အရတော်လိုက်တာ။ သင်ဟာ လူဖြစ်ရကျိုးနပ်ပါပေတယ်။” လို့ ချီးကျူးစကားဆိုလိုက်ပါတယ်။
ဇနီးကောင်းဆိုတာ သစ္စာရှိတယ်။ မေတ္တာပြည့်ဝတယ်။ နားလည်မှုရှိတယ်။ အနွံတာခံတယ်။ နောက်ဆုံးအချိန်မှာတောင် သူအမျိုးသားကို အကုသိုလ်စိတ်နဲ့မသေအောင် ဖေးမကူညီနိုင်ပါတယ်။ ဇနီးကောင်းပီသသူဟာ မိန်းမမြတ်ပါပဲ။ နကုလမာတာကို အတုယူပြီး ချစ်ဇနီးများလည်း မိမိတို့ရဲ့ လင်ယောက်ျားများ နောင်ရေးအတွက် ရတတ်မအေးရအောင် ဖေးမကူညီနိုင်ရပါမယ်။ လင်ယောင်္ကျားများကလည်း နကုလပိတာလိုပဲ ချစ်ဇနီးပေါ် ကြင်နာယုယ၊ မေတ္တာမျှလျှက် သစ္စာမပျက် အပြန်အလှန်ဖေးမ ကူညီရပါမယ်။ ဒါမှသာလျှင် စံထိုက်တဲ့ ဇနီးမောင်နှံ ဖြစ်လာပါလိမ့်မယ်။
လူဆိုတာ သေခါနီးမှာ အရမ်းအရေးကြီးပါတယ်။ ကျန်ခဲ့မယ့် ဇနီး သို့မဟုတ် လင်ယောင်္ကျားက မိမိတို့ရဲ့ လင်ယောင်္ကျား သို့မဟုတ် ဇနီးသည်ကို အသေကောင်းအောင် နောက်ဆံတင်း ငဲ့ကွက်ခြင်းမရှိအောင် ဖေးမပေးဖို့လိုပါတယ်။ များသောအားဖြင့်တော့ ယနေ့ခေတ်မှာ လင် သို့မဟုတ် ဇနီး သေခါနီးမှာ ပိုပြီးတော့ သဲသဲလှုပ်ငိုပြတတ်ပါတယ်။ အဲဒါဟာ ပိုပြီး ငဲ့ကွက်ခြင်းဖြင့် သေအောင်လုပ်နေတာပါပဲ။ ငဲ့ကွက်ပြီးသေရင် ပြိတ္တာဖြစ်တာပေါ့။ ဇနီးကောင်း ယောင်္ကျားကောင်းဆိုတာ ကိုယ့်ကြင်ယာကို နောက်ဆုံးအချိန်မှာတောင် ကုသိုလ်စိတ်နဲ့သေအောင် ကူညီပေးရပါမယ်။ ဒါကြောင့် အားလုံးပဲ ငဲ့ကွက်ခြင်း ကင်းကြပါစေလို့ ဆန္ဒပြုလိုက်ပါတယ်။
ရွှေစမ်းမြေ အရှင်က၀ိဓဇသာရ
No comments:
Post a Comment