We Love G Fatt အဖွဲ့နဲ့အတူ ရေဘေးသင့်ပြည်သူတွေကို ကိုယ်တိုင်ကိုယ်ကျသွားရောက် လှူဒါန်းမယ့် G Fatt က ဆော်ကြည်ဖို့အတွက် သီချင်းတွေ ဆိုနေတာ မဟုတ်ဘူးလို့ ဖွင့်ဟ

 

ခင်ဆွေသက် 

 

 

ဂီတလောကထဲကို ၂၀၀၇ ၊ ၂၀၀၈ လောက်ကတည်းက ရောက်ရှိရပ်တည်ခဲ့ပေမဲ့  4 သီချင်းခွေထဲက ၈ရက်၊ ၈လ၊ ၈နာရီ သီချင်းနဲ့ ပရိသတ်ရင်ထဲ ရောက်ရှိခဲ့တဲ့ G Fatt ဟာ ပြည်ပသို့ပေးစာ သီချင်းနဲ့ လည်း ပရိသတ်အခိုင်အမာကို ရရှိခဲ့ပြန်ပါတယ်။ G Fatt နဲ့ တွေ့ဆုံခိုက် သူ့ရဲ့ဂီတလှုပ်ရှားမှု၊ ရေဘေးသင့်ပြည်သူတွေအတွက် သူ့ရဲ့ ပရဟိတ လုပ်ဆောင်ချက်တွေအကြောင်း မေးမြန်းဖြစ်တဲ့အခါ
-အခုလက်ရှိ ဂီတလှုပ်ရှားမှုအနေနဲ့ ဘာတွေလုပ်ဖြစ်နေလဲ။
လက်ရှိက Single ခွေလုပ်နေပါတယ်။ ၁၀လပိုင်း သတင်းကျွတ်လောက်တော့ မှန်းထားတယ်။ အဲ့ဒီထက်နောက်ကျရင်လဲ နည်းနည်းလောက်ပါပဲ။ ကျွန်တော့ Single အခွေထဲမှာ ကျိန်းသေတာကတော့ G Family ကလူတွေပါမယ်။ ကိုနေ၀င်း၊ ကိုဖြိုးလေးတို့ပါမယ်။ 4 Album ထဲကဆို ရွှေထူးပဲ ပါလောက်မယ်။ ဒါပေမဲ့ သူတို့လဲမအား၊ကျွန်တော်လဲ မအားရင်တော့ ပါချင်မှပါမယ်။ တစ်ခွေလုံးကို ကျွန်တော်ပဲ အကုန်ရေးမှာပါ။
-အခွေထဲမှာရော ဘယ်လို ခံစားချက်မျိုးကို အဓိကအသားပေးရေးဖွဲ့ထားလဲ။
အရမ်းပျော်နေတဲ့ သီချင်းတွေလဲပါတယ်။ အရမ်းကြီး ငိုနေတဲ့ အပုဒ်တွေလဲရှိတယ်။ အသည်းကွဲသီချင်းတွေ၊ ချစ်နေတဲ့အပုဒ်တွေရော အများကြီးပါပဲ။ ထူးထူးဆန်းဆန်းတွေ အများကြီးပါတယ်။ ကျွန်တော်တို့နိုင်ငံ၊ကျွန်တော်တို့လူမျိုးအတွက် သီချင်းလဲပါတယ်။
-အဲ့ဒီတစ်ကိုယ်တော်ခွေထဲမှာ ဖေ့စ်ဘုတ်ပေါ်က ပေါက်ပြီးသားသီချင်းတွေရော ပြန်ထည့်ဖြစ်မလား။
အမှန်က အဲ့ဒီသီချင်းတွေက ကျွန်တော် Single ခွေအတွက်ဆိုပြီး လုပ်ထားတဲ့ သီချင်းတွေခင်ဗျ။ ဘယ်လိုက ဘယ်လိုပြန့်သွားလဲ မသိပါဘူး။ သူ့ဟာနဲ့သူပြန့်နေတာ။ အဲ့ဒီထဲက ပြန်ထည့်မယ်ဆိုရင်လဲ ကျွန်တော်အရမ်းကြိုက်တဲ့ ပြည်ပသို့ပေးစာလို ဟာမျိုးပြန်ပါမယ်။ လူသားသစ္စာလိုဟာမျိုးပြန်ပါမယ်။ ကျန်တဲ့အပုဒ်တွေကတော့ ပယ်လိုက်ရမှာပေါ့။
-အဲ့ဒါဆို အစ်ကို့သီချင်းတွေကအစ်ကိုတင်တာမဟုတ်ဘူး။ အွန်လိုင်းကနေပြန့်တာပေါ့။
ဟုတ်ကဲ့။ ကျွန်တော်တင်တာမဟုတ်ဘူး။ အွန်လိုင်းမှာ ဘယ်ကဘယ်လိုပြန့်သွားမှန်းကို မသိတာပါ။
-တစ်ကိုယ်တော်ခွေက ဘယ်လောက် အနေအထားရှိနေပြီလဲ။
တစ်ကိုယ်တော်ခွေအတွက်က တော်တော်လေးပြီးနေပါပြီ။ အခွေအတွက်က ချိန်လဲချိန်နေရသေးတယ်လေ။ ဒီနိုင်ငံမှာလဲ ရေဘေးတွေနဲ့ဒုက္ခလဲရောက်နေတော့ ချိန်နေတာပေါ့။ သီချင်းတွေကတော့ ပြီးနေပါပြီ။ ဒါပေမဲ့ ထပ်လုပ်ချင်တာလေးတွေလဲ ရှိသေးတာပေါ့။ လောဘတွေကြီးနေတာပေါ့။ အများကြီးလုပ်ပြီးမှ အကောင်းဆုံးတွေကိုပြန်ရွေးမယ်။ လုပ်ဖြစ်မှာက ၁၁ ပုဒ် ၁၂ ပုဒ်လောက်တော့ လုပ်ဖြစ်ပါမယ်။
-တစ်ကိုယ်တော်ခွေက အစ်ကိုကိုယ်တိုင်ထုတ်မှာလား။ ပရိုဂျူဆာများရှိလား။ စာချုပ်တွေဘာတွေချုပ်ထားတာမျိုးပေါ့။
စာချုပ်က မချုပ်သေးပါဘူး။ နောက်လဲ ချုပ်ဖြစ်ရင်ချုပ်ဖြစ်မယ်။ အဲဒါကို အတိအကျတော့မပြောတတ်သေးပါဘူး။ ဒါပေမဲ့ အခွေက ပရိုဂျူဆာပိုင်းထက် အခွေကို အရင်ပြီးအောင် လုပ်နေတာပါ။ ဘာလို့လဲဆိုတော့ မကျိန်းသေပဲနဲ့လဲ ထုတ်မပြောချင်သေးလို့ပါ။ ပရိုဂျူဆာပိုင်းက Frenzo ဖြစ်ဖို့ နည်းနည်းများတယ်။ ဒါပေမဲ့ အတိအကျလဲ မဟုတ်သေးဘူး။ အရင်ဆုံးအခွေကို ပြီးအောင်လုပ်နေတယ်။ ကျန်တာကို ပြီးမှစဉ်းစားမယ်။
-Frenzo နဲ့စာချုပ်ချုပ်လိုက်တယ်လို့ကြားလို့ပါ။
စာချုပ်ချုပ်တယ်လို့မဟုတ်ပါဘူး။ ကျွန်တော်တို့စာချုပ်ချုပ်ဖို့စဉ်းစားကြတာပါ။ စာချုပ်တော့မချုပ်ရသေးပါဘူး။ ကျွန်တော်တို့က ကမ်းလှမ်းတယ်ဆိုတာထက် အကျိုးတူပူးပေါင်းမှာပေါ့။ စာချုပ်ချုပ်ဖြစ်တယ်ဆိုရင်တောင်မှ အကျိုးတူပူးပေါင်းဖို့စဉ်းစားထားတာပါ။ အတိအကျတော့ ပြောပြလို့မရသေးလို့ပါ။
-ဂီတလောကထဲမှာ ဖြတ်သန်းလာတာကြာနေပေမဲ့ အခုမှလူသိလာတဲ့အပေါ်မှာရော ကိုယ့်ကိုကိုယ်ဘယ်လိုသုံးသပ်မိပါသလဲ။
ကျွန်တော် ၂၀၀၇ ၊ ၂၀၀၈ လောက်ကတည်းကဂီတလောကထဲမှာရှိနေခဲ့တယ်။ ဒါပေမဲ့ Underground မှာနေကတည်းက Mixtape ထွက်တာတို့၊ Sample ခွေထွက်တာတို့မရှိဘူးခင်ဗျ။ ကျွန်တော်က သူငယ်ချင်းတွေနဲ့သီချင်း သွားလုပ်လိုက်၊ အွန်လိုင်းတင်လိုက် အဲ့ဒါပဲလုပ်တာပေါ့။ အဲ့ဒါကြောင့် လူသိပ်မသိဘူး။ စထွက်ဖူးတာဆိုလို့ ဘိုဘိုက လုပ်တဲ့ ရေတွေစိုကုန်ပြီဆိုတဲ့ သင်္ကြန်သီချင်း တစ်ပုဒ်စထွက်ဖူးတယ်။ နောက်ပိုင်း အမုန်းကမ္ဘာမှနေ့စွဲများ ထွက်ဖူးတယ်။ ၈ရက်၊ ၈လ၊ ၈နာရီထွက်ဖူးတယ်။ Love&Music ထွက်ဖူးတယ်။ ဒီလောက်ပဲ။
-ပရိသတ်တွေအရမ်းအားပေးသွားတာကရော ဘယ်မှာဖြစ်မလဲ။
ပရိသတ်ကတော့ ပုံမှန်မရှိဘူး။ တချို့ကတော့ ၈ရက်၊ ၈လ၊ ၈နာရီ၊ တချို့ကတော့ တိမ်မျှင်ရောင်ကကြိုး၊ တချို့ကတော့ တို့မြန်မာပြည်၊ တချို့ကတော့ အမုန်းကမ္ဘာမှနေ့စွဲများမှာစကြိုက်တာပေါ့။ ကျွန်တော်လုံးဝ အမာခံယုံကြည်လိုက်တာကတော့ ၈ရက်၊ ၈လ၊ ၈နာရီနဲ့ပြည်ပသို့ပေးစာမှာတော့ ပရိသတ်တွေတော်တော်သိသွားပြီလို့လက်ခံလိုက်ပါတယ်။
-အစ်ကို့အသံနဲ့ပတ်သက်ပြီး တချို့က အသံသြတယ်။ ဘာညာ ဝေဖန်တာတွေကြားရတယ်။ အဲ့ဒါနဲ့ပတ်သက်ပြီးရော ဘာပြောချင်ပါသလဲ။
အသံကတော့ ဘုရားပေးတဲ့အသံပါပဲ။ ငယ်ငယ်ကတည်းက လုပ်ဆိုတာမျိုးလဲမရှိပါဘူး။ ကလေးအသံကနေလူကြီးအသံကို ပြောင်းလဲတဲ့ကာလမှာအဲ့လိုမျိုးဖြစ်သွားတာပဲ။ သီချင်းဆိုတုန်းကတောင်မှ ကိုယ့်အသံနဲ့ ကိုယ်သီချင်း ဆိုလို့မရဘူးဆိုတဲ့ဝေဖန်မှုတွေ အများကြီးကြားခဲ့ပါတယ်။ ဒါပေမဲ့ အခုချိန်မှာတော့ G Fatt အသံမှကြိုက်တယ်ဆိုတဲ့ ပရိသတ်တွေရဲ့ ဝေဖန်သံကိုပြန်ကြားတဲ့အခါ အရမ်းပျော်ပါတယ်။
-လက်ရှိမှာ ဘယ်သူတွေကိုရော သီချင်းရေးပေးဖြစ်နေလဲ။
သက်စုနဒီ၊ နောက် Supermodels အဖွဲ့က အစ်မသုံးယောက်ကိုရေးပေးနေပါ တယ်။ အခြားသူတွေရဲ့သီချင်းတော်တော်များများကိုလဲရေးပေးဖြစ်ပါတယ်။
-ကိုယ်ဆိုတဲ့ သီချင်း ကိုယ့်ဟာကိုယ်ရေးသလို သူများတွေရဲ့သီချင်းကိုလဲရေးပေးတော့ သီချင်းရေးဖို့အတွက်ဘယ်လိုစကားလုံးရှာလေ့ရှိသလဲ။
သီချင်းပိုင်းနဲ့ပတ်သက်ပြီးတော့ ကျွန်တော် စာအုပ်များများဖတ်ပါတယ်။ စာအုပ်ကို မျိုးစုံဖတ်တယ်။ ပြီးတော့ ဦးနှောက်ကို မျိုးစုံအလုပ်ပေးပါတယ်။ တော်ရုံတန်ရုံ စာသားမျိုးတွေလောက်နဲ့ကျွန်တော့်ပရိသတ်ကို မခံစားစေချင်ဘူး။ အရမ်းစဉ်းစားပါတယ်။ ကျွန်တော်ကိုယ်တိုင်စိတ်တိုင်းကျပြီဆိုတော့မှ ကျွန်တော့်ပရိသတ်ကို ချပြပါတယ်။
-နယ်ရှိုးတွေရောလက်ခံထားတာရှိဦးမလား။
မန္တလေးပွဲ၂ပွဲရှိပါတယ်။ ၁၆ ရက်နေ့တစ်ပွဲ၊ ၂၉ရက်နေ့တစ်ပွဲပါ။ နောက်မုံရွာဖက် လက်ခံထားပါတယ်။ ဒါပေမဲ့တိုင်းပြည်ရဲ့အခြေအနေကြောင့် သွားဖြစ် မသွားဖြစ် မသေချာသေးပါဘူး။
-အခုလက်ရှိကြုံတွေ့နေရတဲ့ ရေဘေးနဲ့ပတ်သက်ပြီး အစ်ကို့ရဲ့စိတ်ခံစားချက်နဲ့ အနုပညာရှင်တစ်ယောက်အနေနဲ့ဘယ်လိုမျိုးပါဝင်ကူညီသွားမယ်ဆိုတာလဲသိချင်ပါတယ်။
ဒီလိုမျိုး ကိုယ့်နိုင်ငံ၊ကိုယ့်လူမျိုးတွေ ဒုက္ခတွေရောက်တယ်။ အကြီးအကျယ် ကပ်ဆိုက်နေတဲ့ အနေအထားမျိုးမှာ ကျွန်တော်တို့လိုမျိုး ဒီနိုင်ငံမှာနေနေတဲ့သူ ကျွန်တော်မှ မဟုတ်ပါဘူး။ ဘယ်သူမဆို လက်ပိုက်ကြည့်နေတာမျိုး မဖြစ်သင့်ပါဘူး။ ကိုယ်နိုင်သလောက် တစ်တပ်တစ်အားနဲ့ကူညီပေးသင့်ပါတယ်။ ကျွန်တော်တို့ဆွေမျိုးတွေသာဖြစ်ခဲ့ရင် ကျွန်တော်တို့မိသားစုတွေသာဖြစ်ခဲ့ရင်ဘယ်လိုလုပ်ကြမလဲ ဆိုတဲ့ စာနာစိတ်နဲ့ဝိုင်းပြီးကူညီသင့်ပါတယ်။ ကျွန်တော်လဲ အများကြီးလုပ်ပေးဖို့စဉ်းစားထားပါတယ်။ ကျွန်တော့ရဲ့ We Love G Fatt ဆိုတဲ့ Group ကနေ ကျွန်တော့ ပရိသတ်တွေနဲ့ပူးပေါင်းပြီး အန္တရယ်ဘယ်လောက်များများ ကျွန်တော့်အတွက် ဘယ်လောက်ပဲ အန္တရယ်များပါစေ။ အဲ့ဒီဒေသတွေထိ သွားပါမယ်။ ကိုယ်တိုင်ကိုယ်ကျသွားပြီး ကိုယ်တိုင်ကိုယ်ကျ လှူဒါန်းပါမယ်။ ကျွန်တော်တို့မန္တလေးမှာ ကြုံရာကျပန်း လမ်းဘေးတွေမှာ Underground က ကျန်တဲ့အဆိုတော် ၃ယောက်၊ ၄ယောက်လောက်နဲ့လမ်းဘေးမှာ သီချင်းဆိုမယ်။ အလှူခံမယ်။ အဲ့ဒါကို ဒီလထဲမှာလုပ်မယ်။ ပြီးရင်ကျွန်တော်တို့ကလေးမြို့ကို သွားပြီး လှူဒါန်းဖို့လဲရှိပါတယ်။ ဒီလထဲမှာ တခြားအလုပ်တွေကိုရပ်ပြီး ဒီရေဘေးအတွက် လုပ်သွားမယ်။ တစ်တိုင်းတစ်ပြည်လုံးလဲ တတ်နိုင်တဲ့ဖက်ကနေ ဒုက္ခသည်တွေအတွက် ကူညီပေးပါလို့တောင်းဆိုပါတယ်။
-လက်ရှိမှာအောင်မြင်မှုကလဲ အရှိန်အဟုန်ကောင်းနေသလို အချစ်ရေးနဲ့ပတ်သက်ပြီးလဲ အတိအလင်း တင်ထားတာတွေတွေ့နေရတယ်။ အဲ့ဒီအပိုင်းလေးကိုလဲသိချင်ပါတယ်။
အချစ်ရေးနဲ့ပတ်သက်ပြီးအားလုံးကတော့ အစပိုင်းမှာ ၀ိုင်းပြောကြတယ်။ အချစ်ရေးကို မစဉ်းစားပါနဲ့ဦး။ ဒါပေမဲ့ အားလုံးလဲသိတဲ့အတိုင်း ကျွန်တော့်အချစ်ရေးနဲ့ပတ်သက်ပြီးပွင့်ပွင့်လင်းလင်းပဲ ဖွင့်ဟထားပါတယ်။ ဘာလို့လဲဆိုတော့ ကျွန်တော်တို့က ဆော်ကြည်ချင်ရုံလောက်နဲ့ ရက်ပ်ဆိုနေတဲ့ကောင်တွေ မဟုတ်ပါဘူး။ ကျွန်တော်ချစ်သူ မရှိဘူးဆိုပြီးနေနေလဲ ရပါတယ်။ အဲ့ဒီလိုမျိုးနေနေရင် ကျွန်တော့ဖက်ကမိန်းကလေးကို ကျွန်တော်တန်ဖိုးမထားရာ ကျပါလိမ့်မယ်။ ကျွန်တော့ဖက်က မိန်းကလေးရဲ့ ဂုဏ်သိက္ခာကို ငဲ့ကွက်ပြီး ချစ်သူရှိရင်ရှိတယ့်အတိုင်းပဲ ဖွင့်ဟပြပါတယ်။ ကျွန်တော့်ပရိသတ် ကျွန်တော့်ကိုချစ်တယ်ဆိုတာ ကျွန်တော့်အနုပညာနဲ့ ကျွန်တော့် စိတ်ဓာတ်ကိုချစ်ကြတာဖြစ်ပါလိ့မ်မယ်။ လူကိုတော့ ချစ်လိမ့်မယ် မထင်ပါဘူး။ ဒါပေမဲ့ ကျွန်တော့မှာ ချစ်သူရှိနေပေမဲ့လဲ ကျွန်တော့်ချစ်သူထက် ကျွန်တော့ပရိသတ်ကိုပိုပြီးချစ်ပါတယ်။ ကျွန်တော့ချစ်သူထက် ကျွန်တော့ပရိသတ်ကို ပိုပြီးဦးစားပေးပါတယ်။ ကျွန်တော့ချစ်သူကလဲ နားလည်မှုရှိပါတယ်။
-အစ်ကို့ပရိသတ်တွေရော အစ်ကို့ဂီတလှုပ်ရှားမှုနဲ့ပတ်သက်ပြီးဘယ်လိုမျိုးပြောပြချင်ပါသလဲ။
ကျွန်တော်ရှေ့ဆက်ပြီးတော့ ကျွန်တော်အသက်ရှင်နေသရွေ့ ဂီတလောကမှာ အမြဲတမ်း အနုပညာမြောက်တဲ့စာသားတွေနဲ့ပရိသတ်ကိုဖျော်ဖြေပါ့မယ်။ ကျွန်တော့်ကိုယုံကြည်ရင် ကျွန်တော့ကို ဆက်လက်ပြီးအားပေးပေးပါဦးလို့။ G Fatt ရင်ထဲမှာ ပရိသတ်အမြဲတမ်း ရှိပါတယ်။

http://www.trend.com.mm/2015/08/03/hip-hop-7327