ခြေပုန်းခုတ်သူ သတင်း အချက်အလက်များ ပေါက်ကြား

အိမ်ထောင်သည်များ ခြေပုန်း ခုတ်နိုင်အောင် ချိတ်ပေးသော Ashley Madison ၀က်ဘ်ဆိုက်ဒ်သည် ပြီးခဲ့သည့် လပိုင်းက ဟက်ကာ တိုက်ခိုက်ခံခဲ့ရရာ ယခုအခါ ထိုဝက်ဘ်ဆိုက်ဒ်ကို အခကြေးငွေပေးကာ အသုံးပြုနေသူများ၏ နာမည်၊ နေရပ်၊ ဘဏ်ကတ် စသော ကိုယ်ရေး အချက်အလက်များ အွန်လိုင်းပေါ် ဖွင့်ချခံနေရပြီဟု သိရသည်။

Ashley Madison မပိတ်လျှင် သုံးသူ အချက်အလက်များ ဖွင့်ချမည်ဟု ဟက်ကာများက ပြီးခဲ့သည့် လကတည်းက သတိပေးထားရာ ၀က်ဘ်ဆိုက်ဒ်သည် ဆက်လက် လည်ပတ်နေသဖြင့် ယခုကဲ့သို့ ဖွင့်ချလိုက်ခြင်း ဖြစ်ကြောင်း သိရသည်။ ဟက်ကာများသည် Ashley Madison သုံးသူ သတင်း အချက်အလက် စုစုပေါင်း (၉ ဒသမ ၇) ဂစ်ဂါဘိုက်စာ အွန်လိုင်းပေါ် တင်လိုက်ခြင်း ဖြစ်ကြောင်း နည်းပညာ သတင်းဝက်ဘ်ဆိုက် Wired က ဖော်ပြသည်။

Ashley Madison ၀က်ဘ်ဆိုက်ဒ်ကို ကနေဒါ အခြေစိုက် Avid Life Media က ထူထောင်ထားခြင်း ဖြစ်သည်။ ဟက်ကာ တိုက်ခိုက်ကာ သတင်း အချက်အလက် ခိုးယူသွားသူများကို ဖော်ထုတ် ဖမ်းဆီးနိုင်ဖို့ ဥပဒေ အဖွဲ့အစည်းများနှင့် ပူးပေါင်း ဆောင်ရွက်လျက် ရှိကြောင်း Avid Life Media ဆိုသည်။

Ashley Madison ၀န်ဆောင်မှုသည် နိုင်ငံပေါင်း (၅၀) ကျော်သို့ ဖြန့်ကြက်ထားပြီး သုံးစွဲသူ (၃၇) သန်းကျော် ရှိသည်။ ဗြိတိန် တစ်နိုင်ငံတည်းကချည်း တစ်သန်းကျော် ပါဝင်သည်။ အိမ်ထောင်သည်များ အနေဖြင့် အိမ်ထောင်ဘက် မသိအောင် တိတ်တိတ်ပုန်း အသစ်ရှာလိုပါက Ashley Madison ၀က်ဘ်ဆိုက်ဒ်သို့ အခကြေးငွေသွင်း၍ ၀င်ရောက်ပြီး အလားတူ ခြေပုန်းခုတ်သော အိမ်ထောင်သည်များနှင့် တွေ့ဆုံကာ ဆန္ဒအကောင်အထည် ဖော်နိုင်ကြသည်။

ဟက်ကာများက သုံးသူ၏ သတင်း အချက်အလက်များ ဖွင့်ချလိုက်သောကြောင့် ခြေပုန်းခုတ်သူတို့ ဘူးပေါ်သလို ပေါ်ကြသလို Ashley Madison ၀က်ဘ်ဆိုက်ဒ်သည်လည်း သုံးသူများ စွန့်ခွာခြင်းနှင့် ကြုံရဖွယ် ရှိနေသည်။
messenger news journal