ထိုင်းနိုင်ငံရောက် မြန်မာအမျိုးသမီးငယ်အား ထိုင်းခြောက်ဦးမှ အဓမ္မပြုကျင့်

 (ယင်းအမှုအား အမှုမှန်ပေါ်ပေါက်ရေးနှင့် ယင်းသို့လုပ်ရပ်များ လုံးဝရပ်တန့်သည်အထိ ဆောင်ရွက်သွားမည်ဟု ဆရာတော် ဦးဇောတိကဆို)
Tuesday, June 9, 2015
ထိုင်းနိုင်ငံရှိ ၁၉ နှစ်အရွယ် မြန်မာအလုပ်သမား အမျိုးသမီး တစ်ဦးအား အဓမ္မပြုကျင့်ခဲ့သည့် ထိုင်းလူငယ် ခြောက်ဦးအား ဖမ်းဆီးရမိစေရန်နှင့် အမှုမှန်ပေါ်ပေါက်သည် အထိ ဖော်ထုတ်ဆောင်ရွက်ပေးသွားမည်ဖြစ်ကြောင်း ထိုင်းနိုင်ငံရောက် မြန်မာနိုင်ငံသားများ အဖွဲ့မှ ဆရာတော် ဦးဇောတိကက မိန့်ကြားသည်။
“အခုလို ဖြစ်သွားတဲ့အတွက် ဦးဇင်းတို့ ဒီအမှုကို အဖြစ်မှန် ပေါ်ပေါက်ပြီး တရားခံ ဖော်ထုတ်နိုင် ဖို့အထိ ဆောင်ရွက်သွားမှာပါ။ ဘာ့ကြောင့်လဲဆိုတော့ နောင်လာနောက်သား မြန်မာ လူငယ်ကလေးတွေ၊ မိန်းကလေးတွေ အခုလို မဖြစ်ရအောင်လို့ အဓိက ရည်ရွယ်ပြီး အမှုမှန်ပေါ်ပေါက်အောင် ဆောင် ရွက်သွားမှာ ဖြစ်ပါတယ်”ဟု ထိုင်းနိုင်ငံရောက် မြန်မာနိုင်ငံသား တစ်ဦး ဖြစ်သည့် ဆရာတော် ဦးဇောတိကမှ Tomorrowသို့ ပြောသည်။
အဆိုပါ အမှုနှင့် ပတ်သက်ပြီး မြန်မာသံရုံးမှတစ်ဆင့် ထိုင်းနိုင်ငံရှိ တာဝန်ရှိသည့် ပုဂ္ဂိုလ်များကို ထိထိရောက်ရောက် အရေးယူပေးရန်နှင့် အမှုမှန် ပေါ်ပေါက်ရန်အတွက် ထိုင်းနိုင်ငံရှိ ထိုင်းထောက်လှမ်းရေး အဖွဲ့နှင့် ပူးပေါင်းပြီး အပူတပြင်း ဆောင်ရွက်နေကြောင်း ထို့ပြင် ဆရာဝန်များမှလည်း သေသေချာချာ ဆေးကုသမှုများ ပေးနေကြောင်း ဆရာတော်မှ လက်ရှိ အခြေအနေအား ဆက်လက်မိန့်သည်။
“ထိုင်းလူမျိုး ခြောက်ဦးလို့ ကောင်မလေးက ပြောပြလို့သိရတယ်။ သူတို့အချင်းချင်း ထိုင်းလိုပဲ ပြောကြတယ်။ မြန်မာလူမျိုးတွေ မဟုတ်ဘူးဆိုတာတော့ သူသေချာသိတယ်လို့ ပြောတယ်။ ဒီလိုမျိုး ရင်နာစရာ အဖြစ်အပျက်တွေဟာ မြန်မာ အမျိုးသမီးလေးတွေ အတွက် ပထမဆုံးအကြိမ် မဟုတ်ဘဲ မကြာခဏ ဖြစ်လေ့ရှိပြီး ဘ၀ပျက်ခဲ့တာ မနည်းတော့ဘူး။ အဲဒါကြောင့် ဒီအမှုကို ထိထိရောက်ရောက် ကိုင်တွယ်သွားမှာပါ”ဟု ဆရာတော် ဦးဇောတိက,က မိန့်ကြားခဲ့သည်။
ထိုင်းနိုင်ငံ မဟာချိုင်နယ်မြေတွင် ၁၉ နှစ်အရွယ်ရှိ မြန်မာ အလုပ်သမား အမျိုးသမီးသည် ဇွန် ၃ ရက် နံနက် ၄ နာရီခွဲတွင် အလုပ်မှ စက်ဘီးဖြင့် အိမ်သို့အပြန်၌ လူငယ်ခြောက်ဦးက စက်ဘီးကို တွန်းလှဲပြီး ကားပေါ်သို့ အတင်း အဓမ္မခေါ်တင်သွားကာ လူပြတ်သော နေရာတွင် ခြောက်ဦး စလုံးမှ အလိုမတူဘဲ အဓမ္မပြုကျင့် စော်ကားခဲ့ခြင်းဖြစ်ကြောင်း၊ ထိုသို့စော်ကားမှုအား ပြန်လည်ခုခံသောကြောင့် ၄င်းခြောက်ဦးမှ မျက်နှာနှင့် ခန္ဓာကိုယ် အနှံ့ထိုးကြိတ် ကန်ကြောက်ခဲ့ခြင်းကြောင့် ဆေးရုံတွင် တက်ရောက် ဆေးကုသမှု ခံယူလျက်ရှိကြောင်း သိရသည်။

ဇေယျာ
Tomorrow