လားရှိုးတွင် ပြန်ပေးဆွဲ လူသတ်ခဲ့သော တရုတ်နိုင်ငံသားများကို လွှဲပြောင်းပေးရန် တောင်းဆို

ရန်ကုန်၊ ဇန်နဝါရီ ၁၉
လားရှိုးမြို့နယ်တွင် စီးပွားရေး လုပ်ငန်းရှင်ကြီးတစ်ဦးကို တရုတ်နိုင်ငံသို့ ပြန်ပေးဆွဲခဲ့ပြီး လူသတ်မှု ကျူးလွန်ခဲ့သော တရုတ်နိုင်ငံသားလေးဦး၏ အမှုကို မြန်မာနိုင်ငံ တရားစီရင်ရေး ဥပဒေဖြင့် အရေးယူနိုင်ရန် မြန်မာနိုင်ငံရဲတပ်ဖွဲ့က တရုတ်နိုင်ငံ ရဲတပ်ဖွဲ့သို့ တောင်းဆိုထားကြောင်း လားရှိုးမြို့မ ရဲစခန်းထံမှ စုံစမ်းသိရှိရသည်။

“တရားခံတွေကို လွှဲပြောင်းပေးဖို့ တောင်းဆိုထားတာ ဆယ်ရက်ကြာပြီ။ သူတို့ဘက်က ခုထိဘာအကြောင်းမှ မပြန်သေးဘူး။ လူသတ်မှုဖြစ်စဉ် စစ်ဆေးပေါ်ပေါက်ချက်အရ ဒီဘက်ခြမ်းမှာ ဖြစ်ပွားခဲ့တာကြောင့် အမှုမှန် စစ်ဆေးဖော်ထုတ်နိုင်အောင် လွှဲပြောင်းပေးဖို့ တောင်းဆိုရတာပါ” ဟု လားရှိုးမြို့နယ် အမှတ် (၂) နယ်မြေရဲစခန်းမှူး ရဲအုပ်စန်းယုက ပြောကြားသည်။
လားရှိုးမြို့ မျက်နှာဖုံးစာရင်းဝင် သတ္တုတွင်းလုပ်ငန်းများနှင့် Happy Time ကလေးကစားကွင်း ပိုင်ရှင် ဦးမျိုးမြင့်ကို ၂၀၁၄ ခုနှစ် ဒီဇင်ဘာလ ၁၂ ရက်နေ့က တရုတ်နိုင်ငံသား အမျိုးသားလေးဦးက ပြန်ပေးဆွဲ ခေါ်ဆောင်သွားရာမှ ဒီဇင်ဘာလ ၁၄ ရက်နေ့က တရုတ်နိုင်ငံ ဝမ်တိန် မြို့ဝင် စစ်ဆေးရေးဂိတ်၌ သေဆုံးနေသော ဦးမျိုးမြင့်၏ ရုပ်အလောင်းနှင့်အတူ အဆိုပါ အမျိုးသားလေးဦးကို တရုတ်ရဲတပ်ဖွဲ့က ဖမ်းမိခဲ့ကြောင်း ရှမ်းပြည်နယ် ရဲတပ်ဖွဲ့မှူး ရုံးထံမှ သိရှိရသည်။
“သေဆုံးခဲ့သူရဲ့ ညီဖြစ်သူက လွန်ခဲ့တဲ့ ရှစ်နှစ်က တရုတ်နိုင်ငံသား တစ်ယောက်နဲ့ သတ္တုတွင်း လုပ်ငန်းတစ်ခု ရှယ်ယာလုပ်ကိုင်ခဲ့တယ်။ လုပ်ငန်း အရှုံးပေါ်ခဲ့တာကြောင့် တရုတ်နိုင်ငံသားကို နစ်နာကြေးငွေ ယွမ်သိန်း ၂၀ ကို တရုတ်သံရုံးမှာ ပေးလျော်ခဲ့ပြီးပြီ။ ဒါကို သူတို့ဘက်က မကျေနပ်ဘဲ အစ်ကိုဖြစ်သူကို ပြန်ပေးဆွဲ ငွေထပ်တောင်းမလို့ ကြံစည်ရာကနေ လူသတ်မှုပါ ကျူးလွန်ခဲ့တယ်လို့ သိရတယ်” ဟု ရဲအုပ်စန်းယုက ရှင်းပြသည်။
အဆိုပါ သေဆုံးသူ၏ ရုပ်အလောင်းကို ဒီဇင်ဘာလ ၁၄ ရက်နေ့က တရုတ်-မြန်မာနယ်စပ် မူဆယ်မြို့သို့ ပြန်လွှဲပေးခဲ့သော်လည်း ရွှေလီဆေးရုံတွင် စစ်ဆေးထားသည့် ဆေးစာမှာ တစ်လကျော်ကြာသည်အထိ မထွက်ရှိသေးကြောင်း၊ ပြစ်မှုကျူးလွန်ခဲ့သည့် လားရှိုးမြို့နယ်တွင် ပြန်ပေးဆွဲ လူသတ်မှုဖြစ်စဉ်ကို ကျူးလွန်သူများကိုယ်တိုင် သရုပ်ပြစစ်ဆေးရန် မြန်မာနိုင်ငံ ရဲတပ်ဖွဲ့က စီစဉ်ခဲ့သော်လည်း တရုတ်နိုင်ငံရဲတပ်ဖွဲ့က ခွင့်မပြုခဲ့ကြောင်း လားရှိုး အမျိုးသားလွှတ်တော် ကိုယ်စားလှယ် ဦးစိုင်းစံမင်းက ပြောကြားသည်။
“ရဲတပ်ဖွဲ့က ပြစ်မှုကျူးလွန်သူတွေကို ဒီဘက်လွှဲပေးဖို့ တောင်းဆိုပေမယ့် သူတို့ဘက်က ငြင်းနေတယ်လို့ ကြားမိတယ်။ တရုတ်နိုင်ငံရဲ့ ဥပဒေအရ ကြိုတင်ကြံစည် လူသတ်မှုဆို သေစားသေစေလို့ ကြားသိရပေမယ့် ကိုယ့်နိုင်ငံဘက်ခြမ်းမှာ ဖြစ်ပွားခဲ့တဲ့ ရာဇဝတ်မှုကို ဒီဘက်နိုင်ငံမှာပဲ စစ်ဆေးမယ်ဆို ပိုပြီးပွင့်လင်းမြင်သာလိမ့်မယ်လို့ ယူဆတယ်” ဟု ၎င်းက ဆက်လက်ရှင်းပြသည်။
လားရှိုးမြို့မှ စီးပွားရေးလုပ်ငန်းရှင်ကို ပြန်ပေးဆွဲ လူသတ်မှုကို စေခိုင်းခဲ့သူမှာ တရုတ်နိုင်ငံသား မော်ရီရှင်းဖြစ်ပြီး ၎င်းနှင့်အတူ ပြစ်မှုကျူးလွန်ရာတွင် ပါဝင်ခဲ့သော ကြေးစားလူမိုက်များကို တရုတ်နိုင်ငံ ရွှေလီရဲတပ်ဖွဲ့က ပုဒ်မများဖွင့်ကာ အရေးယူထားပြီး လားရှိုးမြို့နယ် အမှတ် (၂) နယ်မြေ ရဲစခန်းကလည်း (ပ) ၁၅၈/ ၁၄၊ ပုဒ်မ ၃၀၂/၃၆၄ တို့ဖြင့် အမှုဖွင့် စုံစမ်းစစ်ဆေးနေကြောင်း ရှမ်းပြည်နယ် ရဲတပ်ဖွဲ့မှူး ရုံးထံမှ သိရှိရသည်။

The Voice
20 January 2015