စံပယ်တောင် ကြေးစင်တောင် မြေသိမ်းခံ ရွာစာရင်း ပေးပို့

စစ်ကိုင်းတိုင်း ယင်းမာပင်ခရိုင်မှာ ဖော်ဆောင်နေတဲ့ စံပယ်တောင် -ကြေးစင်တောင် ကြေးနီ စီမံကိန်းမှာ မြေယာတွေ အသိမ်းခံရတဲ့ ရွာ ၁ဝ ရွာ မြေစာရင်းကို မြေစာရင်း ဦးစီး ဌာနက ရွာတွေကို ပေးပို့ထားပြီလို့ ဒေသခံတွေက ပြောပါတယ်။

ဒါပေမဲ့ တောင်သူ တဦးချင်းစီရဲ့ စာရင်း မပါသေးဘူးလို့လည်း ပြောပါတယ်။

လက်ပံတောင်းတောင် ကြေးနီစီမံကိန်း စုံစမ်း စစ်ဆေးရေး ကော်မရှင် အစီရင်ခံစာမှာ စံပယ်တောင်-ကြေးစင်တောင် စီမံကိန်းအတွက် မြေယာ အသိမ်းခံ ထားရသူတွေကို လက်ပံတောင်းတောင် စီမံကိန်း အတိုင်းလျော်ကြေးပေးဖို့ ဆိုတဲ့အချက် ပါရှိပါတယ်။ ဒီအတွက်ညှိနှိုင်းနေတာဖြစ်ပြီး ပထမပိုင်းတုန်းက မြေစာရင်းပျောက်ဆုံးနေကြောင်း မြေစာရင်းဦးစီးဌာနက ပြောဆိုခဲ့ပြီး၊ အခုတော့ မြေစာရင်းပေးပို့ခဲ့တာဖြစ်ကြောင်း ဒေသခံတွေရဲ့ ကိုယ်စားလှယ်တစ်ဦးဖြစ်သူ ကံကုန်းရွာက ဦးတင့်အောင်စိုးက ပြောပါတယ်။

စံပယ်တောင်-ကြေးစင်တောင်ကြေးနီစီမံကိန်းကို ယန်စီ-မြန်မာကုမ္ပဏီက ဖော်ဆောင်နေပေမဲ့ မြေယာ ကိစ္စဆွေးနွေးရာမှာ မပါဝင်ဘူးလို့လည်းပြောပါတယ်။ စီမံကိန်းအတွက် မြေဧက ၆၃ဝဝ ကျော် သိမ်းယူထားပြီး၊ တချို့လျော်ကြေးရပေမဲ့ လျော်ကြေးမရသေးသူတွေလည်းရှိတယ်လို့ ပြောပါတယ်။

"အားလုံးပေါင်း ရွာ ၁ဝ ရွာ၊ ဧက ၆၃ဝ၅ ကို အဲ့ဒီ စီမံကိန်းအတွက် ပြန်လုပ်သွားတာရှိတယ်လို့လည်း ပြောတယ်၊ နောက် ဒုန်းတော ရွာသာဘက်မှာ သူတို့ပြန်ပေးထားတာရှိတယ်"

လျော်ကြေးပေးထားတဲ့မြေနဲ့ ပြန်ပေးထားတဲ့မြေဧကတွေကို နုတ်ပြီး၊ ကျန်တဲ့ မြေယာတွေအတွက် လျော်ကြေးကိစ္စညှိနှိုင်းနေပါတယ်။ ဒေသခံတွေဘက်ကလည်း မြေစာရင်းပြုစုထားတာရှိပြီး အခု ရရှိတဲ့ မြေစာရင်းနဲ့ နီးစပ်တယ်လို့လည်း ပြောကြပါတယ်။

RFA Burmese
https://www.facebook.com/pages/RFA-Burmese/39218993127