လွှတ်တော် ကိုယ်စားလှယ်တွေဟာ ပြည်သူတွေထံက မဲကိုတောင်းပြီဆိုရင် ပြည်သူလူထု အတွက် ပြန်လုပ်ပေး ရမယ်ဆိုတဲ့ ကတိကို ပေးထားတာ ဖြစ်ကြောင်းနဲ့ အဲဒီလို ပြန်လုပ်မပေး နိုင်ဘူးဆိုရင် လွှတ်တော်ကိုယ်စားလှယ်အဖြစ် အရွေးခံစရာမလိုကြောင်း အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်က ဒီကနေ့ ပြောပါတယ်။
ရန်ကုန်တိုင်း ကော့မှူးမြို့ အောင်ဇဗ္ဗူအားကစားကွင်းမှာ ကျင်းပတဲ့ ကော့မှူးမြို့တည်နှစ် ၅၀ ပြည့် အခမ်အနား မိန့်ခွန်းပြောကြားရာမှာ ဒေါ်အောင်ဆန်းစုကြည်က အဲဒီလို ပြောခဲ့တာပါ။
"လောကကြီးမှာ ဘာမှအလကားမရဘူး၊ အလကားလည်း မယူချင်ရဘူး၊ ပြည်သူရဲ့မဲတွေကို တောင်းလိုက်ပြီဆိုရင် ပြည်သူကိုကိုယ်က ဘာပြန်ပေးမလဲဆိုတာ အဲဒါပထမဦးဆုံးစဉ်းစားရမယ်၊ ပြန်ပေးနိုင်တဲ့ အရည်အချင်းမရှိလို့ရှိရင် ဒီမဲကိုလည်း တောင်းစရာမလိုဘူး၊ ကိုယ်စားလှယ်အဖြစ်နဲ့လည်း ရွေးခံစရာမလိုဘူး"
ဒေါ်အောင်ဆန်းစုကြည်က ကော့မှူးမြို့နယ် ဖွံ့ဖြိုးတိုးတက်ဖို့အတွက်ဆိုရင် မြို့နယ်သူမြို့နယ်သားတွေ ကိုယ်တိုင်က ပူးပေါင်းပါဝင်မှ တိုးတက်မှုကိုရမှာဖြစ်ကြောင်း ပြောပါတယ်။
ဒေါ်အောင်ဆန်းစုကြည်ဟာ ကော့မှူးမြို့မှာရှိတဲ့ ဒေါ်ခင်ကြည်ဖောင်ဒေးရှင်းက ဖွင့်လှစ်ထားတဲ့ ချက်နည်းပြုတ်နည်းနဲ့ ဟိုတယ်စီမံခန့်ခွဲမှု သင်တန်းကျောင်း HCTA ဟိုတယ်သင်တန်းကျောင်းကိုလည်း သွားရောက်ခဲ့ပါတယ်။
RFA Burmese
https://www.facebook.com/pages/RFA-Burmese/39218993127
No comments:
Post a Comment