မြန်မာပြည်နှင့် အလုပ်လက်မဲ့ ပြဿနာ ဖြေရှင်းမယ်ဆိုရင်

လက်တလော လူပြောများတဲ့ အလုပ်လက်မဲ့ အကြောင်းနဲ့ ပက်သက်လို့ စာရေးသူ အမြင်ကို မျှဝေ ပါရစေ။ Trading Economic ဝဘ်ဆိုဒ်ရဲ့ ဖော်ပြချက်အရ မြန်မာပြည်မှာ သက္ကရာဇ် ၂၀၁၃ ခုနှစ်က အလုပ်လက်မဲ့ ရာခိုင်နှုန်းဟာ ၄.၈ ရှိပါတယ်။ ဒီတော့ လူဦးရေ သန်း ၅၀ မှာ ၅ သိန်းသာ အလုပ်လက်မဲ့ ဖြစ်ခြင်း ဖြစ်ပါတယ်။ ဒီစာရင်းကို မှန်ကန်တယ်လို့ ယူဆလို့ မရ ပါဘူး။ ပြည်တွင်း မီဒီယာ အချို့ရဲ့ ဖော်ပြချက်အရ ကတော့ အသက် ၁၈ နှစ်ကနေ ၂၄ ကြားမှာတောင် ၄ သန်းလောက် ရှိကြောင်း ဆိုပါတယ်။ ဘယ်လိုပဲ ဖြစ်ဖြစ် မြန်မာပြည်မှာ အလုပ်လက်မဲ့ များတယ်ဆိုတာ နိုင်ငံတကာကို မမှီပါဘူး။

'ဖွံ့ဖြိုးပြီး နိုင်ငံတွေမှာ အလုပ်လက်မဲ့ ပိုများ'

ကမ္ဘာမှာ အလုပ်လက်မဲ့ အများဆုံး တိုက်က ဥရောပ တိုက်ဖြစ်ပြီး ဂရိ၊ စပိန်၊ ပိုလန်၊ အိုင်ယာလန် အစရှိသဖြင့် တို့ ဦးဆောင်နေပါတယ်။ အာဖရိက တိုက်မှာ ဆိုရင် ဆင်းရဲတဲ့ နိုင်ငံတွေ မပါဝင်ပဲ ချမ်းသာတဲ့ နိုင်ငံ တစ်ခု ဖြစ် တဲ့ တောင်အဖရိက ထိပ် ဆုံး ၅ နိုင်ငံ စာရင်းထဲမှာ ပါဝင်နေခြင်း ဖြစ်ပါတယ်။ သူတို့ကျတော့ ရာခိုင်နှုန်းက ၂၀ ကျော် ၃၀ ကပ်နေပါပြီ။ Highest Unemployement Countries လို့ ရိုက်လို့ ရှာလိုက်ရင် နိုင်ငံအလိုက်နဲ့ ရာခိုင်နှုန်း အလိုက် ဖော်ပြ ထားပါလိမ့်မယ်။ ဒီတော့ လက်ရှိ မြန်မာပြည်မှာ အလုပ်လက်မဲ့တွေ ဖြစ်နေတယ် ကြုံနေတယ် ဆိုတာ နိုင်ငံတကာကို မမှီသေး ပါဘူး။ အမေရိကန် ဆိုရင် ၆.၈ ရာခိုင်နှုန်း ရှိပြီး ဗြိတိန်က ၆.၅ ရာခိုင်နှုန်း ရှိပါတယ်။ ဒါကြောင့်မို့ သမ္မတ အဖြစ် ဝင်အရွေးချယ်ခံသူများက အလုပ်ဖန်တီးပေးမယ် ဆိုတဲ့ အချက်နဲ့ မဲဆွယ်နေခြင်း ဖြစ်ပါတယ်။

'နိုင်ငံရေး ပေါ်လစီလည်း သက်ရောက်မှုရှိ'

နိုင်ငံရေး ပေါ်လစီ အရလည်း လုပ်သားအပေါ် သက်ရောက်မှု ရှိပါတယ်။ ဥရောပ နဲ့ အမေရိက တို့မှာ အလုပ်လက်မဲ့ များတယ် ဆိုတာ သူတို့ နိုင်ငံသားတွေ အပေါ် ကူညီထောက်ပံ့မှုတွေ များစွာ ရှိနေလို့ ပါ။ သူတို့ နိုင်ငံသားမှန်ရင် အလုပ်မရှိရင် အစိုးရဆီကနေ ထောက်ပံ့ကြေး ယူတဲ့ စနစ်နဲ့ နေထိုင်လို့ ရတာတွေလည်း ရှိပါတယ်။ ဒါကို နိုင်ငံခြား ရောက်နေတဲ့ မြန်မာတို့ ပိုသိ ပါလိမ့်မယ်။ မဟုတ်လည်း မိဘတွေက ရရှိတဲ့ လူမှုဖူလုံကြေး စရိတ်/ ပင်စင်စရိတ် ကိုလည်း မျှသုံးလို့ နေထိုင်နေတာတွေလည်း ရှိပါတယ်။ ယင်းကဲ့သို့ နိုင်ငံသား တို့ အပေါ် သက်သာချောင်ချိ စေခြင်းကလည်း အလုပ်လက်မဲ့ ထွက်ရှိဖို့ အလားအလာတွေ အများကြီး ဖြစ်စေ ပါတယ်။ တရုတ်ပြည်ရဲ့ အလုပ်လက်မဲ့ ရာခိုင်နှုန်းက လူဦးရေရဲ့ ၃ ရာခိုင်နှုန်း ဝန်းကျင်ပဲ ရှိပါတယ်။ လူ အယောက် တစ်ရာမှာ ၃ ယောက်သာ အလုပ်မရှိတာ ဖြစ်ပြီး လူတိုင်းနီးပါး အလုပ်လုပ်ကြတဲ့ တိုင်းပြည် ဖြစ်ပါတယ်။ အလုပ်က ရတဲ့ ဝင်ငွေသာ ကွာသွားမယ် အားလုံး အလုပ်လုပ်ကြ ပါတယ်။ ဒါကြောင့်မို့ အလုပ်လက်မဲ့ ဖြစ်မှု မဖြစ်မှုက နိုင်ငံရေး ပေါ်လစီကနေလည်း များစွာ သက်ရောက်မှု ရှိပါတယ်။

'လုပ်ငန်း ကဏ္ဍလည်း သက်ရောက်မှုရှိ'

ကား စက်ရုံ တစ်ခုမှာ လုပ်သား ၁ထောင် လိုအပ်ပေမယ့် ကား စက်ရုံမှာ သုံးမယ့် ဆော့ဖ်ဝဲကို ထုတ်လုပ်တဲ့ ကုမ္ပဏီက လူ တစ်ထောင် မလိုအပ် ပါဘူး။ ၁၀ ယောက် နဲ့လည်း လုပ်လို့ ရပါတယ်။ ဆိုလိုရင်းက ကုန်ပစ္စည်း ထုတ်လုပ်တဲ့ လုပ်ငန်း၊ လူအင်အား များစွာ လိုအပ်တဲ့ စက်မှု လုပ်ငန်းတွေ များပြားခြင်းကလည်း အလုပ်လက်မဲ့ကို နည်းစေ ပါတယ်။ တရုတ်ပြည်ဟာ တွင်းထွက်လုပ်ငန်း အပြင် စက်မှု လုပ်ငန်းမျိုးစုံ ထွန်းကား တာကြောင့် အလုပ်များစွာ ပေးနိုင်ပါတယ်။ သယံဇာတနည်း၊ စက်မှု ကုန်ထုတ် လုပ်ငန်း နည်းတဲ့ နိုင်ငံမှာတော့ အလုပ် ဖန်တီးပေးနိုင်မှု နည်းပါလိမ့်မယ်။ လက်ရှိ မြန်မာပြည်ဟာ ဆိုရင် သယံဇာတ အားဖြင့် ရှိပေမယ့် ကုန်ထုတ်လုပ်ငန်း အရေအတွက် နည်းပါးနေသေးတာကြောင့် အလုပ်အကိုင် အခွင့်အလမ်းတွေ ဖန်တီးပေးရာမှာ အခက်အခဲ ရှိပါတယ်။

'ပညာရေးလည်း သက်ရောက်မှု ရှိ'

ဒီမှာ ပြောစရာ များစွာ ရှိပါတယ်။ အများစုက ပညာရေးကို အပြစ်တင်ကြ ပါတယ်။ မြန်မာပြည် ပညာရေး စနစ်က ပေါက်ဖွားလာသူများ အရည်အချင်း မပြည့်ဝခြင်းကြောင့် အလုပ်လက်မဲ့ တိုးစေကြောင်း ဆိုပါတယ်။ ဒါဟာ မှားပါတယ်။ စာရေးသူဟာ နိုင်ငံတကာ ပညာရေးနဲ့ ထိတွေ့ဖူးပါတယ်။ သူတို့ဆီမှာ သင်ကြားပေးမှု စနစ်က လက်ရှိ မြန်မာပြည်နဲ့ မကွာပါဘူး။ ဆရာ၊ဆရာမ တို့က နှုတ်တိုက် ရွတ်ပြီး အိမ်စာပေးလိုက်ပါတယ်။ ဒါပေမယ့် သာသွားတဲ့ အချက်က ပညာရေး ဆိုင်ရာ အထောက်အပံ့ပစ္စည်းများ စုံလင်စွာ ရှိနေခြင်း ဖြစ်ပါတယ်။ ဥပမာ တက္ကသိုလ်မှာ ဆိုရင် စာအုပ်ထဲက သင်ခန်းစာကို ဖတ်လာခိုင်းပြီး နောက်နေ့မှ အခန်းမှာ ဆွေးနွေးကြ ပါတယ်။ ဒီတော့ ကျောင်းသား များဟာ အိမ်ရောက်တာနဲ့ အင်တာနက်မှာ ရှာသူကရှာ၊ ကျောင်းစာကြည့်တိုက် မှာ ရှာသူကရှာနဲ့ အထောက်အပံ့ ပစ္စည်းများ ပြည့်စုံမှုကြောင့် တတ်မြောက်လွယ်ပါတယ်။ မြန်မာပြည်ကို ပြန်ကြည့် တဲ့အခါမှာ လက်တွေ့ ခန်းများ မရှိခြင်း၊ သင်ထောက်ကူ ပစ္စည်းများ မစုံလင်ခြင်း၊ ပြင်ပမှာလည်း လေ့လာရန် resource များ အလုံအလောက် မရှိခြင်းတို့ကို ဖြတ်သန်းပြီးတဲ့ ကျောင်းသား၊ ကျောင်းသူ များတိုင်း ကြုံတွေ့ဖူးမှာပါ။ ဒါကြောင့်မို့ ပညာရေးမှာ ပညာအတွက် သင်ထောက်ကူ ပစ္စည်းများ နည်းပါးခြင်းက အလုပ်လက်မဲ့ တိုးပွားစေမှုကို သွယ်ဝယ်ပြီး ထိခိုက်စေ ပါတယ်။

'အလုပ်လက်မဲ့ ပြဿနာ ဖြေရှင်းမယ် ဆိုရင်'

၁) ကုန်ထုတ်လုပ်ငန်း အပြင် အသေးစား၊ အလတ်စား စီးပွားရေး လုပ်ငန်း အမျိုးမျိုး ဖွံ့ဖြိုးတိုးတက်ခြင်း ကလည်း အလုပ် လက်မဲ့ ပြဿနာကို ဖြေရှင်း နိုင်ပါလိမ့်မယ်။

၂) ပညာရေးအတွက် လိုအပ်တဲ့ အထောက်အပံ့တွေ တိုးလာရင် အလုပ်လက်မဲ့ ပြဿနာ ဖြေရှင်းနိုင်ပါလိမ့်မယ်။

၃) နိုင်ငံရေး ပေါ်လစီအရအလည်း အလုပ်အကိုင် အခွင့်အလမ်းတွေ တိုးလာအောင် နည်းဗျူဟာများ ချမှတ် နိုင်ပါတယ်။

အဓိက ပြောချင်တဲ့ ဖြေရှင်းချက်က အဲ့ဒါတွေ မဟုတ်ပါ။ အမှန် တကယ် ဖြေရှင်းရမှာက သင်ကိုယ်တိုင် ဖြစ်ပါတယ်။ အဓိက ကတော့ မျော်လင့်ချက်ပါ။ အလုပ်လက်မဲ့ ဖြစ်တာ ပြဿနာလို့ ဆိုသူက ဆိုကြပါတယ်။ မဆိုသူက မဆိုကြပါဘူး။ မျော်လင့်ချက်မဲ့ တာထက် မျော်လင့်ချက်ထားက ပြဿနာပါ။ လူငယ်တွေကို မျော်လင့်ချက် ထားတတ်အောင် ဘယ်သူတွေ သင်ပေးခဲ့ ပါသလဲ။ သင်ကိုယ်တိုင်ပဲ မွေးဖွား လာတဲ့ စိတ်ဓာတ်ဖြစ်ပါသလား။ မျော်လင့်ချက်ဆိုတာ ထားရတာ မဟုတ်။ ဖန်တီးရတာ ဖြစ်ပါတယ်။ နိုင်ငံတကာ ပညာရှင် တစ်ဦးရဲ့ အဆိုအတိုင်း ပြော ရရင် အနာဂတ်ကို ခန့်မှန်းဖို့ အကောင်းဆုံး နည်းလမ်းက ယင်း အနာဂတ်ကို ယခုပင် ကိုယ်တိုင် ဖန်တီးဖို့ ဖြစ်ပါတယ်။ မြန်မာ လူမျိုးမှာ ‘ငါမျော်လင့်ချက်ပေးမှ၊ ငါဖန်တီးပေးမှ သူတို့တွေ ချမ်းသာမှာ၊ ရမှာ’ လို့ ထင်နေသူတွေနဲ့ ‘သူတို့တွေ အခွင့်အလမ်းပေးမှ ငါတို့ အလုပ်ရမယ်၊ အခွင့်အလမ်း ရမယ်’ လို့ ထင်မြင်နေတဲ့ လူတွေကြောင့်မို့ အလုပ်လက်မဲ့တွေ တိုးရခြင်း ဖြစ်ပါတယ်။

ဒီတော့ လက်ခုတ် ဆိုတာ နှစ်ဖက်တီးမှ မည်သလို အလုပ်လက်မဲ့ တိုးရတယ်ဆိုတာ တစ်ဖက်တည်းတင် မဟုတ် အလုပ်လက်မဲ့ ဖြစ်နေသူများ ကိုယ်တိုင်နဲ့လည်း သက်ဆိုင် ပါတယ်။ ဆရာ ဒေါက်တာ အောင်ထွန်းသက် ပြော ခဲ့ သလိုပဲ လူတွေ ကိုယ်ကိုယ်တိုင် Self-employ လုပ်တတ်ဖို့ လိုအပ်ပါတယ်။ အလုပ်မရှိရင် အလုပ်ဖန်တီးပေးဖို့ ကြိုးစားကြည့်ပါ။ ဘာမှ လုပ်စရာ မရှိရင် လုပ်လို့ ရတာ လုပ်ကြည့်ပါ။ ဗြိတိန်က အလုပ်သမား ဝန်ကြီး အမျိုးသမီး တစ်ဦး ပြောခဲ့သလို အလုပ်မရှိရင် ကော်ဖီဆိုင် စားပွဲထိုး လုပ်ပါလားလို့ ခပ်မာမာပဲ ဆိုထားပါတယ်။ အကြောင်းကတော့ ချမ်းသာတဲ့ နိုင်ငံမှာ မွေးဖွားတဲ့ လူငယ်တွေဟာ ဘဝကို နားမလည်တော့ပဲ အလုပ်တွေ ရွေးချင်တိုင်း ရွေးကြ ပါတော့တယ်။ အောင်မြင်သွားတဲ့လူတွေကို လေ့လာတဲ့ အခါမှာ အခက် အခဲကြား မှာ အောင်မြင်သူတွေကို လေ့လာကြည့်ပါ။ အလုပ်ရဖို့၊ အောင်မြင်ဖို့ အတွက် ဘွဲ့လက်မှတ်တွေ၊ certificate တွေ ဘယ်လောက်လိုကြောင်း သွားမေးရင် ရောက်ရာ ဘဝကနေ ရယ်နေ ပါလိမ့်မယ်။

အလုပ်လက်မဲ့ ဖြစ်တယ် မဖြစ်ဘူး ဆိုတာ စိတ်ဓာတ်နဲ့ပဲ ဆိုင်ပါလိမ့်မယ်။ ပညာရေးကိုလည် အပြစ် မတင်ပါနဲ့။ ယခု ထူးချွန်ထက်မြတ်နေသူများ ကို လေ့လာကြည့်ပါ။ သင့်ပတ်ဝန်းကျင် လုပ်ငန်းခွင်မှာ အောင်မြင်နေသူများ ကို ကြည့်ပါ။ ယင်းထဲက ၈၀ ရာခိုင်နှုန်းကျော်ဟာ ၁၀ တန်းကို ဂုဏ်ထူးတွေ တစ်စီတစ်တန်းနဲ့ အောင်ထားသူတွေ ဆိုတာ သင်လေ့လာမိပါလိမ့်မယ်။ လက်ရှိ နည်းပညာ လောကမှာ အောင်မြင်နေသူ အများစုဟာ မြန်မာပြည် ကွန်ပြူတာ တက္ကသိုလ် နဲ့ အခြားသော တက္ကသိုလ်များမှ ပညာသင်ကြားခဲ့သူများ ဖြစ်ပါ တယ်။ သူတို့ကို သွားမေးလျှင်လည်း ကျောင်းပညာရေး စနစ် ညံ့တယ် လို့ပဲ ဖြေလိမ့် မယ်။ ဒါပေမယ့် ပတ္တမြား စစ် နွံမနစ်ဆိုသလို တော်နေ သူများ ဖြစ်တာကြောင့် သူတို့တွေ အောင်မြင်ပါတယ်။ အကယ်၍ သင်လည်း ယင်းလူစားမျိုးတွင် ပါဝင်ပါက သင့်ကျောင်းတော် မကောင်းကြောင်း ပြောနေခြင်း ကို ရပ်တန့်ရန် လိုအပ် ပါလိမ့်မယ်။

အဓိက မြန်မာတို့ ဖြတ်သန်းခဲ့တဲ့ ပညာရေး စနစ်မှာ သင်ထောက်ကူ ပစ္စည်းကသာ အဓိက ပြောစရာ ဖြစ်ပါလိမ့်မယ်။ သင်ထောက်ကူ ပစ္စည်းနဲ့ အခြား resources သာ ဆုံရင် ကျူရှင်ဆိုတာတောင် ဖြစ် မလာ နိုင်ပါဘူး။ ထားပါ။ ယခု ပြောချင်သည့် အချက်က အလုပ်လက်မဲ့ ဖြစ်တယ် မဖြစ်ဘူး ဆိုတာ အထက်ကက တစ်ချက်ချင်းစီက အချက်တွေနဲ့ မဆိုင်ပဲ အလုပ်လက်မဲ့ ဖြစ်နေသူရဲ့ စိတ်ဓာတ်နှင့်သာ ဆိုင်ကြောင်း သက်သေပြခြင်း ဖြစ်ပါတယ်။ ဒီတော့ တိုင်းပြည်ကြီး ဖွံ့ဖြိုးတိုးတက်သွားလည်း အလုပ်လက်မဲ့ ပြဿနာ မရှိတော့ဘူးလို့ ထင်ရင် မှားသွားပါလိမ့်မယ်။ အလုပ်လက်မဲ့ဟာ ချမ်းသာတဲ့ နိုင်ငံတွေမှာ အဖြစ်များတာကို သတိထားစေလို ပါတယ်။

အနှစ်ချုပ်အားဖြင့် မျော်လင့်ချက်ထားခြင်းထက် မျော်လင့်ချက်များကို ဖြစ်အောင် ဖန်တီးကြဖို့ တိုက်တွန်းလို ပါတယ်။

အောင်ခမ်း (ရိုးရာလေး)