CREDIT
သတင်းစုံပျော်ဝင်အိုးကြီးတွင် ဖော်ပြထားသည့် သတင်း၊ဓာတ်ပုံများသည် သက်ဆိုင်သူများ၏မူပိုင်သာဖြစ်ကြောင်း အသိပေးအပ်ပါသည်။
အချစ်ရဲ့ သော့
![](http://3.bp.blogspot.com/-sDxuHeFECzA/U72an4UkhWI/AAAAAAAARuw/j1KpInce-WY/s1600/key.jpg)
လူတွေရဲ့ဦးနှောက်ထဲမှာ စကားတစ်ခွန်းကို သိုသိုသိပ်သိပ်ဖွက်ထားကြတယ်။ အဲဒီစကားက မေ့ပစ်လို့မရသလို တခြားလူကိုပြောလို့လည်း မရဘူး။ အဓိပ္ပာယ်ကြီးကြီးမားမားမရှိဘူးဆိုပေမယ့် အဲဒီစကားက အရေးပါတဲ့စကားဖြစ်တယ်။
အဲဒီစကားတစ်ခွန်းက သော့ဖြစ်တယ်။ ခေတ်သစ်သော့ဖြစ်ပါတယ်။ ပိုက်ဆံအိတ်ထဲမှာ၊
ကားပေါ်မှာ၊ ကိုယ့်အိမ်ကတံခါးပေါ်မှာ အရင်ကလို သော့ပေါက်မျိုး
မရှိကြတော့ပါဘူး။ အခုခေတ်သစ်သော့က နားရွက်သဏ္ဍာန်နဲ့တူတဲ့အရာလေးပါ။ ကိုယ့်ပါးစပ်ကို အဲဒီသော့နားကပ်ပြီး စကားတိုးတိုးတစ်ခွန်းပြောလိုက်ရင် သော့ကပွင့်သွားပါတယ်။ ဥပမာ တချို့က -- “Tulip ပန်းပွင့်ပြီ” လို့ပြောလိုက်တာနဲ့ သော့ပွင့်သွားပါတယ်။
ဒီကနေ့ခေတ်မှာ သော့ပျောက်လို့ ဆူညံပူညံလုပ်တာမျိုးတွေ မရှိတော့ပါဘူး။
သော့ဖွင့်ဝိဇ္ဇာလည်း ဒီသော့ကိုဖွင့်ဖို့ မတတ်နိုင်ပါဘူး။
ဒီသော့ကိုဖွင့်ချင်လို့ စကားတွေမနားတမ်း တတွတ်တွတ်ပြောလည်း ဒီသော့က
ပွင့်မှာမဟုတ်ပါဘူး။ ကိုယ့်ခေါင်းထဲက အဲဒီစကားတစ်ခွန်းကို ဘယ်သူ့ကိုမှ
သင်မပြောပြခဲ့ရင် ဒီသော့ဟာ အရင်ခေတ်သော့ထက် ပိုပြီးလုံခြုံစိတ်ချရပါတယ်။
တစ်ခါတလေမှာ အတိတ်မေ့ရောဂါရလို့ သော့ဖွင့်မရခဲ့ရင် ရဲကိုအကြောင်းကြားပြီး
တံခါးရိုက်ဖျက်ဝင်ရင်လည်း ရပါတယ်။ ဒါပေမယ့် ဒီလိုအဖြစ်က
မဖြစ်သလောက်နည်းပါတယ်။ တကယ်လို့ အရက်မူးပြီး ဒီစကားတစ်ခွန်းကို
ပြောထွက်ဖြစ်ခဲ့ရင်လည်း နောင်တရ၊ စိုးရိမ်စရာမလိုပါဘူး။
အိမ်ပြန်ရောက်တဲ့အခါ အထဲကစကားလုံးကို တခြားစကားလုံးနဲ့
ပြောင်းလိုက်ရုံပါပဲ။ မမှတ်မိမှာစိုးလို့ဆိုပြီးလည်း
စိတ်လှုပ်ရှားစရာမလိုပါဘူး။ တကယ်တော့ ဒီစကားတစ်ခွန်းက မှတ်ရမခက်ပါဘူး။
စိတ်ထဲကနေ အကြိမ်ကြိမ်ရွတ်ဆိုပေးရင် မျက်စိမှိတ်ထားလည်း
အဲဒီစကားတစ်ခွန်းကို သင်မြင်ယောင်နိုင်ပါတယ်။ တကယ်မေ့မှာကြောက်တယ်ဆိုရင်တော့ လက်ပတ်နာရီနောက်မှာ ရေးထားနိုင်ပါတယ်။
ဒီလိုဆိုရင် တခြားလူရဲ့အိမ်သော့ကိုဖွင့်ချင်တဲ့သူတွေ မရှိတော့ပါဘူး။
ချောမောလှပတဲ့ မိန်းကလေးတစ်ဦးက ဒီလိုသော့ပါတဲ့အိမ်တစ်လုံးကို ဝယ်လိုက်ပါတယ်။ သူရဲ့ချောမောလှပတာကို ပြောရမယ်ဆိုရင် သူ့မှာချစ်သူရှိပြီးတဲ့နောက် အချစ်က သူ့ကိုပိုလှပစေခဲ့တာဖြစ်ပါတယ်။ သူရဲ့အချစ်ရေးက အရမ်းလှပချိုမြိန်ခဲ့ပါတယ်။ တစ်ပတ်မှာ နှစ်ကြိမ် သုံးကြိမ်လောက် သူ့ထက်အသက်နည်းနည်းကြီးတဲ့ချစ်သူနဲ့ စားသောက်ဆိုင်သွားကြ၊ ကလပ်သွားကြပါတယ်။
လှပတဲ့နွေညတွေမှာလည်း နှစ်ယောက်သား မြစ်ထဲမှာလှေငယ်လေးစီးကြပါတယ်။ ငယ်ရွယ်နုပျိုခြင်းကို နှစ်ယောက်သား အတူတကွ ပျော်ပျော်ရွှင်ရွှင်ခံယူနေခဲ့ကြတယ်။
ဒါပေမယ့် ဒီညမှာတော့ မိန်းကလေးရဲ့စိတ်ခံစားချက်က
မကြည်လင်နေခဲ့ဘူး။ ဘာမှမဟုတ်တဲ့ကိစ္စနဲ့ သူတို့စကားများကြတယ်။
စားသောက်ဆိုင်မှာတွေ့ဖို့ ချိန်းထားတဲ့ချစ်သူကို အကြာကြီး
သူစောင့်နေစေခဲ့လို့ပါပဲ။
“ကိုယ့်ကို ဒီလောက်အကြာကြီးစောင့်ခိုင်းထားတာ ခင် အားမနာဘူးလား”
“အဲဒီလောက် စိတ်မဆိုးပါနဲ့”
“ကိုယ် အလုပ်တွေအမြန်လက်စသတ်ပြီး လာခဲ့ရတာ”
“ကျွန်မလည်း ကိုယ့်ကိုယ်ကိုခဏလောက်ပြင်ဆင်ပြီး လာခဲ့တာပါပဲ”
“ဒီမှာတွေ့မယ်လို့ ပြောထားတဲ့ကိစ္စကို ခင်အစောကြီးကတည်းက သိပြီးပြီမဟုတ်လား”
အရင်တုန်းက တစ်ယောက်ယောက်စိတ်ခံစားချက်မကောင်းရင် ကျန်တစ်ယောက်က နှစ်သိမ့်နေကျ။ ဒီတစ်ကြိမ်မှာတော့ ဘာကြောင်းမှန်းမသိပါဘူး.. စကားနိုင်လုမဆဲဖြစ်ခဲ့ကြတယ်။
“ကျွန်မပြန်မယ်…” သူ ပြောပြောဆိုဆို ထထွက်လာတယ်။ ပြဿနာကိုပြေလည်ချင်တာကြောင့် ချစ်သူက သူ့ကို လှမ်းဆွဲမလို့ပါပဲ။ ဒါပေမယ့် လက်က သူ့ပခုံးပေါ်မရောက်ဘဲ သူ့နားကပ်ကိုထိမိသွားတယ်။
“ဒါဆိုလည်း ပြန်ကွာ…”
ဇာတ်လမ်းက အဲဒီကစပါတော့တယ်။
အိမ်အပြန်လမ်းမှာ သူနောင်တရမိတယ်။ ချစ်သူကို နောက်ထပ်တစ်ဖန်
သူတွေ့ခွင့်မှရပါတော့မလား။ တကယ်လို့ နောက်ကျမှလာတဲ့သူက
ချစ်သူကိုတောင်းပန်လိုက်ရင် ကိစ္စပြီးသွားမှာပဲလို့ သူတွေးမိတယ်။ ဒါပေမယ့် သူ ဘာကြောင့် မတောင်းပန်မိပါလိမ့်။ အခုလှည့်ပြန်ပြီး မှားကြောင်းပြောလိုက်ရင်လည်း
အချိန်မီသေးတယ်ဆိုတာ သိပေမယ့် မလုပ်နိုင်ခဲ့ဘူး။ ဒါဟာလည်း
ခေါင်းမာတာပဲဖြစ်မယ်။ မနက်ဖြန်ကစပြီး အပျော်မရှိတဲ့နေ့ရက်တွေကို
သူဖြတ်သန်းရတော့မယ်။ လူငယ်လူရွယ်မို့ထင်ပါတယ်.. အမှားကို
သူဝန်မခံချင်ခဲ့ဘူး။
လေးလံတဲ့ခြေလှမ်းနဲ့ အိမ်တံခါးဝရှေ့ သူရောက်လာခဲ့တယ်။ တကယ်လို့ “ဒီနေ့အရမ်းပျော်ခဲ့တယ်”လို့ တံခါးနားကပ်ပြီး သူ,မပြောရင် တံခါးကပွင့်သွားမှာမဟုတ်ပါဘူး။
ဒါပေမယ့် အခုချိန်မှာ ဒီစကားတစ်ခွန်းကို သူပြောမထွက်ခဲ့ဘူး။ မပြောရင်
အိမ်ထဲဝင်လို့မရဘူး။ ဒါနဲ့ တံခါးရှေ့မှာ ငေးကြောင်ကြောင်နဲ့ သူရပ်နေခဲ့တယ်။
နောက်ဆုံးကျမှ အလွတ်ရွတ်ထားတဲ့စာတစ်ပုဒ်လို စကားတစ်ခွန်းကို သူတိုးတိုးညင်းညင်းပြောလိုက်တယ်။
တံခါးဖြည်းဖြည်းချင်း ပွင့်သွားပါတယ်။ အထဲကနေ တံခါးပြန်ပိတ်လိုက်တာနဲ့
ဒီစကားတစ်ခွန်းကို သူလဲပစ်လိုက်ချင်မိတယ်။ ဒါပေမယ့် ဘယ်လိုတွေးတွေး
သင့်တော်တဲ့စကားတစ်ခွန်းကို သူမရခဲ့ဘူး။ မလဲလို့လည်း မဖြစ်ဘူး။ စဉ်းစားရင်း စီမိတဲ့ဝါကျက “ငါမှားသွားတယ်.. ခွင့်လွှတ်ပါ”ဆိုတာပဲဖြစ်တယ်။
အခုချိန်မှာ ဒီလိုပြောတာပဲကောင်းပါတယ်လေ… ငါကိုက ကမောက်ကမနိုင်တာ.. မနက်ဖြန်ကစပြီး ဒီစကားတစ်ခွန်းနဲ့ပဲ နေ့ရက်တွေကိုဖြတ်ကျော်ရတော့မယ်။
နောက်တစ်နေ့မနက်လင်းချိန်မှာ
ချစ်သူက သူ့အိမ်ရှေ့ရောက်လာခဲ့တယ်။ ချစ်သူကလည်း သူလွန်ကြောင်း
မတောင်းပန်ချင်လို့ စိတ်ရှုပ်နေခဲ့ရတယ်။ သူ့ကိုတွေ့ချင်လာလို့
နားကပ်ပြန်ပေးမယ်ဆိုတဲ့ အကြောင်းပြချက်နဲ့ သူ့ရဲ့ခွင့်လွှတ်ခြင်းကိုရဖို့ အခု သူ့အိမ်ရှေ့ကို ချစ်သူရောက်လာခဲ့တယ်။ ဘဲလ်တီးချင်ပေမယ့် လက်က မလှုပ်ခဲ့ဘူး။ ဘယ်လိုပဲဖြစ်ဖြစ် အမှားကိုအရင်ဝန်မခံချင်တာနဲ့
နောက်ဆုံးမှာ နားကပ်ကို တံခါးဝမှာချိတ်ခဲ့ပြီး လှည့်ပြန်မယ်လို့
ဆုံးဖြတ်လိုက်တယ်။ နားကပ်ကို အိတ်ကပ်ထဲကထုတ်ပြီး တံခါးဝမှာ
သူချိတ်လိုက်တယ်။
အရင်က ပျော်ရွှင်ခဲ့တဲ့ရက်တွေကို
သူပြန်စဉ်းစားမိတယ်။ ပန်းခြံထဲက ခုံတန်းရှည်မှာ နှစ်ယောက်အတူထိုင်ပြီး
ယုယကြည်နူးခဲ့တာတွေကို သူသတိရမိတယ်။
မနေ့က ချစ်သူမိန်းကလေးအပေါ်
သူပြောဆိုခဲ့တာတွေကို သူဝမ်းနည်းနောင်တရမိတယ်။ ဒီလိုဆိုရင် အခုဘာဖြစ်လို့
အိမ်ထဲဝင်ပြီး သွားမတောင်းပန်သလဲ။ ဒီလိုနဲ့ နားကပ်ကို
တံခါးမှာချိတ်ပြီးတဲ့နောက် သူ့ပါးစပ်ကနေ စကားတစ်ခွန်း
မသိမသာခုန်ထွက်သွားခဲ့တယ်။
တံခါး ဖြည်းဖြည်းချင်းပွင့်သွားပါတယ်။
အိမ်ထဲမှာသောကများနေတဲ့ သူမတစ်ယောက် ချစ်သူကိုတွေ့တာနဲ့ လွှားခနဲထခုန်ပြီး
ပြေးဖက်ငိုလိုက်ပါတယ်။ ပါးစပ်ကနေ ဘာစကားလုံးမှထွက်ကျမလာခဲ့ပေမယ့် ရင်မှာတော့ သော့ဖွင့်တဲ့စကားတစ်ခွန်းကို သူပြောနေခဲ့မိပါတယ်။
ပွင့်သွားတဲ့တံခါးရဲ့ နားရွက်သဏ္ဍာန်အပေါက်မှာချိတ်ထားတဲ့ နားကပ်လေးက ဖြည်းဖြည်းချင်းလှုပ်ယမ်းနေဆဲ …..
------
မူရင်းရေးသားသူ--- ဂျပန်စာရေးဆရာ Shinichi Hoshi (1926 - 1997)
နိုင်းနိုင်းစနေ ဘာသာပြန်ခံစားသည်။
အချစ်ရဲ့ သော့
Reviewed by
သတင်းစုံပျော်ဝင်အိုးကြီး
on
July 09, 2014
Rating:
5
No comments:
Post a Comment