ဖေဖော်ဝါရီ ၁၆ ရက် နောက်ဆုံးထား ပြောင်းရွှေ့ပေးရမည့် ဒဂုံဆိပ်ကမ်း ၆၇ ရပ်ကွက်မှ ကျောင်းသား ၅၀၀ ခန့် စာမေးပွဲဖြေဆိုရန် အခက်အခဲဖြစ်

၁၃.၂.၂၀၁၄၊ ကြာသပတေးနေ့

ဖေဖော်ဝါရီ ၁၆ ရက် နောက်ဆုံးထား ဖျက်သိမ်းပြောင်းရွှေ့ပေးရမည့် ဒဂုံဆိပ်ကမ်းမြို့နယ် ၆၇ ရပ်ကွက်ရှိ အိမ်ခြေ ၂၅၀၀ ကျော်တွင် လူဦးရေ ၇၀၀၀ ကျော် နေထိုင်လျက်ရှိရာ ကျောင်းသား ၅၀၀ ခန့်မှာ အတန်းတင်စာမေးပွဲဖြေဆိုရန် ကာလနှင့် နီးကပ်နေသဖြင့် အခက်အခဲများ ဖြစ်ပေါ်လျက်ရှိကြောင်း သိရသည်။

“ဖျက်သိမ်းပြောင်းရွှေ့ပေးရမယ့် ရပ်ကွက်ထဲမှာ လက်ရှိနေထိုင်နေတဲ့ လူဦးရေ ၇၉၂၀ ရှိပါတယ်။ အဲ့ဒီထဲမှာ အသက် ၇၀ အထက် အဘိုးအဘွား ၈၀ ကျော်လောက်ရှိတယ်။ ကျောင်းသားမူလတန်း၊ အလယ်တန်း၊ အထက်တန်း စုစုပေါင်း ၅၀၇ ဦးရှိတယ်။ အများစုက မူလတန်းကျောင်းသားတွေဖြစ်တယ်။ အများစုက ကျောင်းသားငယ်တွေ ဖြစ်နေတော့ စာမေးပွဲဖြေဖို့အတွက် စိုးရိမ်စိတ်တွေ ၀င်နေတယ်။ သူတို့အိမ် အဖျက်ခံရရင် သူတို့ဘယ်မှာနေပြီး စာကျက်မလဲ” ဟု ၆၇ ရပ်ကွက်အုပ်ချုပ်ရေးမှူး ဦးနှင်းအောင်ဇော်က ရှင်းပြသည်။

ဒဂုံဆိပ်ကမ်းမြို့နယ် အုပ်ချုပ်ရေးမှူးက ယင်းရပ်ကွက်ရှိ လူနေအိမ်ခြေများကို ရန်ကုန်တိုင်းဒေသကြီး အစိုးရပိုင် ပလပ်မြေပေါ်တွင် တရားမ၀င် ခွင့်ပြုချက်မဲ့ ကျူးကျော်နေထိုင်သူများအား ဖျက်သိမ်းပေးရန် အမိန့်စာကို ဖေဖော်ဝါရီ ၆ ရက်တွင် တစ်ကြိမ်၊ ဖေဖော်ဝါရီ ၁၁ ရက်တွင် ပေးပို့ခဲ့သည်။

၆၇ ရပ်ကွက်တွင် နေထိုင်သော အလယ်တန်းကျောင်းဆရာမ တစ်ဦးက “ကျွန်မတို့ ၆၇ ရပ်ကွက်ထဲမှာ ကျောင်းသား ၅၀၀ မကရှိတယ်။ မူလတန်းကျောင်းသား အရေအတွက်က ပိုများတယ်။ မူလတန်း အတန်းတင်စာမေးပွဲက ဒီလ ၂၆ ရက်စမှာ။ အလယ်တန်းက ၃ လပိုင်းထဲမှာစမယ်။ ၁၀ တန်းတွေလည်း ၃ လပိုင်း လလယ်လောက်မှ စမှာဖြစ်ပါတယ်။ ဒီကာလတွေမတိုင်ခင် ပြောင်းရွှေ့ပေးရမယ်ဆိုတော့ ကလေးတွေမှာ စာကျက်ရနိုးနိုး၊ ကျောင်းပဲထွက်ရနိုးနိုးနဲ့ စိုးရိမ်သောက ရောက်နေကြတယ်။ ဖျက်မယ်ဆိုတော့ ကြောက်လန့်ကြပြီး မိဘတွေကလည်း ပြောင်းရွှေ့ကြရင် ကျောင်းသားတွေ အတန်းပျက်ပြီး ဒုက္ခရောက်ကြရမှာ စိုးရိမ်နေတယ်” ဟု ပြောကြားသည်။

“ကျွန်မတို့ရပ်ကွက် လူဦးရေ ၇၀၀၀ ကျော် အိမ်တွေဖျက်သိမ်း ပြောင်းရွှေ့ပေးရပြီဆိုပါတော့ ဘယ်မှာသွားနေရမှာလဲ။ မြေငှားပြီးနေတာဖြစ်ဖြစ် မြေ၀ယ်ပြီးနေတာဖြစ်ဖြစ် နေစရာတစ်ခုအတွက် ကျွန်မတို့ လမ်းဘေးရောက်ဖို့ပဲရှိတယ်” ဟု ၆၇ ရပ်ကွက် ချင်းတွင်းလမ်းနေ အိမ်ရှင်မတစ်ဦးက ၎င်း၏ခံစားချက်ကို ပြောကြားခဲ့သည်။

EMG