ပြိုင်ကား ၅ စီး ရဲစခန်းရောက်နေပါပြီ

Posted by Irrawaddy on February 27, 2014

အငှားယာဉ်တစီးနဲ့လူတချို့ကို ၀ိုင်းဝန်းရိုက်နှက်မှုမှာ ပါဝင်တယ်လို့ ဆိုတဲ့သူတွေကို သူတို့ရဲ့ မိဘများက ရဲစခန်း သွားပို့တယ်လို့ သိရပါတယ်။
အခင်းဖြစ်ပွားစဉ် အသုံးပြုတဲ့ ပြိုင်ကား ၅ စီးလည်း ရဲစခန်း ရောက်နေပါပြီ တဲ့။ ရန်ကုန်တိုင်းဒေသကြီး ရဲတပ်ဖွဲ့ကထုတ်ပြန်တဲ့ ဒီသတင်းကို ကြာသပတေးနေ့ထုတ် အရပ်ဘက်သတင်းစာများမှာလည်း ဖော်ပြထားကြပါတယ်။
ဥပဒေအထက်မှာမောင်းနေတာကြာပြီဖြစ်တဲ့ ပြိုင်ကားများထဲက တချို့သောပြိုင်ကားတွေ အခုမှ သတင်းစာမျက်နှာပေါ် ပြုံပြီး ရောက်နေတာဟာဖြင့် အင်မတန် ထူးခြားနေပါတော့တယ်။

ဆက်စပ်

အုပ်စုဖွဲ့ ရမ်းကားခဲ့တဲ့ ပြိုင်ကားပြဿနာနဲ့ နောက်ဆက်တွဲ
http://blog.irrawaddy.org/2014/02/blog-post_234.html
ရန်ကုန်မြို့ နဲ့ ပြိုင်ကား သောင်းကျန်းမှု
http://blog.irrawaddy.org/2014/02/blog-post_18.html
ပြိုင်ကားအုပ်စုဖြင့် အငှားယာဉ်မောင်းအား ရိုက်နှက်ထိုးကြိတ်ပြီး အငှားယာဉ်ကိုဖျက်ဆီးခဲ့သည့် ပြစ်မှုကျူးလွန်သူများအား ပြိုင်ကားများနှင့်အတူ မိဘအုပ်ထိန်းသူများက လာရောက်အပ်နှံ
ရန်ကုန်၊ ဖေဖော်ဝါရီ ၂၆
၁၆.၂.၂၀၁၄ရက်နေ့ ၀၁၁၅အချိန်တွင် ကိုသက်ဇော်ဝင်း မောင်းနှင်သည့် အငှားယာဉ်ကို ပြိုင်ကားများက ကျော်တက်ပိတ်ရပ်ကာ ယာဉ်ပေါ်ပါ ယာဉ်မောင်းနှင့် ခရီးသည် ကိုအင်ထိတ်ကြန့်တို့ကို ရိုက်နှက်ထိုးကြိတ်စဉ် အငှားယာဉ်ကို ထုရိုက်ခဲ့သဖြင့် လှိုင်မြို့မရဲစခန်း (ပ) ၇၂/၂၀၁၄၊
ပြစ်မှုဆိုင်ရာဥပဒေပုဒ်မ ၄၄၀/၄၂၇ /၃၂၅ /၁၁၄ အရ အမှုဖွင့်ပြီး ပြစ်မှုကျူးလွန်သူများနှင့်ပြိုင်ကားများ ဖမ်းဆီးရမိရေးအတွက် ဆောင်ရွက် ခဲ့ပါသည်။
ထိုသို့စုံစမ်းဆောင်ရွက်နေစဉ် ပြစ်မှုကျူးလွန်သူများဖြစ်ကြသည့် ကိုကိုနိုင် မောင်းနှင်ခဲ့သော ၉ဂ/၇၄၁၄ Nissan Fairlady အဖြူရောင် ပြိုင်ကားကို ၁၉.၂.၂၀၁၄ရက်နေ့ ၀၂၅၀အချိန်တွင် မရမ်းကုန်းမြို့နယ်၊ (၆)ရပ်ကွက်၊ တော်ဝင်ချယ်ရီအိမ်ရာ၌ ရပ်ထားသည်ကိုတွေ့ရှိခဲ့သဖြင့် သိမ်းဆည်းခဲ့ပြီး၊ ၂၁.၂.၂၀၁၄ ရက်နေ့ ၂၂၄၅ အချိန်တွင် ကိုထက် (ခ)ဇာနည်(ခ)ဇာနည်ထက်ဝေ မောင်းနှင်ခဲ့သော YGN 3G-1470(V300 ARISTO) အဖြူရောင်ပြိုင်ကားကိုလည်းကောင်း၊ ၂၂.၂.၂၀၁၄ရက်နေ့ ၁၈၃၀အချိန်တွင် ဝေယံလင်း မောင်းနှင်ခဲ့သော ၅င/၈၅၆၇ MAZDA
RX-8 ခဲပုတ်ရောင်ပြိုင်ကားကိုလည်းကောင်း ၎င်းတို့၏မိဘအုပ်ထိန်းသူ များက လှိုင်မြို့မရဲစခန်းသို့ ပို့ဆောင်အပ်နှံပေးခဲ့ကြပါသည်။
ဆက်လက်၍ ပြစ်မှုကျူးလွန်သူများနှင့် ကျန်ရှိနေသေးသောပြိုင်ကားများ ရမိရေး ဆက်လက်ဆောင်ရွက်ခဲ့ရာ ၂၅.၂.၂၀၁၄ ရက်နေ့ ၁၇၁၀ အချိန် တွင် ပြစ်မှုကျူးလွန်သူများဖြစ်ကြသည့် ထက်အောင်လူ မောင်းနှင်ခဲ့သော YGN 4C-4238 FRAND CHIEROKEE JEEP အနက်ရောင်ယာဉ်နှင့်
ကောင်းစည်သူ မောင်းနှင်ခဲ့သော MDY 7C-5830 NissanFairlady350Z ခဲပုတ်ရောင်ပြိုင်ကားတို့ကို မိဘအုပ်ထိန်းသူများက လှိုင်မြို့မရဲစခန်းသို့ ပို့ဆောင်အပ်နှံပေးခဲ့ကြပါသည်။

ပြစ်မှုကျူးလွန်သူများဖြစ်ကြသော
ကိုကိုနိုင်(ဘ)ဦးစိန်မောင်၊(၂)ရပ်ကွက်၊ မရမ်းကုန်းမြို့နယ်၊
ကိုထက်(ခ)ဇာနည်(ခ)ဇာနည်ထက်ဝေ(ဘ)ဦးအေးမြင့်၊ (၂)ရပ်ကွက်၊မရမ်းကုန်းမြို့နယ်၊
ဝေယံလင်း(ဘ)ဦးနေထွန်း၊(၂)ရပ်ကွက်၊ လှိုင်မြို့နယ်၊
ထက်အောင်လူ(ဘ)ဦးလူမော်၊(၃)ရပ်ကွက်၊တောင်ဥက္ကလာပ မြို့နယ်၊
ကောင်းစည်သူ(ဘ)ဦးကိုကိုအောင်၊ (၅)ရပ်ကွက်၊
တောင်ဥက္ကလာပမြို့နယ်နေသူတို့ (၅)ဦးတို့ကို
၎င်းတို့၏မိဘအုပ်ထိန်းသူ များက လှိုင်မြို့မရဲစခန်းသို့ပို့အပ်ပေးခဲ့သဖြင့် ၂၅.၂.၂၀၁၄ရက်နေ့ ၁၈၀၅ အချိန်တွင် ၎င်းတို့ အားစစ်ဆေးလျက်ရှိပါသည်။
ယခုအမှုနှင့်ပတ်သက်၍ ပြည်သူဗဟိုပြုရဲလုပ်ငန်းစဉ်နှင့်အညီ ပြည်သူများ က သတင်းပေးခဲ့၍လည်းကောင်း၊ ပြစ်မှုကျူးလွန်သူများ၏ မိဘအုပ်ထိန်းသူများကလည်း သက်ဆိုင်ရာရဲစခန်းသို့ ကြိုတင်ညှိနှိုင်းပြီး လာရောက်အပ်နှံပေးခဲ့၍လည်းကောင်း အမြန်ဖော်ထုတ်နိုင်ခဲ့ခြင်း ဖြစ်ပါသည်။
မြန်မာနိုင်ငံရဲတပ်ဖွဲ့ဌာနချုပ်၏လမ်းညွှန်မှုနှင့်အညီ ရန်ကုန်တိုင်းဒေသကြီး ရဲတပ်ဖွဲ့က ယခုကဲ့သို့ပြစ်မှုကျူးလွန်သူများ၏ သတင်းများအပေါ် ပြည်သူများနှင့် ပူးပေါင်းဆောင်ရွက်ဖော်ထုတ်နိုင်ခဲ့မှုသည် ပြည်သူဗဟိုပြု ရဲလုပ်ငန်းစနစ်အကောင်အထည်ဖော်ဆောင်နေသည့် မြန်မာနိုင်ငံရဲတပ်ဖွဲ့၏ ဆောင်ရွက်နေမှုကို မိဘပြည်သူများအနေဖြင့် ယုံကြည်ကိုးစားမှု ရှိလာခြင်းဖြစ်သောကြောင့် ဥပဒေကိုလေးစားလိုက်နာရမည်ဆိုသည့် အသိတရားနှင့်ယှဉ်၍ ယခုကဲ့သို့ ပြိုင်ကားမောင်းနှင်သူများ၏ မိဘများ ကိုယ်တိုင် လှိုင်မြို့မရဲစခန်းသို့ပြိုင်ကားများနှင့်အတူ မိမိတို့၏သားများကို လာရောက်အပ်နှံပေးခဲ့ခြင်းဖြစ်သည့်အတွက် မြန်မာနိုင်ငံရဲတပ်ဖွဲ့၊ ရန်ကုန်တိုင်းဒေသကြီးရဲတပ်ဖွဲ့တို့မှလည်း အထူးကျေးဇူးတင်ရှိပါကြောင်း နှင့် မှတ်တမ်းတင်ထားရှိပါကြောင်း ဖော်ပြအပ်ပါသည်။
နောင်တွင်လည်း မိဘပြည်သူများက မိမိတို့၏ သားသမီးများ၏ ဘ၀ရှေ့ရေးကောင်းမွန်လာစေရေးအတွက် ၀ိုင်းဝန်းထိန်းသိမ်း၍ ယခုကဲ့သို့ တစ်ဖက်တစ်လမ်းမှ ပူးပေါင်းကူညီမှုပေးကာ ပြည်သူများ အားလုံး စည်းကမ်းရှိစွာသွားလာနေထိုင်ကြရေး ဥပဒေဘောင်အတွင်းမှ ၀ိုင်းဝန်းဆောင်ရွက်ပေးကြစေလိုပါကြောင်း ရန်ကုန်တိုင်းဒေသကြီးရဲတပ်ဖွဲ့အနေဖြင့် တိုက်တွန်းအပ်ပါသည်။