ဘုန်းကြီးကျောင်းတွင် ခိုလှုံနေသည့် သမီးကလေးရွာမှ မိသားစုတစ်စုအား ဖေဖော်ဝါရီ ၈ ရက်ညပိုင်းက တွေ့ရစဉ် (ဓာတ်ပုံ-အောင်ဇော်ထွန်း)
ပဲခူးတိုင်းဒေသကြီး၊ အလိုင်နီဆည်အနီးရှိ အောင်သိဒ္ဓိဘုန်းတော်ကြီး ကျောင်းဝင်းတွင် ယာယီတဲများထိုးပြီး ခိုလှုံနေရသည့် ဖယ်ရှားခံ သမီးကလေး ရွာသားများအနက် ကျောင်းသားမရှိသည့် အိမ်ထောင်စုပေါင်း ၅၆ စုအား ခုနစ်ရက်အတွင်း အဆိုပါနေရာမှ ဖယ်ရှားပေးရန် အလိုင်နီကျေးရွာအုပ်စု အုပ်ချုပ်ရေးမှူးမှ သက်ဆိုင်ရာ၏ ညွန်ကြားချက်အရ ဖေဖော်ဝါရီ ၉ ရက် ညနေပိုင်းက အကြောင်းကြားစာ ပေးပို့ခဲ့ကြောင်း အဆိုပါရွာသားများက ပြောကြားသည်။ အဆိုပါ အကြောင်းကြားစာထဲတွင် လက်ရှိနေထိုင်နေသည့် ကျူးကျော်နားခိုတဲများသည် နိုင်ငံတော်မှ စီမံခန့်ခွဲရန် မြေနေရာများဖြစ်သဖြင့် သက်ဆိုင်ရာ၏ ခွင့်ပြုချက်လိုကြောင်း၊ သက်ဆိုင်ရာခွင့်ပြုချက် မရှိသဖြင့် လက်ရှိဆောက်လုပ်နေထိုင်နေသည့် ယာယီကျူးကျော် နားခိုတဲများအား ခုနစ်ရက်အတွင်း ဖျက်သိမ်းပြီး ထွက်ခွာပေးရန်နှင့် လိုက်နာမှုမရှိပါက ဥပဒေအရ အရေးယူသွားမည်ဖြစ်ကြောင်း ပါရှိကာ အလိုင်နီကျေးရွာအုပ်စု အုပ်ချုပ်ရေးမှူး လက်မှတ်ရေးထိုးထားသည်ဟု သမီးကလေး ရွာသားများထံမှ သိရသည်။ နေအိမ်များ ဖျက်သိမ်းခံခဲ့ရသည့်အတွက် အောင်သိဒ္ဓိ ဘုန်းတော်ကြီးကျောင်းဝင်းတွင် ယာယီတဲများထိုးကာ နေထိုင်နေရသည့် ရွာသားများက ကျောင်းတက်နေသည့်ကလေးများ စာသင်နှစ်ပြီးဆုံးသည်အထိ နေထိုင်ခွင့်ပြုရန် သက်ဆိုင်ရာသို့ အသနားခံပြီးနောက် ကျောင်းသားမရှိသည့် အိမ်ထောင်စု ၅၆ စုအား ယင်းကဲ့သို့ ခုနစ်ရက်အတွင်း ထွက်ခွာပေးရန် အကြောင်းကြားစာ ပေးပို့ခဲ့ခြင်းဖြစ်သည်။ ကျောင်းသားမိဘတစ်ဦးဖြစ်သူ ဦးဝင်းရွှေက “ဒီကနေ့ ညနေ ၄ နာရီလောက်က အလိုင်နီကျေးရွာ အုပ်ချုပ်ရေးမှူးနဲ့အဖွဲ့က ဒီကိုလာပြီး ကျောင်းသားမရှိတဲ့ အိမ်ထောင်စု ၅၆ စုကို ခုနစ်ရက်အတွင်း ဒီနေရာကနေ ထွက်ခွာပေးဖို့အတွက် အသိပေးစာတွေ ပေးသွားပါတယ်။ ကျောင်းသားမရှိတဲ့ အိမ်ထောင်စုတွေကတော့ လောလောဆယ် ဘယ်ကိုသွားရမှန်း မသိကြသေးဘူး။ အိမ်တွေအဖျက်ခံရတဲ့အတွက် ဒီမှာရှိတဲ့သူတွေက အကုန်နေစရာမရှိကြတဲ့ သူတွေပါ” ဟု ဖေဖော်ဝါရီ ၉ ရက် ညနေ ၅ နာရီခွဲက Eleven Media Group သို့ ပြောကြားသည်။ အဆိုပါဘုန်းကြီးကျောင်းတွင် ခိုလှုံနေရသည့် ဖယ်ရှားခံ သမီးကလေးရွာသားများမှာ စုစုပေါင်း ၅၀၀ ခန့်ရှိကာ အိမ်ထောင်စုပေါင်း ၁၄၉ စု နေထိုင်လျက်ရှိကြောင်း သိရှိရသည်။
Eleven Media Group
No comments:
Post a Comment