မြစ်ကြီးနား၊ ဇန်နဝါရီ ၁၈
ကချင်ပြည်နယ် ချီဖွေမြို့နယ်ခွဲ အတွင်းရှိ ရှန်ကျော်ကျေးရွာ နှစ်ခြင်း ဘုရားကျောင်းတွင် ခ.လ.ရ (၇၄) တပ်ရင်းက တပ်စွဲထားမှုကို ဒေသခံ ပြည်သူများက ငြိမ်းချမ်းရေး အကျိုးတော်ဆောင် အဖွဲ့မှတစ်ဆင့် မြောက်ပိုင်းတိုင်း စစ်ဌာနချုပ်သို့ တိုင်ကြားခဲ့ရာ ယင်းနေရာ၌ တပ်စွဲထားမှုကို ချက်ချက်ဖယ်ရှား ပေးရန် မြောက်ပိုင်းတိုင်း စစ်ဌာနချုပ်က ညွှန်ကြားခဲ့ကြောင်း ငြိမ်းချမ်းရေး အကျိုးတော်ဆောင်အဖွဲ့ (P.C.G) မှ ဦးလမိုင်ဂွမ်ဂျာက The Voice သို့ပြောကြားသည်။
ရှန်ကျော်ရွာ နှစ်ခြင်း ဘုရားကျောင်းတွင် စစ်တပ်က တပ်စွဲထားသည့်အတွက် ဘုရားဝတ်ပြုရာတွင် စိတ်အနှောင့်အယှက် ဖြစ်ခြင်း၊ ဝတ်ပြုရာချိန်များတွင်သာ အသုံးပြုသည့် ပလ္လင်များ ယူငင် အသုံးပြုခြင်းတို့ကို ပြုလုပ်နေသည့်အပြင် သာမန် သွားလာမှုများတွင်ပါ ခြိမ်းခြောက် စစ်ဆေးမှုများ ပြုလုပ်နေခြင်းကြောင့် ရှန်ကျော်နှစ်ခြင်း အသင်းတော် သင်းအုပ်ဆရာက ဇန်နဝါရီလ ၁၇ ရက်နေ့ နေ့လယ် ၁၂ နာရီခွဲ အချိန်ခန့်က ငြိမ်းချမ်းရေး အကျိုးတော်ဆောင်အဖွဲ့သို့ လာရောက် အကူအညီ တောင်းခံခဲ့ရာ ငြိမ်းချမ်းရေး အကျိုးတော်ဆောင် အဖွဲ့က မြောက်ပိုင်းတိုင်း စစ်ဌာနချုပ်သို့ ထပ်ဆင့် တိုင်ကြားပေးခဲ့သဖြင့် မြောက်ပိုင်းတိုင်း စစ်ဌာနချုပ်က သတင်းရလျှင်ရချင်း နာရီပိုင်းအတွင်း ဖယ်ရှားစေခဲ့ခြင်း ဖြစ်ကြောင်း ဦးလမိုင်ဂွမ်ဂျာက ရှင်းပြသည်။
“ကျွန်တော်တို့ဆီက မြောက်ပိုင်းတိုင်းကို ဖုန်းနဲ့ အကြောင်းကြားလိုက်တဲ့အခါ တာဝန်ရှိသူတစ်ဦးက စိတ်မပူဖို့ ပြောတယ်။ သူတို့တွေက ဖယ်ရှားဖို့ ချက်ချင်း ညွန်ကြားလိုက်တာနဲ့ ဒီညနေ ၃ နာရီကျော်မှ အခြားနေရာကို တပ်ရွှေ့သွားပြီလို့ ဒေသခံတွေဆီက ဖုန်းနဲ့ ပြန်အကြောင်းကြားလာတယ်။ ကျွန်တော်တို့ အကြောင်းကြားတာနဲ့ ချက်ချင်း အရေးယူ ဆောင်ရွက်ပေးတယ်” ဟု ၎င်းကဆိုသည်။
ကချင်ပြည်နယ်တွင် စစ်ရေးလှုပ်ရှားမှု ပြုလုပ်လျက်ရှိသော တပ်မတော် စစ်ကြောင်းများအနေနှင့် လူနေအိမ်ခြေ အနီးတစ်ဝိုက်နှင့် ဘုရားကျောင်းများတွင် တပ်စွဲခြင်းမျိုး မပြုလုပ်ရန် မြောက်ပိုင်းတိုင်း စစ်ဌာနချုပ်က ညွန်ကြားထားပြီး ယင်းကဲ့သို့ ဘုရားကျောင်းများတွင် တပ်စွဲထားမှုအပေါ် ငြိမ်းချမ်းရေး အကျိုးတော်ဆောင် အဖွဲ့သို့ လာရောက် အကူအညီ တောင်းခံသည့် အသင်းတော် နှစ်ခုရှိပြီ ဖြစ်ကြောင်း ငြိမ်းချမ်းရေး အကျိုးတော်ဆောင်အဖွဲ့မှ သိရှိရသည်။
ကချင်ပြည်နယ်၌ တပ်မတော်နှင့် ကေအိုင်အေတို့ တိုက်ပွဲများ စတင်ဖြစ်ပွားခဲ့သည့် ၂၀၁၁ ခုနှစ်ခန့်မှ စတင်ကာ အဆိုပါ ရှန်ကျော် ဘုရားကျောင်းတွင် တပ်စွဲထားခြင်း ဖြစ်ပြီး ယခုနောက်ဆုံး ခ.လ.ရ (၇၄) လက်ထက်တွင်မှ ဖယ်ရှားပေးခဲ့ခြင်း ဖြစ်ကြောင်း ရှန်ကျော် ဒေသခံများထံမှ ဆက်လက်သိရှိရသည်။
The Voice Weekly Myanmar
No comments:
Post a Comment