ဘုတလင် ၊ ၁၃-၁-၂၀၁၄
စစ်ကိုင်းတိုင်း ဒေသကြီး မုံရွာခရိုင် ဘုတလင် မြို့နယ် ညောင်ကန် ကျေးရွာအုပ်စု အုတ်အိုင် ကျေးရွာ ၏ အနောက် တောင်ဘက် အရပ်ရှိ ယာခင်း တောအတွင်းမှ ကြေးခေတ် ယဉ်ကျေးမှု နယ်မြေ အသစ်ကို ထပ်မံ တွေ့ရှိရ သည့်အတွက် ရှေးဟောင်း သုတေသန ညွှန်ကြားမှု ဦးစီးဌာန နှင့် နိုင်ငံခြားသား ပညာရှင်များ ပူးပေါင်း တူးဖော်လျက် ရှိကြောင်း တိုင်းဒေသကြီး အစိုးရရုံး က ပြောကြားသည်။
အဆိုပါ ကြေးခေတ် ယဉ်ကျေးမှု နယ်မြေအသစ် ကို အုတ်အိုင် ကျေးရွာနေ တောင်သူကြီး ဦးဘတင် ၏ ကုလားပဲများ စိုက်ပျိုး ထားသည့် ယာခင်းတော အတွင်းမှ စတင် တွေ့ရှိ ခဲ့ခြင်း ဖြစ်ကြောင်း သိရသည်။ ၄င်း တွေ့ရှိချက် ကို ဆက်လက်၍ သုတေသန ပြုလုပ်နိုင်ရန် အတွက် မန္တလေး ရှေးဟောင်း သုတေသန ညွှန်ကြားမှု ဦးစီးဌနာ ဌာနချုပ်ရုံး ဒုတိယ ညွှန်ကြားရေးမှူး ဦးမျိုးမင်းကျော် နှင့် အဖွဲ့သည် French Arcaeological Mission in Myanmar အဖွဲ့မှ ပြင်သစ် နိုင်ငံသား ပညာရှင် ၃ ဦး ၊ ဘယ်လ်ဂျီယံ နိုင်ငံသား ပညာရှင် တစ်ဦး နှင့်အတူ ယခုလ ၁၀ ရက်မှ စတင်ပြီး ဒေသခံ လုပ်သားများ ဖြင့် စတင် တူးဖော် နေခြင်း ဖြစ်ကြောင်း သိရသည်။
ကြေးခေတ် ယဉ်ကျေးမှု နယ်မြေ အသစ်ကို တူးဖော်ရန် လျာထားသည့် လယ်ယာမြေ အကျယ်အဝန်း သည် သုံးဧက ဖြစ်ပြီး တူးဖော်မည့် ရက် ကာလသည် အနည်းဆုံး တစ်လခန့် ကြာမြင့်မည် ဖြစ်ကြောင်း ရှေးဟောင်း သုတေသန ဒုတိယ ညွှန်ကြားရေးမှူး ဦးမျိုးမင်းကျော် က ပြောသည်။
အဆိုပါဒေသရှိ ဒေသခံ တောင်သူကြီး များသည် တောင်သူ လုပ်ငန်းခွင်၌ ထွန်ယက် စိုက်ပျိုး သည့်အခါ လူအရိုးများ မကြာခဏ တွေ့ရှိ ကြရပြီး ရှေးယခင်က ထိုဒေသတွင် တိုင်းရင်းသား မျိုးနွယ်စုများ နေထိုင်ခဲ့ ဖူးသည့် ရွာဟောင်းကြီး တစ်ခုဖြစ်မည် ဟု ခန့်မှန်း ယူဆ ခဲ့ကြသည် ဟု ပညာရှင်များ တည်းခို နေထိုင်နေသည့် အိမ်ရှင်ဖြစ်သူ အုတ်အိုင် ကျေးရွာခံ ဦးအောင်သန်း မှ ပြောပြသည်။
လွန်ခဲ့သော ၁၉၉၆ ခုနှစ် ပတ်ဝန်းကျင်ခန့် က အဆိုပါ ဒေသသို့ သုတေသနပြု စာတမ်းများ ရေးသားရန် လေ့လာရေး ရောက်ရှိ လာသည့် ဂျာမနီ နိုင်ငံသူ အက်စတာမိုး ( Ms. Eastermoe ) သည် ယခု တူးဖော် လျက်ရှိသော တောင်သူကြီး ဦးဘဝင်း ၊ ဦးလမ်းတို့၏ ယာခင်းတော များသို့ သွားရောက် လေ့လာပြီး မှတ်တမ်းများ ရယူ ခဲ့ဖူးကြောင်း ယာခင်း ပိုင်ရှင် ဦးလမ်း မှ အတည်ပြု ပြောကြားသည်။
အဆိုပါ ကြေးခေတ် ယဉ်ကျေးမှု နယ်မြေ တည်ရှိရာ ညောင်ကန် ကျေးရွာ အုပ်စုသည် ဘုတလင်မြို့ ၏ အနောက်ဘက် ၅ မိုင် ၄ ဖာလုံ ခန့်အကွာတွင် တည်ရှိပြီး ကျေးရွာ အုပ်စု၏ အကျယ်အဝန်း မှာ ၇၆၂၂ ဧက ရှိကြောင်း သိရသည်။
Themyawadydaily
No comments:
Post a Comment