ကလေးအမည်တပ် လူကြီးအကြွေစေ့ လောင်းကစားဝိုင်းများ

ကလေးကစားကွင်းဟု အမည်တပ်ထားသော်လည်း လူကြီးများသာ တွေ့ရလေ့ရှိသည်။
ရန်ကုန်မြို့တော်တွင် လူနေမှု အဆင့်အတန်း မြင့်မားလာခြင်း နှင့်အတူ အပန်းဖြေစရာ အဆင့်မြင့် ကလေးကစားကွင်း၊ အဆင့်မြင့် အပန်းဖြေစင်တာများ အများအပြား ပေါ်ထွက်လာသည်။ ရန်ကုန်မြို့တော်၏ လူစည်ကားရာလမ်းမများ၊ အချက်အချာကျ သော နေရာများတွင် ဂိမ်းစင်တာများ ဖွင့်လှစ်လာသကဲ့သို့ ဈေးဝယ်စင်တာ များတွင် ဈေးဝယ်သူများ စိတ်အပန်းပြေစေရန် အပန်းဖြေ ဂိမ်းစင်တာ၊ ကလေးကစားကွင်း များပါ ထည့်သွင်း တည်ဆောက်လာသည်။

နာမည်ကျော် ကလေးကစားကွင်း၊ အပန်းဖြေကစားကွင်း များတွင် ရရှိလာသော ကူပွန်၊ အကြွေစေ့များကို လက်ဆောင် ပစ္စည်းများ လဲလှယ်ကာ အပျော်တမ်း ကစားနည်းများ ဆောင်ရွက်မှုများ ရှိသော်လည်း အချို့သော ကလေးကစားကွင်း၊ အပန်းဖြေ စင်တာများသည် အဆင့်မြင့် အကြွေစေ့ ဂိမ်းစက်များ အများစု နေရာယူလေ့ရှိသည်။
နည်းပညာ တိုးတက်လာမှုကြောင့် အကြွေစေ့ ဂိမ်းစက်များတွင် အကြွေစေ့များ ထည့်သွင်းရန်မလိုဘဲ ကစားလိုသော ငွေပမာဏကို ဂဏန်းရိုက်ထည့်ကာ ဆော့ ကစားနိုင်ပြီး အနိုင်အရှုံးကို အဆိုပါ စက်က တွက်ချက်ပေးသည် အထိပင်ဖြစ်လာသည်။ အကြွေစေ့ ဂိမ်းကစားနည်းများမှာ သီးစုံ၊ ငါးမန်း၊ ဂဏန်းထိုးသော ကစားနည်းများနှင့် အခြားသော ကစားနည်း အမျိုးပေါင်း ၂၀ ကျော်ခန့်ရှိသည်။
အပန်းဖြေ အဆင့်မြင့်ကစားကွင်းများ၊ ကလေးကစားကွင်း (Amusement Centre) ဟု အမည်တပ်ထားသော နေရာများတွင် ကလေးများထက် ဆယ်ကျော်သက်၊ လူလတ်ပိုင်းနှင့် လူကြီးပိုင်းများ အများစုကို တွေ့မြင်ရသည်။
“ပထမပိုင်းတွေတော့ နိုင်သေးတယ်။ နောက်ပိုင်း လိုက်ရင်းလိုက်ရင်းနဲ့ ကုန်သွားတာ” ဟု တာမွေမြို့နယ်တွင် နေထိုင်သူ အသက် ၃၀ အရွယ် အမျိုးသား တစ်ဦးက ပြောကြားသည်။
အကြွေစေ့ဂိမ်း များကြောင့် အခြားသူ၏ ပစ္စည်းကို လောဘဖြင့် အလွယ်ရယူ လိုသောစိတ်၊ ဂိမ်းဆော့ကစားရာတွင် ရှုံးလာပါက မိမိပိုင်ပစ္စည်းများ၊ မိသားစုဝင် များ၏ တန်ဖိုးကြီး ပစ္စည်းများကို ရောင်းချ ပေါင်နှံကစားသူများ ရှိလာရာ မိသားစုတွင် အတွင်းရန်သူ ရှိသကဲ့သို့ပင် ဖြစ်ကြောင်း သင်္ဃန်းကျွန်း မြို့နယ်၊ ငမိုးရိပ်ရပ်ကွက်တွင် နေထိုင်သူ တက္ကသိုလ်ကထိက ဆရာမ တစ်ဦးက ပြောကြားသည်။
“ရေးထားတော့ ကလေးကစားကွင်းတဲ့၊ ကလေးကစားဖို့က ဟန်ပြပဲ။ အထဲမှာ လူကြီးတွေချည်းပဲ” ဟု ကျောက်တံတား မြို့နယ်တွင် တံဆိပ်တုံးလုပ်ငန်း လုပ်ကိုင်သူ အသက် ၄၀ ကျော် အမျိုးသားတစ်ဦးက ပြောကြားသည်။
ရန်ကုန်မြို့တော်ရှိ ကလေးကစားကွင်း (Amusement Centre) များတွင် ကစားကွင်း ဝန်ထမ်းတစ်ဦးက အကြွေစေ့ ကစားသူများထံမှ အကြွေစေ့ဝယ်ခြင်း၊ ရောင်းခြင်းများ ဆောင်ရွက်ပေးသည်။
ကစားကွင်း ကောင်တာတွင် တစ်စေ့လျှင် ကျပ် ၁၀၀ ဖြင့် ရောင်းချသော အကြွေစေ့သည် ၄င်းထံတွင် ၉၅ ကျပ်ဖြင့် ဝယ်ယူနိုင်ပြီး ကစားသူက ပြန်ရောင်းလိုပါက ကျပ် ၉ဝ ဖြင့် လက်ခံဝယ်ယူသည့် လောင်းကစား ဆန်လာသော ငွေပေးငွေယူမှု များအထိ လုပ်ကိုင်လာသည်။
“ဒီအကြွေစေ့ဂိမ်း တွေကြောင့် ဘဝ ပျက်သူပျက်၊ လင်မယားကွဲ၊ ကားပါကုန်တဲ့ သူတွေရှိတယ်” ဟု ပန်းဘဲတန်းမြို့နယ်တွင် နေထိုင်သူ အသက် ၂၇နှစ်အရွယ် အမျိုးသား တစ်ဦးက ပြောကြားသည်။
ယင်းကစားကွင်း အပန်းဖြေနေရာ များကို လာရောက်ကစားသူများ အပန်းဖြေရန် အတွက်သာ တရားဝင်လိုင်စင်ဖြင့် ခွင့်ပြုထား သော်လည်း ယင်းနောက်ကွယ်တွင် မမြင်နိုင်သော လောင်းကစားပုံသဏ္ဌာန် မျိုးစုံဖြင့် လုပ်ကိုင်မှုများလည်း ရှိသည်။
“ဆိုင်ထဲမှာ ကောင်တာက အလုပ်မရှုပ်ဘူး။ ဂိမ်းစက်နားက ဝန်ထမ်းကောင်မလေး တွေက စာရွက်တွေနဲ့ ရေးမှတ်လိုက် သော့နဲ့ ပိုက်ဆံထည့်လိုက် ငွေကြေးစာရင်းမှတ် လိုက်နဲ့ အလုပ်တွေ ရှုပ်နေတာပဲ။ မဲပြီးသာ ထိုးနေကြတာ ဘယ်လို အကျိုးအမြတ်တွေ ရှိတယ်၊ ဘယ်လိုတွေ ရသလဲဆိုတာ၊ တစ်ခါတလေ လာကြည့်သူအနေနဲ့ မသိနိုင်ဘူး” ဟု သိမ်ကြီးဈေး (စီ)ရုံတွင် ဖွင့်လှစ်ထား သော ဂိမ်းစင်တာတစ်ခုကို ရောက်ရှိခဲ့သူ အသက် ၃ဝ အမျိုးသားတစ်ဦးက ပြောကြား သည်။
ဂိမ်းစင်တာ၊ အပန်းဖြေ ကစားကွင်း၊ ကလေးကစားကွင်းများကို တာဝန်ရှိသူများက ကလေးများ ပျော်ရွှင်စွာကစားရန်၊ လူကြီးများ စိတ်အပန်းဖြေရန် အတွက် ခွင့်ပြု ထားသော်လည်း ကစားကွင်း အမည်ခံကာ လောင်းကစားဆန်သော ကစားနည်းများကို ဆောင်ရွက်ရန် မသင့်ကြောင်း ရန်ကုန်တိုင်း ဒေသကြီးရဲတပ်ဖွဲ့ဝင်တစ်ဦးက ပြောကြားသည်။
ခေတ်မီ ကလေးကစားကွင်းများ၊ အပန်းဖြေ ကစားကွင်းများ အမည်ခံကာ လောင်းကစားဆန်သည့် အကြွေစေ့ ဂိမ်းကစားမှု များသည် လူငယ်များအတွက် အကျင့်စာရိတ္တပိုင်း ဆိုင်ရာ ယိုယွင်းမှုများ ဖြစ်စေနိုင်ခြင်း တို့ကြောင့် ကြပ်မတ်စွာ ထိန်းချုပ်သင့်ကြောင်း ရန်ကုန်တိုင်းဒေသကြီး၊ သင်္ဃန်းကျွန်းမြို့နယ် မဲဆန္ဒနယ်မှ တိုင်းဒေသကြီး လွှတ်တော်ကိုယ်စားလှယ် ဦးကျော်က ပြောကြားသည်။
ရန်ကုန်မြို့တော်တွင် ဖွင့်လှစ်ထားသော ကလေးကစားကွင်း၊ အပန်းဖြေ ကစားကွင်းစင်တာများ လုပ်ကိုင်ရာတွင် ရန်ကုန်မြို့တော် စည်ပင်သာယာရေး ကော်မတီ၊ စီမံဌာနက တိုင်းဒေသကြီး အစိုးရ အဖွဲ့၏ ခွင့်ပြုချက်ဖြင့် ကလေးကစားကွင်း၊ အပန်းဖြေကစားကွင်း လုပ်ငန်းလုပ်ကိုင် ခွင့်ကို စိစစ်ထုတ်ပေးလျက် ရှိကြောင်း ရန်ကုန်မြို့တော် စည်ပင်သာယာရေး ကော်မတီ၊ စီမံရေးရာဌာန ထံမှ သိရှိရသည်။
အပန်းဖြေကစားကွင်း ကလေး ကစားကွင်းစင်တာများ လုပ်ကိုင်ရာတွင် ဖွင့်လှစ်မည့် မြို့နယ်အုပ်ချုပ်ရေးမှူး၏ ထောက်ခံချက်၊ ဂိမ်းစက်ပစ္စည်းများ တရား ဝင်တင်သွင်းလာမှု စာရွက်စာတမ်းများ၊ ယင်းအဖွဲ့မှ မြေပြင်တွင် ကွင်းဆင်းစစ် ဆေးပြီး လုပ်ငန်းတည်နေရာ မီးသတ်၏ ထောက်ခံချက်၊ လျှပ်စစ်၊ ကျန်းမာရေးဌာန လုပ်ငန်းတည်နေရာနှင့် အနီးဆုံး ပတ်ဝန်းကျင် ၁၀ ဦး၏ ထောက်ခံချက်၊ လုပ်ငန်းနှင့် သက်ဆိုင်သော ဌာနဆိုင်ရာများ၏ ထောက်ခံချက်များ ပါဝင်ကာ မြို့နယ်ရုံးတွင် လျှောက်ထားရမည် ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီ (Y.C.D.C) စီမံရေးရာဌာနထံမှ သိရှိရသည်။
လျှောက်ထားရာတွင် အသုံးပြုသော ကလေးကစားကွင်း စက်ပစ္စည်းများသည် လောင်းကစားပြုသော စက်မဟုတ်ကြောင်းကို တာဝန်ခံရမည်ဖြစ်ပြီး လောင်းကစား ပြုလုပ်ပါက တည်ဆဲဥပဒေအရ အရေးယူခံရမည် ဖြစ်ကြောင်းနှင့် လိုင်စင်ပိတ်သိမ်းသည် အထိ ဆောင်ရွက်ရမည်ကို ဝန်ခံသိရှိ ကြောင်း လျှောက်ထားသူဘက်က ဝန်ခံချက် ရေးသား လျှောက်ထားရမည် ဖြစ်ကြောင်း Y.C.D.C စီမံရေးရာ ဌာနထံမှ သိရှိရသည်။
လုပ်ငန်းလုပ်ကိုင်ခွင့် လိုင်စင် လျှောက်ထားမှုကို မြေပြင်တွင် ကွင်းဆင်းစစ်ဆေးပြီးနောက် ခရိုင်ရုံးမှ ထပ်မံစိစစ်ပြီး Y.C.D.C၊ စီမံရေးရာဌာနထံ တင်ပြရကြောင်း၊ လုပ်ငန်းလိုင်စင် ပေးရန် စီမံဌာနမှ တစ်ဆင့် ရန်ကုန်မြို့တော် စည်ပင်သာယာရေး ကော်မတီဝင်များ အစည်းအဝေးတွင် ခွင့်ပြုရန် သင့်မသင့် ဆုံးဖြတ်ပြီး တိုင်းဒေသကြီး အစိုးရထံ ထပ်မံတင်ပြကာ တိုင်းဒေသကြီး အစိုးရအဖွဲ့ ၏ ခွင့်ပြုချက်ဖြင့် ချထားပေးသော လုပ်ငန်းများ ဖြစ်ကြောင်း Y.C.D.C စီမံရေးရာဌာန ထံမှ သိရှိရသည်။
အပန်းဖြေကစားကွင်း စင်တာ၊ ကလေးကစားကွင်းများ လုပ်ငန်းလိုင်စင် ပေးရန် လိုအပ်ပါက စစ်ဆေးမှုများကို ထပ်မံ ဆောင်ရွက်ပြီး လတ်တလောတွင် အပန်းဖြေ ကစားကွင်းစင်တာ သုံးခုကို လုပ်ငန်းလိုင်စင် ချပေးရန် တိုင်းဒေသကြီးအစိုးရက ပြန်လည်စိစစ်ရန် အကြံပြုချက်ကြောင့် ပြန်လည် စိစစ်လျက် ရှိကြောင်း၊ အပန်းဖြေ ကစားကွင်းစင်တာ လုပ်ငန်းလိုင်စင်ပေးရန် အဆင့်ဆင့်စစ်ဆေး အတည်ပြုရ သောကြောင့် နှစ်ပတ်မှ ၄၅ ရက်ခန့် ကြာမြင့်ကြောင်း ယင်းဌာန တာဝန်ရှိသူတစ်ဦးက ပြောကြားသည်။
“သူတို့က စက်တွေပြပြီး ဒါကို ဒီလို ဆော့ရတယ်သာ ပြောပေမယ့် သူတို့ပြောတာပဲ သိတာ။ စက်အကြောင်း၊ ဒီစက်က ဘယ်လိုလောင်းကစားနည်းနဲ့ လုပ်ရတယ် ဆိုတာ သွားစစ်တဲ့သူတွေ ကိုယ်တိုင် နားမလည်နိုင်တာမျိုး ရှိတယ်” ဟု ၄င်းက ရှင်းပြသည်။
ရန်ကုန်တိုင်းဒေသကြီးတွင် ဖွင့်လှစ်ထားသော အပန်းဖြေကစားကွင်းနှင့် ကလေး ကစားကွင်းဆိုင် များမှာ ရန်ကုန်မြို့တော် စည်ပင်သာယာရေး ကော်မတီ၏ ထုတ်ပြန် ထားသော စည်းမျဉ်းစည်းကမ်း များအတိုင်း လိုက်နာဆောင်ရွက်ရမည် ဖြစ်သော်လည်း ဆိုင်အတွင်း ငွေကြေးလောင်းကစား ပါဝင် လာပါက သက်ဆိုင်ရာ ရဲစခန်းနှင့် တိုင်း ရဲတပ်ဖွဲ့ရုံးသို့ တိုင်ကြားနိုင်ကြောင်း ရန်ကုန် တိုင်းဒေသကြီး အစိုးရအဖွဲ့မှ တာဝန်ရှိသူ တစ်ဦးက ပြောကြားသည်။
“ဒီဆိုင်တွေကြောင့် ကျောင်းသားတွေ လောင်းကစား လုပ်တတ်ပြီး ပျက်စီး လာကြတယ်။ ခေတ်မီအပန်းဖြေ အဆင့်မြင့် ကစားကွင်းတွေကို တိုင်းဒေသကြီး ခွင့်ပြုမိန့်နဲ့ ဖွင့်လှစ်တာ မှန်ပေမယ့် စည်ပင်က လိုင်စင်ထုတ်ပေးပြီးမှ တိုင်းဒေသကြီးကို မူသဘောအရ ခွင့်ပြုမိန့်တင်တာ။ သတ်မှတ်ချက် စည်းကမ်းတွေကို မလိုက်နာဘဲ လောင်းကစား ပြုလုပ်လာတယ်ဆိုရင် ရဲက ဖမ်းရမှာပဲ” ၄င်းက ဆက်လက်ပြောကြားသည်။
ရန်ကုန်တိုင်းဒေသကြီးတွင် ခေတ်မီ ကလေးကစားကွင်း၊ ခေတ်မီအပန်းဖြေ ကစားကွင်း လုပ်ကိုင်ခွင့် လုပ်ငန်းလိုင်စင် ထုတ်ပေးထားသည်မှာ ၃၉ ခုသာရှိကြောင်း ယင်းဌာနထံမှ သိရှိရသည်။
သို့သော် အကြွေစေ့ လောင်းကစား စက်များမှာ ဆင်ခြေဖုံးမြို့နယ် များတွင် ရာနှင့်ချီ ရှိနိုင်ကြောင်း မြို့ခံအချို့က ဆိုသည်။
အကြွေစေ့ ဂိမ်းဆိုင်အများစုမှာ ရပ်ကွက်များတွင် Network ဂိမ်းဆိုင်အဖြစ် လုပ်ငန်းလိုင်စင် ယူပြီး ဆိုင်များဖွင့်ကာ ပြင်ပမှ ဆိုင်အတွင်း လွယ်ကူစွာ မမြင်နိုင် စေရန် ခန်းဆီးလိုက်ကာများကို တံခါးပေါက် အပြည့်တပ်ဆင်ထားပြီး ဂိမ်းစက်များမှ အသံများ အပြင်သို့ မကြားနိုင်စေရန် စီမံထား ကြောင်း၊ အဆိုပါဂိမ်းဆိုင်များ အနီးတွင် ရဲတပ်ဖွဲ့ဝင်များနှင့် သတင်းပေးများ စီးနင်းသော မော်တော်ဆိုင်ကယ် များကို မကြာခဏ တွေ့ရှိရသောကြောင့် သက်ဆိုင်ရာမြို့နယ် အာဏာပိုင်များနှင့် အပေးအယူ ပြုလုပ်ပြီး ဖွင့်လှစ်နေသည်ဟု ယူဆကြောင်း ရန်ကုန် တိုင်းဒေသကြီး အတွင်းရှိ မြို့နယ် အထွေထွေ အုပ်ချုပ်ရေးမှူးတစ်ဦးက ပြောကြားသည်။
ရန်ကုန်တိုင်းအတွင်း ရန်ကင်း၊ တာမွေ၊ မင်္ဂလာတောင်ညွန့်၊ လသာမြို့နယ် တို့တွင် အဆိုပါဂိမ်းဆိုင်များကို အများဆုံး ဖွင့်လှစ်ထားသည်ကို တွေ့ရှိရပြီး အဆိုပါ ဂိမ်းစက်များမှာ တရုတ်နိုင်ငံမှ ဝင်ရောက်လာသော ကာစီနို လောင်းကစားစက်များ ဖြစ်ကြောင်း၊ ဂိမ်းစက်များကို ကွန်ပျူတာ ဆော့ဖ်ဝဲများဖြင့် ပြုပြင်ထားပြီး လောင်းကစားငွေ ပမာဏကိုကြည့်ကာ စက်ကို အနိုင်အရှုံး အခွင့်အရေးများ ပြုပြင်ပြောင်းလဲ နိုင်ကြောင်း မင်္ဂလာတောင်ညွန့်မြို့နယ် ရဲစခန်းမှ ရဲအရာရှိ တစ်ဦးကဆိုသည်။
အကြွေစေ့ ဂိမ်းဆိုင်များတွင် ရုပ်ရည်လှပသော မိန်းကလေးဝန်ထမ်းများကို ခန့်ထားပြီး လာရောက် ကစားသူများကို အချို့ဆိုင်များတွင် ဘီယာ၊ အချိုရည်၊ စီးကရက်များကို အခမဲ့ ဝန်ဆောင်မှုပေးကာ မပြန်ချင်အောင် ဆွဲဆောင်ကြောင်း ပုဇွန်တောင် မြို့နယ်တွင်းရှိ ဂိမ်းဆိုင်အနီးတွင် နေထိုင်သူ အမျိုးသားတစ်ဦးက ပြောကြားသည်။
“တရားဝင် လောင်းကစား ပြုလုပ်ခွင့် ရထားတာ ကျနေတာပဲ။ ဆိုင်ထဲမှာ ကျောင်းသားတွေနဲ့ ရပ်ကွက်ထဲက လူတွေ ကစားနေကြတာ နိုင်ငံခြားဇာတ်လမ်းခွေ တွေထဲက ကာစီနိုကြီးတွေ ကျနေတာပဲ” ဟု၎င်းက ဆိုသည်။
ရန်ကုန်မြို့တော် စည်ပင်သာယာရေး ကော်မတီသည် စည်ပင်သာယာ နယ်နိမိတ်တွင်း လုပ်ငန်းလုပ်ကိုင်ခွင့် ကိုသာ ချထားပေးခြင်းသာ ဖြစ်ပြီး အပန်းဖြေကစားကွင်း ၁၀ ခုအနက် တစ်ခုသာ လောင်းကစားဆန်သော လုပ်ကိုင်မှုများ ရှိနိုင်ကြောင်း၊ ခေတ်မီကစားကွင်း၊ အပန်းဖြေ ကစားကွင်းများတွင် မသမာသောနည်းဖြင့် လောင်းကစားဆန်သော ဆော့ကစားမှု များသည် ရဲအရေးပိုင် ဖြစ်သောကြောင့် ရဲတပ်ဖွဲ့ဝင်များက စစ်ဆေးဖော်ထုတ် အရေးယူသင့်ကြောင်း မြို့တော် စည်ပင်စီမံရေးရာဌာနမှ တာဝန်ရှိသူတစ်ဦး က ပြောကြားသည်။
“ဖမ်းချင်ရင် လမ်းဘေးဖဲဝိုင်းတောင် ဖမ်းသေးတာပဲ။ တကယ်ဖမ်းချင်ရင် မလွတ်ဘူး” ဟု ဗိုလ်တထောင်မြို့နယ်တွင် နေထိုင်သူ အစိုးရဝန်ထမ်း တစ်ဦးက ပြောကြားသည်။
ရန်ကုန်တိုင်းဒေသကြီးရှိ အပန်းဖြေ ကစားကွင်း၊ ကလေးကစားကွင်း များသည် ရန်ကုန်မြို့တော် စည်ပင်သာယာရေး ကော်မတီက လိုင်စင်ထုတ်ပေးထားခြင်းကြောင့် ဆိုင်တွင်း ဝင်ရောက် စစ်ဆေးရန်မှာ အခက်အခဲများ ရှိကြောင်း၊ လိုင်စင်ထုတ် ပေးသော ဌာနအနေနှင့် စည်ကမ်းချက်နှင့် အညီ ဆောင်ရွက်ခြင်းရှိမရှိကို ရှောင်တခင် စစ်ဆေးပြီး စည်ကမ်းဖောက်ဖျက်ပါက ရဲတပ်ဖွဲ့ကို အမှုဖွင့် တိုင်ကြားသင့်ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ ရဲအရာရှိတစ်ဦးက ပြောကြားသည်။
ယခုနှစ် ဇန်နဝါရီလမှ အောက်တိုဘာ လကုန်အထိ ရန်ကုန်တိုင်းဒေသကြီးတွင် တရားမဝင် အကြွေစေ့ လောင်းကစားမှု ၁၈မှု၊ အကြွေစေ့ ဂိမ်းစက် ၂၁၆လုံး ၊ ဖမ်းမိသူ ၁၆၉ ဦးကို ဖမ်းဆီး အရေးယူထားကြောင်း ရန်ကုန်တိုင်းဒေသကြီး ရဲတပ်ဖွဲ့၏ စာရင်းများအရ သိရှိရသည်။
ရဲတပ်ဖွဲ့ဝင်များမှာ လုံခြုံရေးတာဝန်၊ ဒုစရိုက်နှိမ်နင်းရေး တာဝန်များကို ထမ်းဆောင်နေရ သောကြောင့် အကြောင်းစုံ မသိရှိနိုင်ဘဲ ကစားကွင်းအမည်ခံ လောင်းကစားပြုလုပ်နေမှု များကို သက်ဆိုင်ရာ တာဝန်ရှိသူများနှင့် ပြည်သူများ၊ ကလေး မိဘများက သတင်းပေး တိုင်ကြားပါက ဖမ်းဆီးအရေးယူမည် ဖြစ်ကြောင်း ရန်ကုန် တိုင်းဒေသကြီး ရဲတပ်ဖွဲ့မှူးရုံးမှ ရဲအရာရှိ တစ်ဦးက ရှင်းပြသည်။
“လောင်းကစားပုံစံ လုပ်ရဲတယ် ဆိုတော့ သူ့မှာ ပိုင်တဲ့သူတွေ ရှိလိမ့်မယ်။ လိုင်စင်နဲ့ဆိုတော့ ဖမ်းဖို့က မလွယ်ဘူး” ဟု ကျောက်တံတားမြို့နယ် ရဲစခန်းမှ ရဲအရာရှိ တစ်ဦးက ပြောကြားသည်။
ကလေးကစားကွင်းများမှာ တရားဝင် ခွင့်ပြုလိုင်စင် ရထားသောကြောင့် ဆိုင်အတွင်း လောင်းကစားပြုလုပ်ခြင်း၊ အပျော်ကစားခြင်းကို လူထုက တိုင်ကြားနိုင်မှသာ ရဲတပ်ဖွဲ့ဝင်များက သိရှိရကြောင်း၊ ကလေးငယ်များ၏ အုပ်ထိန်းသူ မိဘများက သတင်းပေး တိုင်ကြားကြပြီး ကလေးငယ် များက အိမ်ရှိပိုက်ဆံများကို မိဘမသိအောင် ခိုးယူပြီး ဆော့ကစားခြင်း များလည်း ရှိကြောင်း ရန်ကုန်တိုင်းဒေသကြီး ရဲတပ်ဖွဲ့မှူး ရုံးမှ ရဲအရာရှိတစ်ဦးက ရှင်းပြသည်။
“ဂိမ်း (အကြွေစေ့) ဆိုင်မှာ ဝင်ကစားသူ အများစုက ရှုံးတာများတယ်။ ပိုက်ဆံ မလောက်လို့ ဆက်ကစားချင်သေးတယ် ဆိုရင် တန်ဖိုးရှိတဲ့ ပစ္စည်းပါခဲ့ရင် ဆိုင်ရှင်ဆီမှာ အပေါင်တင်ပြီး ကစားလို့ရတယ်။ ကျွန်တော့်သူငယ်ချင်း တစ်ယောက်ဆို ရှုံးတာကို ဆက်ကစားရင်း ဆိုင်ကယ်နဲ့ ဟန်းဖုန်းပါ အိမ်ပြန် ပါမလာတော့ဘူး” ဟု ပုဇွန်တောင်မြို့နယ် ညောင်တန်းအိမ်ရာတွင် နေထိုင်သူ ကိုချိုကြီးက ပြောကြားသည်။
ဂိမ်းစက်များမှာ တရုတ်နိုင်ငံမှ အများဆုံး တင်သွင်းပြီး ယခင်ဝယ်ယူစဉ် ကတည်းက စက်များကို ပြင်ဆင်ထားသဖြင့် ဆိုင်ရှင်က အနိုင် ၅၀ ရာခိုင်နှုန်း ယူဆောင်ထားပြီး ရန်ကုန်သို့ ရောက်ရှိချိန်တွင် စက်များကို ထပ်မံ ပြင်ဆင်သောကြောင့် နိုင်ခြေရာခိုင်နှုန်း နည်းကြောင်း တောင်ငူတွင် အကြွေစေ့လုပ်ငန်း လုပ်ကိုင်သူ တစ်ဦး၏ ဆွေမျိုးတော်စပ်သူ တစ်ဦးက ရှင်းပြသည်။
ဂိမ်းစင်တာများတွင် အကြွေစေ့များ ကို ပြန်မလဲပေးဟု ဆိုသော်လည်း နောက်ကွယ်တွင် ပြန်လဲပေးနေမှုများ ရှိသည်ကို ကြားသိရပြီး ယင်းကဲ့သို့ ပြုလုပ်နေမှုများကို ပြည်သူလူထုက သိရှိပါက သတင်းပေး တိုင်ကြားသင့်ကြောင်း တရားလွှတ်တော်ရှေ့နေ ဦးကျော်ဟိုးက ဆိုသည်။
“အကြွေစေ့နဲ့ ဂိမ်းဆော့ရုံလောက်နဲ့တော့ လောင်းကစားမှု မမြောက်ပါဘူး။ အကြွေစေ့ကို ငွေနဲ့ပြန်လဲပေးတယ် ဆိုရင် လောင်းကစားမှု မြောက်တယ်။ ဒါတွေကို ရဲတွေက ဖော်ထုတ်ရမယ်” ဟု ၄င်းက ဆိုသည်။
လောင်းကစားဟု ဆိုရာတွင် ၁၉၈၆ ခုနှစ် လောင်းကစား အက်ဥပဒေအရ လောင်းကစား ပြုလုပ်ရာတွင် အသုံးပြုသည့် ဖဲ၊ အံစာ၊ မာကျောက်၊ တုံကင်၊ ဒင်္ဂါး၊ ဇယ်ပြား၊ ကစားခုံ၊ ကစားခွက်၊ ဇယား၊ ကားချပ်၊ သေတ္တာ၊ ပုံစံ၊ လက်မှတ် စာရင်းများ၊ လောင်ကစားရန် ပြုလုပ်ထားသော အသုံးပြုနိုင်သော အရာများ လောင်ကစားရာတွင် အသုံးပြုသော တိရိစ္ဆာန်၊ ယာဉ်တို့ ပါဝင်ကြောင်း အဆိုပါ ဥပဒေတွင် ဖော်ပြထားသည်။
လောင်းကစား ပြုလုပ်သူကို လောင်းကစားပုဒ်မ ၁၃/က အရ ထောင်ဒဏ် ခြောက်လမှ တစ်နှစ်ထိ ချမှတ်နိုင်ပြီး ငွေဒဏ်တစ်ထောင်ပါ ထပ်လောင်း ချမှတ်နိုင်ကြောင်း၊ လောင်းကစားဒိုင်ကို လောင်းကစားပုဒ်မ ၁၄/က အရ ထောင်ဒဏ်တစ်နှစ်မှ သုံးနှစ်ထိ ချမှတ်နိုင်ပြီး ဒဏ်ငွေ တစ်ထောင်မှ ငါးထောင်ထိ ထပ်လောင်း ချမှတ်နိုင် ကြောင်း ၄င်းက ရှင်းပြသည်။
အပန်းဖြေ ကစားကွင်း (Amusement Centre) များတွင် အကြွေစေ့ ကစားနည်းများကို လောင်းကစားသဖွယ် ပြုလုပ်နေခြင်း များကို အများပြည်သူက အမှုဖွင့် တိုင်ကြားမှသာ အရေးယူခြင်းထက် ရဲတပ်ဖွဲ့ဝင်၊ စည်ပင်ဝန်ထမ်း၊ အုပ်ချုပ်ရေး အဖွဲ့က သိရှိပါက ရှောင်တခင် စစ်ဆေးခြင်း များကို ထိထိရောက်ရောက် ဖမ်းဆီးဆောင်ရွက် အရေးယူသင့်ကြောင်း သင်္ဃန်းကျွန်း မြို့နယ် တိုင်းဒေသကြီး လွှတ်တော်ကိုယ်စားလှယ် ဦးကျော်က ပြောကြားသည်။
“ပြည့်တန်ဆာ ဖမ်းတာတောင် အသွင်ယူပြီး ဖမ်းသေးတာပဲ။ ဒီနေရာတွေမှာ အသွင်ယူဖမ်းဖို့ ဘာလို့ ခက်နေတာလဲ။ ဖမ်းမယ်ဆိုရင် ဖြစ်ပါတယ်” ဟု သင်္ဃန်းကျွန်း မြို့နယ်တိုင်းဒေသကြီး လွှတ်တော် ကိုယ်စားလှယ်ဦးကျော်က ပြောကြားသည်။
ခေတ်မီ ကလေးကစားကွင်း၊ အပန်းဖြေ ခေတ်မီ ကစားကွင်းများကို စစ်ဆေးသူများ အနေနှင့် ကစားကွင်းများတွင် ထည့်သွင်းထားသော ကစားသည့် ပစ္စည်းများကို တတ်ကျွမ်းနားလည်သူ ပါဝင်ရန် လိုအပ်ပြီး၊ လောင်ကစားအသွင်ဖြင့် ဆောင်ရွက်နိုင်သော ဂိမ်းစက်ပစ္စည်းများ ပါဝင်ပါက ပြင်းပြင်းထန်ထန် ဒဏ်ရိုက်ခြင်း၊ အရေးယူခြင်းများ ဆောင်ရွက်သင့်သည်။
“လောင်းကစားလုပ်တယ်လို့ ကြားတာ သိတာဆိုရင် ရဲက အရေးယူသင့်တယ်။ တရားဝင် လုပ်ခွင့်ပေးလို့ ဆိုတာ ကစားကွင်း လုပ်ငန်းလုပ်ခွင့် လိုင်စင်ပဲပေးတာ။ လောင်းကစား လုပ်ဖို့ပေးတာ မဟုတ်ပါဘူး။ လိုင်စင်ပဲ ထုတ်ပေးတဲ့ အဖွဲ့အစည်း ဖြစ်တာကြောင့် ရဲလို ဝင်ရှာဖို့ ဆိုတာ မဖြစ်နိုင်ဘူး။ သူတို့က စုံစမ်းရှာဖွေ ဖမ်းဆီးသင့်တယ်” ဟု ရန်ကုန်မြို့တော် စည်ပင်သာယာရေး ကော်မတီ၊ စီမံရေးရာဌာန တာဝန်ရှိသူတစ်ဦးက ထောက်ပြ ပြောကြားသည်။
လောင်းကစား ပပျောက်ရန် လုပ်ဆောင် နေမှုများ ရှိသော်လည်း အပန်းဖြေကစားကွင်း အချို့တွင် လောင်းကစားဆန်သော ကစားနည်းများ ဆောင်ရွက်မှုသည် တရားဝင် လောင်းကစားလုပ်ခွင့် ပြုထားသည်ဟု အများပြည်သူ ထင်မြင်စေသောကြောင့် ထိရောက်စွာ အရေးယူသင့်ကြောင်း ပန်းဘဲတန်းမြို့နယ် အမှတ် (၁၀)ရပ်ကွက်တွင် နေထိုင်သူ အမျိုးသားတစ်ဦးက ပြောကြားသည်။
လောင်းကစားဆန်သော အပန်းဖြေ ကစားကွင်းများကို ထိရောက်သော အရေးယူမှုများ ဆောင်ရွက်ခြင်းမရှိပါက၊ အခြားသော ကလေးကစားကွင်း များကို ထိခိုက်နစ်နာ စေသောကြောင့် ထိရောက်စွာ အရေးယူသင့်ကြောင်း (Y.C.D.C) စီမံရေးရာဌာနမှ တာဝန်ရှိသူတစ်ဦးက ပြောကြားသည်။
အဆိုပါကာစီနို အကြွေစေ့ လောင်းကစား လုပ်ငန်းများ တရားဝင် ဖွင့်လှစ်ခွင့်ပေးကာ အစိုးရမှ အခွန်ကောက်ခံခြင်း၊ လာရောက် ကစားသူများထံမှ အခွန် စည်းကြပ်ပါက အစိုးရအနေနှင့် အခွန်ရရှိနိုင်မည် ဖြစ်သည်။ သို့သော် တရားဝင်ဖွင့်ခွင့် ပေးရန် အစီအစဉ် မရှိပါက ဥပဒေအရ ကြပ်ကြပ်မတ်မတ် အရေးယူရန် လိုအပ်မည်ဖြစ်သည်။
လက်ရှိကာလသည် တိုင်းပြည်မှာ ဖွံ့ဖြိုးဆဲကာလ ဖြစ်သောကြောင့် ပြည်သူများကို ဆင်းရဲတွင်းနက်စေသော ကာစီနို လောင်းကစား လုပ်ငန်းများကို ခွင့်ပြုရန် မသင့်ကြောင်း ရန်ကုန်တိုင်းဒေသကြီး လွှတ်တော်ကိုယ်စားလှယ် တစ်ဦးနှင့် ရန်ကုန်မြို့တော် စည်ပင်သာယာရေး ကော်မတီမှ အရာရှိကြီးတစ်ဦးက ပြောကြားသည်။
ရန်ကုန်တိုင်းဒေသကြီး အတွင်း အကြွေစေ့ကစားနည်း ရှိသော ကစားကွင်းအချို့၊ ဂိမ်းစင်တာ အချို့တွင် လောင်းကစားသဖွယ် ပြုလုပ်နေသည်ကို တိုင်စာများ ရရှိသောကြောင့် မြို့နယ်တိုင်းတွင် ရှာဖွေစုံစမ်းကာ အချို့ဆိုင်များကို လောင်းကစား ပြုလုပ်နေကြောင်း လက်ရဖမ်းဆီးခြင်း မရှိသော် လည်း ဆိုင်ဖွင့်ခွင့် လိုင်စင်များ ပြန်လည် ရုပ်သိမ်းထားကြောင်း၊ မြို့နယ်ရဲတပ်ဖွဲ့ဝင် များမှလည်း ဆိုင်အတွင်း လောင်းကစား ပြုလုပ်နေသည်ဟု သတင်းရရှိသော ဆိုင်များကို ဖမ်းဆီးနိုင်ရေး အတွက် ကြိုးစားဆောင်ရွက်လျက် ရှိကြောင်း ၄င်းကဆိုသည်။
ကလေးအမည်တပ် လူကြီး အကြွေစေ့ လောင်းကစားဝိုင်းများကား တွင်ကျယ်ဆဲ။

ကြည်ကြည်လွင်၊ ခိုင်စိုးလင်း၊ ကျော်ဦးနိုင်