.jpg)
ကားဆင်းတွန်းခိုင်းပြီး သိန်း ၁၂၀ ငွေထုပ်တင် မောင်းပြေးသည့် အငှါးယာဉ်မောင်း
ယခုအမှုကို တိုင်တန်းသူမှာ အသက် ၄၀ နှစ်အရွယ် ကိုအောင်မိုးဆိုသူဖြစ်ပြီး ၎င်းသည် အုတ်သဲကျောက် ရောင်း ၀ယ်ရေး လုပ်ကိုင်သူဖြစ်ကြောင်း ရဲဌာနကအတည်ပြုထားသည်။
၎င်းသည် ထိုနေ့မွန်းလွဲ ၁ နာရီခန့်က နေအိမ်မှ ဘုရင့်နောင်ပွဲရုံဝင်းရှိ ကမ္ဘောဇဘဏ်မှ ငွေလွှဲရန် ငွေကျပ် သိန်း ၁၂၀ ကို အနက်ရောင်ကြွပ်ကြွပ်အိတ်အတွင်းထည့်လျက် အင်းစိန်ဈေးရှေ့မှ နံပါတ်မမှတ်မိသည့် အဖြူရောင် ပရိုဘောက်အငှားကားကို ငှားစီးခဲ့သည်ဟု တရားလိုက ရဲကိုထွက်ဆိုထားသည်။
ထို့နောက် ဘုရင့်နောင်သစ်တောရုံးရှေ့အရောက်တွင် တက္ကစီယာဉ်မောင်းက ကားပျက်သွားသဖြင့် ဆင်းတွန်းပေး ရန် ပြောသဖြင့် ကားငှားစဉ်ကတည်းက ကားပေါ်၌ပါလာသော ယာဉ်မောင်း၏ အဖော်က ဆင်းတွန်းပေးခဲ့ကြောင်း၊ ထိုသူဆင်းတွန်းသော်လည်းမရသဖြင့် ၎င်းကလည်းငွေထုပ်ကို ကားပေါ်တွင် ထားခဲ့ကာ ကူတွန်းပေးရန် ဆင်းခဲ့ကြောင်း တရားလိုကရဲကိုဆက်ပြောထားသည်။
ယင်းသို့ တရားလိုက ဆင်းတွန်းပေးမည်ဟု ကားပေါ်မှ ဆင်းလိုက်ချိန်တွင်ပင် ကနဦးက ကားတွန်းပေးနေသော အငှားယာဉ်မောင်း၏ အဖော်က ကားပေါ်ကို ပြေးတက်ကာ ကားမှာမောင်းထွက်ပြေးသွားပြီး ငွေထုပ်လည်း ပါသွားကြောင်း တရားလိုက ထွက်ဆိုထားသည်။
ထို့ကြောင့် ငွေကျပ်သိန်း ၁၂၀ ကို ခိုးယူထွက်ပြေးသွားသူ နှစ်ဦးကို ဖမ်းဆီးအရေးယူပေးပါရန် တရားလို ကိုအောင်မိုးက တိုင်တန်းသဖြင့် အင်းစိန်ရဲစခန်းကလည်း အမှုအမှတ် (ပ)၉၇၅/၂၀၁၃ဖြင့် အမှုဖွင့်ထားပြီး ငွေခိုးပြေးသွားသူများကို လိုက်လံရှာဖွေနေကြောင်း သိရသည်။
တရားလို၏အဆိုအရ ယာဉ်မောင်းသည် ဆံပင်တို၊ မျက်နှာဝိုင်း၊ ခန္ဓာကိုယ်ဝ၊ အသားဖြူသူဖြစ်ပြီး၊ ကားဆင်းတွန်း ယောင်ဆောင်သော ယာဉ်မောင်း၏ အဖော်မှာ ဆံပင်တို၊ မျက်နှာသွယ်၊ ခန္ဓာကိုယ်ပိန်၊ အသားမဲပြီး အရပ်ခြောက်ပေခွဲခန့် ရှိကြောင်း ရဲမှတ်တမ်းတွင်တွေ့ရသည်။
ထိုသူများကို ဖမ်းမိလျှင် ပြစ်မှုဆိုင်ရာ ဥပဒေပုဒ်မ ၃၇၉ဖြင့် တရားစွဲဆိုမည်ဟု ရဲဌာနကဆိုထားသည်။
Source : Mizzima
.jpg)
No comments:
Post a Comment