ရွှေမှုန်ရတီနှင့် တွေ့ဆုံခြင်း

24 May 2013  |

By The Voice Journal

မြန်မာ အနုပညာရှင် ငါးဦး တည်ထောင် ထားသော အနုပညာ ပျိုးခင်းမှ သရုပ်ဆောင် လောကကို ဝင်ရောက်လာသူ ရွှေမှုန်ရတီ၏ အနုပညာ လောကသို့ စတင်ခဲ့ သောခြေလှမ်းများနှင့် လတ်တလော ပရိသတ် ဝေဖန်မှုကို အများဆုံး ခံနေရသော အနမ်းပါသော ဇတ်ဝင်ခန်း အကြောင်းနှင့် ဆက်ရန် ရှိသေးတဲ့ ပညာရေး အကြောင်းလေး တွေကို ဖော်ပြပေး လိုက်ပါတယ်။
Voice : အနုပညာ ပျိုးခင်းထဲကို ဘယ်လို ဝင်လာဖြစ်တာလဲဆိုတာ။
SHYT : ရွှေမှုန်တို့ကို Star & Model အေဂျင်စီကနေ လာရွေးလို့ပါသွားတဲ့ သဘောပါ။ ညီမက ဒီအနုပညာပျိုးခင်းကမှ သရုပ်ဆောင် ဘဝထဲကို စပြီးခြေလှမ်းတာပါ။ အရင်တုန်းကတော့ မော်ဒယ်လ်ဘဝနဲ့ သုံးလလောက် နေပြီးတော့မှ ခြေလှမ်းစလှမ်းတာဆိုတော့ အတွေ့ အကြုံက သိပ်မရှိဘူးလေ။ ရွှေမှုန် ပထမဆုံးခြေချတာက ကိုခန့်နဲ့ အနုပညာပျိုးခင်းက သုံးယောက်နဲ့ ဒရာမာ ဇာတ်ကားတစ်ခုပါ။ အဲဒါပြီးမှ ညီမ သခင့်ကျေးကျွန် ဆိုတဲ့ကားပါ။

Voice : အခုတစ်လော ပရိသတ်တွေ ဝေဖန်နေတဲ့ မျက်လုံးလေးကလယ်ကလယ်နဲ့ ကလေးချစ် ဇာတ်ကားတွေ အပေါ်ကို ဘယ်လိုတုံ့ပြန်ချင်လဲ။

SHYT : တချို့ပရိသတ်တွေက အသက် ငယ်ငယ်လေးနဲ့ ဒီလိုမျိုး မရိုက်ခိုင်းသင့်ဘူးလို့ ပြောနေကြတယ်။ ဒါပေမဲ့ ရွှေမှုန်တို့ သရုပ်ဆောင်တွေက သဏ္ဌာန်လုပ် သရုပ်တူတွေပါ။ ရွှေမှုန့် စိတ်ထဲမှာ ကြိုးစားချင်စိတ်ပဲ ရှိပါတယ်။ ရွှေမှုန်က ဒါရိုက်တာခိုင်းတဲ့အတိုင်း လုပ်တယ်။ ပြီးတော့ ရွှေမှုန်ဟာ အသစ်တစ်ယောက်ဖြစ်တဲ့အတွက် ကြိုးစားချင်စိတ်ပဲ ရှိပါတယ်။ နားလည်ပေးတဲ့ ပရိသတ်ကြီးကိုလည်း ဆက်ပြီး နားလည်ပေးပါလို့ ပြောချင်ပါတယ်။

Voice : ဇာတ်ကားတွေရိုက်တဲ့အခါ ကိုယ့် ဘက်က ဘယ်လိုပြင်ဆင်မှုတွေ လုပ်လဲ။

SHYT : ရွှေမှုန်က အရင်တုန်းထဲက ကားရိုက်တာတွေဆိုရင် ဂရုစိုက်တတ်တဲ့ အကျင့်ရှိတယ်။ ဒီကား ဘာဝတ်ရမယ်။ ဘယ်လိုလေး လုပ်လိုက် မယ်ဆိုတာ အစကတည်းက တွက်ချက်ထားတာပါ။ ဖတ်ဖို့အချိန်မရဘူး ဆိုရင်တောင် ဇာတ်လမ်း သဘောတရားကို ဖတ်ပြီးတော့မှ ရိုက်တဲ့နေ့မှ ဇာတ်လမ်းကို သေချာပြန်ဖတ်တယ်။ ဘယ်ခန်းမှာ ဘယ်လိုဝတ်ရမယ်၊ ဘယ်လို သရုပ်ဆောင်ရမယ် ဆိုတာကို ခေါင်းထဲမှာ စဉ်းစားတယ်။

Voice : အခုချိန်မှာ ကိုယ်ရိုက်ချင်တဲ့ ဇာတ်ရုပ် တွေရှိလား။ အခုရိုက်ခဲ့တဲ့ အတွေ့အကြုံအရ အခက်အခဲတွေ ဘယ်လိုရှိခဲ့လဲ။

SHYT : ဟုတ်။ ရွှေမှုန် ဇာတ်ရုပ်အကုန် ရိုက်ချင်ပါတယ်။ အခုလည်း ရိုက်ချင်တဲ့ ဇာတ်ရုပ်တွေ ရိုက်နေရတာပါပဲ။ ရိုက်ချင်တဲ့ ဇာတ်ရုပ်တွေက အများကြီးပါပဲ။ ရွှေမှုန်အသက်အရွယ်နဲ့ ကိုယ်ဝန်ဆောင်တဲ့ အခန်းတို့၊ ကလေးမွေးရမယ့် အခန်းတွေက တော်တော်ခက်ခဲပါတယ်။ အတွေ့အကြုံလည်း မရှိတော့ ဘယ်လို သရုပ်ဆောင်ရမလဲ မသိဘူးပေါ့။ အဲလို အခက်အခဲလေးတွေ ရှိပါတယ်။ အဲဒီလို မျိုးတွေကျတော့ မသိတော့ ဒါရိုက်တာတွေ သင်ပေးပါတယ်။

Voice : သရုပ်ဆောင်တစ်ယောက် အနေနဲ့ အနုပညာအပေါ်ထားတဲ့ ခံယူချက်ကရော။

SHYT : ရွှေမှုန်က အနုပညာကိုချစ်လို့ လုပ်တာမဟုတ်ပါဘူး။ ရူးလို့ လုပ်တာပါ။ အနုပညာရှင်ဆိုတာ ကိုယ့်အနုပညာကို အမြဲတမ်း ရူးသွပ်စွာနဲ့ ဖန်တီးနေရမယ်လို့ ထင်ပါတယ်။ ချစ်တယ်ဆိုတာ အပေါ်ယံလေးပါ။ တကယ်ကို ရူးလို့လုပ်တာပါ။

Voice : ညီမလေးရဲ့ပညာရေးကိုရော ဘယ်လောက်ထိ မျှော်မှန်းထားလဲ။

SHYT : ရွှေမှုန်ပညာရေးကို ဆုံးခန်းတိုင်အောင် လုပ်မယ်လို့ မျှော်မှန်းထားပါတယ်။

ဟန်သူထွန်း